. Салайааччылара Павел Павлович Яковлев доруобуйатынан эмсэҕэлээн хараҕынан көрбөт, кытаанах санаатынан, олоххо дьулуурунан, кэрэҕэ тардыһыытынан оҕолору музыка алыптаах эйгэтигэр уһуйар. Бэйэтин уонна ансаамбылын туһунан, бу курдук билиһиһиннэрдэ: - Манна Улахан-Ааҥҥа күтүөппүн, бу эдэр сылдьан кэтэхпинэн түһэн, оһоллономмун кыайан көрбөппүн. Быйыл оскуолаттан сарбыйыыга түбэһэммин, үлэтэ суохпун. Оҕолор студиялара диэни тэрийбитим. Онно ас астааһыҥҥа, кылынан өрүүгэ уонна вокальнай –инструментальнай ансаамбылга оонньуурга-ыллыырга үөрэтэбин. Уопсайынан, 2013 сыллаахтан ансаамбыл тэрийэн оҕолору музыка эйгэтигэр сыһыаран эрчийэбин.
Икки көлүөнэ оҕолору бэлэмнээн таһаарбытым. Билигин бу «Тэтимнэр» тэриллэн оонньообуттара икки ый буолла. Маны таһынан, уолаттар бөлөхтөрө бааллар. Репертуарбытыгар быйылгы дьылга, үксүн мин бэйэм айбыт матыыптарбар ырыалары киллэрдим. Бу буолаары турар, сэтинньи сэттистиир күнүгэр анаан, биир дойдулаахтарбытыгар ырыа-тойук киэһэтин бэлэх уунаары бэлэмнэнэ сылдьабыт. Инникитин бу оҕолорбун өссө сайыннаран конкурустарга кыттыа этибит диэн былаанныыбыт. Мин маны сэргэ, төрөөбүт дойдубар Нөмүгүгэ орто оскуолаҕа, эмиэ икки бөлөҕү уһуйабын -диир Павел. Кыргыттар саҥа оонньуур дьон диэтэххэ, гитараҕа, барабааҥҥа оонньууллар да ыллыыллар да эбит. Былырыын мини-мисс Якутия кыайыылааҕа Айыына Пудова ансаамбылга барабааны табыгыраччы охсор оонньооччу санаатын үллэстэр: - Мин кыра оҕо эрдэхпиттэн барабааҥҥа оонньуохпун олус баҕарар этим. Павел Павлович бөлөх тэрийэн саҕалаабытыгар оҕолор ыҥырбыттарыгар кэлбитим. Манна сылдьар олус үчүгэй, бэйэбэр туһалаах. Инникитин конкурустарга кыттыахтаахпыт, онно икки ырыаны ирдииллэр, онно биирэ урукку кэм ырыата буолуохтаах уонна иккиһэ билиҥҥи биһиги истэр ырыабыт буолар ону толоруохтаахпыт. Салайааччыбар, оҕолору чочуйан өссө үрдүк чыпчаалга таһаарарыгар, бииргэ сылдьар бөлөҕүм оҕолоругар үчүгэйдик үөрэнэллэригэр уонна ансабльга ситиһиилээхтик оонньуулларыгар баҕарабын!,- диэтэ барабааҥҥа айымньылаахтык оонньуур Айыына кыыс.
Дьэ, ити курдук Тэтимнэр тэтимнээхтик оонньууллар, оттон салайааччылара Павел Яковлев олох уустугуттан чаҕыйбакка, ыарахан буомнары туораан сырдык көстөрүн туһугар, кэнчээри ыччаты кэскиллээх кэрэ эйгэтигэр киэҥ суолга сирдиир.
Ааптар хаартыскаҕа түһэриитэ.
Комментарии
Авторизация на сайте через социальные сети