ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
21 июля 2015, 16:20

Күүкэйдэр уруу тэрийэллэр уонна оттууллар


Ааспыт субуотаҕа Сунтаар Күүкэйигэр сонун урууну тэрийдилэр. Нэһилиэк биир түс-бас ыаллара Даниловтар уонна Фефеловтар ыччаттара Ньургун уонна Катюша кэскил тэринэр кэрэ күннэрин тапталлаах Күүкэйдэрин дьонун-сэргэтин кытта бииргэ бэлиэтээтилэр.

Былыргы өбүгэлэрбит үтүө үгэстэринэн алгысчыт М.В. Николаева алгыс этэн аал уоту арыылаах алаадьынан, уохтаах кымыһынан күндүлээтэ.

Олохтоох дьаһалта үлэһитэ С.Н. Попова оҕолорго кэргэннии буолуу туһунан туоһу суругу туттарда.

Саала ортотугар тардыллыбыт баай-талым астаах остуол тула хаама сылдьан, аныгылыы фуршет буолла. Мустубут дьон, остуолга симиллэн олоруохтааҕар маннык дэлэччи сылдьар ордук үчүгэй эбит диэн бу сонун тэрээһини биһирээтилэр. Эдэр ыалларга туһаайан, эҕэрдэ эгэлгэтэ этилиннэ. Ырыа, үҥкүү да дэлэй буолла.

Бу сонун тэрээһини ыал буолар оҕолор доҕотторо, Аркадий, Розалия Евсеевтэр бэркэ табан тэрийдилэр.

Бу күннэргэ окко күргүөмнээтик үлэлии сылдьар күүкэйдэр сорохторо ходуһаттан үргүлдьү кэриэтэ кэлэн эдэр ыаллар үөрүүлэрин үллэһиннилэр. «Күүкэй» ПК үлэһиттэрэ 2 түгэх, Александр Михайлович Федоров 1 оту кээстилэр.

Дьэ, ити курдук Күүкэй сиригэр олох күөстүү оргуйар. Саҥа ыал эбиллэр, окко хоннохтоохтук ылсан үлэлээн эрэллэр.

Алаһа дьиэни тэриммит Ньургуннаах Катяҕа туйгун доруобуйаны, уҕараабат тапталы, уһун дьоллоох олоҕу баҕарабыт.

При частичном или полном использовании материалов гиперссылка на сайт ysia.ru обязательна.
Категория: Территория Просмотров: 755 Источник: ЯСИА Автор: Анастасия Жиркова Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ