Уопсай дьиэлэргэ олорор элбэх оҕолоох ыалларга анаан Үөһээ Бүлүүтээҕи сокуоннай саастарын туола илик оҕолору реабилитациялыыр киин үлэһиттэрэ бааһына сирин туруорсан ылан, иккис сылын төрөппүттэри кытары хортуоска олортулар.
Кырдьаҕас дьону көрөр-истэр интернат ааспыт сылга сабыллыбытынан, даачатын сирэ-уота быйылгыттан реабилитационнай кииҥҥэ бэрилиннэ. Олордубут хортуоппуйдара аны күһүн өлгөм үүнүүнү биэрдин диэн алҕаан туран, киин үлэһиттэрэ бу күн ыһыах ыстылар. Тэрилтэ оҕолору сахалыы тыыҥҥа иитиигэ «Аптаах хоппочоон» диэн бырайыагы үлэлэтэринэн, оҕолорго анаан араас оонньууну, күрэстэри тэрийдэ.
Тэрилтэ үлэһиттэрэ уонна төрөппүттэр саха балаҕаннаах сайылык сирдэммиппит, оҕолорбут ийэ айылҕаҕа чугас буолалларыгар көмөлөөх буолуо диэн үөрэллэр. Ол курдук, быйыл сайыҥҥыттан оҕолору от үлэтигэр сыһыаран, сынньалаҥнарын туһалаахтык атаарарга үлэни ыытыахпыт диэн былаанныыллар.
Комментарии
Авторизация на сайте через социальные сети