Бу ый 10 күнүгэр талааннаах маастар Горнай улууһун Атамайыгар ыытыллыбыт «Кылтан кынаттанан, сиэлтэн ситимнэнэн» диэн быыстапкаҕа кэтэхтэн кытынна. Быыстапка кылтан, сиэлтэн оҥоһуктар маастардара Яков Ефремов сырдык кэриэһигэр анаммыт. Уопсайа 9 улуустан, Дьокуускай куораттан уонна Верхоянскайтан кылынан, сиэлинэн 50-тан тахса дьарыктанааччы кыттыбыт.
Бу улахан быыстапкаҕа Татьяна Ивановна 5 үлэтин туруорбут: «Күн ДьөҺөгөй», «Туйаарыма Куо», «Үрүҥ Уолан», «Манчаары БаҺылай», «ДьөҺөгөй ата». Быыстапка түмүгүнэн маастар «Саамай ыраахтан сылдьар кыттааччы» туоһу суругунан бэлиэтэммит.
Маастар сыл аайы араас таһымнаах быыстапкаларга кыттан, бэйэтин талаанын киэҥ эйгэҕэ таһаарар, билиитин, сатабылын сайыннарар, уопут атастаһар, биир дьарыктаахтарын кытта билсэр.
Манна даҕатан эттэххэ, быйылгы сыл Татьянаҕа элбэх үтүө түгэннэри бэлэхтээтэ. Ол курдук, бэс ыйыгар олоҕун омурҕанын бэлиэтээн, улууспут төрүттэммитэ 85 сылыгар, Чурапчы улууһа төрүттэммитэ 85 сылыгар анаан Дьокуускай куоракка Өксөкүлээх Өлөксөй аатынан норуоттар доҕордоһууларын дьиэтигэр «Сиэл сэһэнэ» диэн анал быыстапката буолбута. Быыстапка арыллыытыгар Татьяна «СР норуотун маастара» үрдүк аат иҥэриллэрин туоһулуур дастабырыанньаны туппутун долгуйа кэпсиир. Ону кытта «Гражданская доблесть» бэлиэнэн наҕаарадаламмытынан киэн туттарын этэр.
Эмиэ бэс ыйыгар төрөөбүт дойдутугар - Чурапчыга ыытыллыбыт IX Олоҥхо ыһыаҕар улуустан собус соҕотоҕун кыттан, тэрийэр кэмитиэт Махтал суругунан бэлиэтэммит.
Туймаада ыһыаҕар, республика норуотун маастардарын Форумун иһинэн тэриллибит быыстапкаҕа, «Кыайыы чорооно» көрүү-куонкуруска кыттыбыт.
Татьяна өбүгэ саҕаттан тиийэн кэлбит уустук уонна мындыр ньымалары баҺылаан, кылтан уонна сиэлтэн таланнаах тарбаҕынан айан таҺаарбыт бииртэн биир гобелен хартыыналарын көрөн, киһи эрэ сөҕөр. Быйыл үбүлүөйдээх сылга анаан «Абый. 85» хартыынаны өрбүт. Санаан көрүҥ. Итиччэ элбэх сиэли булуохха наада. Ону ыраастаан, сууйан-сотон бэлэмниириҥ. Аны ойуутун толкуйдаан, хас биирдии хараҕын сыыспакка тиһэриҥ. Бириэмэни, тулууру, мындыры эрэйэр үлэ!
- Тустаах үлэм таһынан дьарыктанабын. Кыһын устата үбүлүөйгэ анаан ити биир хартыынаны бэлэмнээтим. Аны өссө баҕалаахтары үөрэтэбин. Кырдьаҕастарга эмиэ куруһуок ыытабын. Үлэбинэн, дьарыкпынан олус дьоллоохпун. Сылгыны иитии сахалар төрүт дьарыкпыт буолар. Өбүгэ төрүт дьарыгын тэнитиэххэ, кэнэҕэс ыччакка тарҕатыахха!
Умнулла быһыытыйбыт саха норуотун ииһин-ууһун биир сыралаах көрүҥүн сөргүтэн баҺылаабыт талааннаах маастар Татьяна Макарова инники былаана өссө да элбэх. Быйылгыттан олоххо-дьаһахха туттуллар маллары оҥорор буолбут. Ол курдук сахалыы оһуордаах илии-атах, сис массаһыгар туттуллар кылынан баайан оҥорбут малларын сэргии көрдүм. Туһалаах мал! Сылгы сиэлэ эмтээҕин бары истэбит, билэбит.
Кыл уонна сиэл оҥоһуктар саха культуратын быстыспат сорҕото буоларын быҺыытынан, норуот маастара Татьяна Ивановна искусство бу көрүҥэ сайдарыгар баҕарар.
Комментарии
Авторизация на сайте через социальные сети