Саҥа дьиэлээхтэри Томпо оройуонун баһылыга Георгий Герасимов эҕэрдэлээтэ уонна саҥа квартиралар күлүүстэрин тылын туттарда. Бэдэрээттэһэр тэрилтэ салайааччыта -"Атлант" ХЭТ генеральнай директора Кирилл Федоров эҕэрдэлээтэ. Кини символическай күлүүһү дьиэлэр ыстаарасталарыгар Антонина Кривошапкинаҕа уонна Ольга Неустроеваҕа туттарда.
Саамай кылаабынайа, тыа дьоно сылаастык уонна сымнаҥастык олороллорун туһугар ураты болҥомтону дьиэлэр хаачыстыбаларыгар уурбуттар. Биригээдэҕэ олохтоохтор, сүнньүнэн үлэтэ суохтар, ону таһынан саҥа дьиэлэр хаһаайыннара буолуохтаах дьон киирэн үлэлээтилэр. Тутааччылар биригээдэлэрин биир дойдулаахтара, прораб Геннадий Степанов салайда. Бу үөрүүлээх күн тутааччылар оройуон баһылыгын махтал суругунан бэлиэтэннилэр. Кинилэр истэригэр "Атлант" ХЭТ директорын солбуйааччы Афанасий Тимофеев, маастар Валерий Чириков, биригэдьиир Николай Кривошапкин, урбаанньыт Аркадий Захаров - тракторист, болуотунньуктар Юрий Иванов, Гаврил Долгунов уо.д.а. бааллар. Мэҥэ Алдан нэһилиэгин баһылыга Комиссаров Юрий эмиэ махтал суруктары туттарда.
Кыһыл лентаны быһыы кэнниттэн дьиэлэри көрүү буолла. Саҥа дьиэлээхтэртэн ураты биир дойдулаахтарын иһин үөрбүт атын олохтоохтор эмиэ сырыттылар. Бары квартиралар иккилии хостоохтор, иэннэрэ эрэ тэҥ буолбакка, оҥоһуута барыта биир. Саҥа дьиэ олохтоохторо ыстаарасталар салалталарынан дьиэлэрин таһын тупсарыынан дьарыктаныахтара. Мас олордуохтара, нэһилиэккэ тротуар билиитэлэрин оҥорор мини-собуот үлэлиэҕэ.
Быйыл Мэҥэ Алдаҥҥа өссө икки саҥа элбэх квартиралаах дьиэлэри тутуу саҕаламмыта. Бэдэрээтчит - "Атлант" ХЭТ. Горнай оройуонун бэрэстэбиитэллэриттэн састааптаах биригээдэ дьиэ көҥдөйүн ортотугар диэри тиэрдибит. Иккис дьиэни олохтоохтор бэйэлэрэ үлэҕэ киллэриэхтэрэ. Бүтэр болдьохторо 2016 сыл.
Комментарии
Авторизация на сайте через социальные сети