Билигин хас биирдии киһи гаджеттаах, күннэтэ Интернетинэн туһанар, онто суох сатаммат да курдук. Ол иһин аныгы олоҕу кытта тэҥҥэ хааман, кинигэ кыһата бу саас Play market-ка уонна AppStore «Книги Бичик» электроннай сыһыарыыны киллэрбитэ. Маны хачайдаабыт киһи улахан виртуальнай маҕаһыыҥҥа киирэн, чэпчэки сыанаҕа талбыт кинигэтин ааҕар кыахтанар. Үчүгэйэ диэн хачайдаабыт кинигэҕин Интернет хаппат да сиригэр хаһан баҕарар ааҕыаххын сөп.
-- Цифровой электроннай эйгэ түргэнник сайдан, биһиги өссө 2000 сыллар саҥаларыгар «Бичик» сайтын арыйбыппыт, электроннай сыһыарыылаах учебникпыт бүтүн Россия үрдүнэн быйыл «Сыл кинигэтэ» дьоһун бириэмийэҕэ тиксэн, Москваҕа үрдүктүк сыаналанна. Национальнай республикалартан биһиги маҥнайгынан ФГОС ирдэбилигэр сөп түбэһэр, 4 кытаанах экспертизаны ааспыт электроннай учебник оҥордубут. Маны хайа баҕарар компьютерга, планшекка, смартфоҥҥа хачайдыахха сөп. Аныгы үйэ оҕолоругар «Биэбэйчээннэрим» диэн саҥарар, хамсыыр кинигэ оҥорбуппут. Ханнык баҕарар оҕо электроннай эйгэҕэ түргэнник сыстар, Интернет баараҕай ситимэ барыта нууччалыы буолан, үгүс төрөппүттэр бу эйгэ сабыдыалыгар оҕустаран, оҕо бэйэтин төрөөбүт тылыттан тэйэр диэн долгуйаллар. Ол иһин, информационнай электроннай эйгэҕэ саха тыынын киллэрэргэ үлэлэһэбит. «Книги Бичик» электроннай сыһыарыыга билиҥҥэтэ уопсайа 70 кинигэ баар, онтон хас да кинигэтин босхо хачайдыахха син. Кумааҕыга типографскай ороскуот суох буолан, сыаната лаппа чэпчэки. Онон, оҕолоор, ханна да буолларгыт төрөөбүт тылгытынан кинигэни ааҕыҥ, туһаныҥ, кэрэхсээҥ! – диэн кыһа дириэктэрэ Август Егоров ыллыктаах санаатын эттэ.
Былырыын Өлүөхүмэ түҥ ойууругар уонтан тахса күн муммут кыысчаан туһунан дьиҥ олоххо буолбут түбэлтэҕэ олоҕуран, «Карина: 12 дней в тайге» кинигэ суруйбут ааптар Виктория Габышева:
-- Мин ыалга кэллэхпинэ дьиэлэригэр кинигэ баарын-суоҕун тута бэлиэтии көрөбүн, оттон билигин, эһиги, оҕолор, электроннай технология күүскэ сайдыбыт бэртээхэй үйэтигэр олороҕут. Дьиэҕититтэн таһырдьа тахсыбакка эрэ хайа талбыт кинигэҕитин тута хачайдаан ааҕыаххытын, үөрэххитигэр бэлэмнэниэххитин сөп, -- диэн санаатын үллэһиннэ.
Play market-ка уонна AppStore «Бичик» кинигэлэрин электроннай көрүҥүн киллэрбит «EcoNordIT» тэрилтэ салайааччыта Иннокентий Антонов:
-- Оҕолор бары «Гарри Поттер» киинэни сөбүлээн көрбүккүт буолуо. Бу киинэҕэ кинигэни көрүөххэ, истиэххэ сөп этэ, биһиги эһиэхэ анаан, төрөөбүт тылгытынан электроннай кинигэлэри Интернеккэ киллэрдибит, үөрэххитигэр, олоххутугар туһаныҥ, ааҕыҥ, хачайдааҥ! – диэн ыҥырда.
«Саха-Бикипиэдьийэ», «Киберсаха» түмсүү сүрүннээччитэ Николай Павлов-Халан «Бичик» саҥа электроннай сыһыарыытын биһириирин, киэҥ эйгэҕэ көхтөөхтүк киирэн иһэригэр баҕарда.
Бу күн «Книги Бичик» сыһыарыыны 5 бастакы хачайдаан ылбыт дьон сэмэй бэлэхтэринэн бэлиэтэннилэр, оҕолор анал кинигэнэн түүлү тойоннооһуҥҥа кыттан, эмиэ илии тутуурдаах үөрэн-көтөн тарҕастылар.
Электроннай сыһыарыыга классик уонна аныгы суруйааччылар айымньыларын таһынан, киһи күннээҕи олоҕор туһанар практическай суолталаах кинигэлэр: ас ырысыаптара, хаһаайыстыбаҕа туһалаах тэттик сүбэлэр о.д.а. киирдилэр. Онон, «Бичик» электроннай кинигэлэрин Play market-тан уонна AppStore хачайдааҥ, туһаныҥ, доҕотторгутугар кэпсээҥ!
Комментарии
Авторизация на сайте через социальные сети