Кини бирикээстээх балыксыт буолбатар да, кэргэнин кытта бииргэ уһаарбалыыр, дьонун үлэтин чэпчэтэн, астарын-үөллэрин , дьиэлэрин-уоттарын дьаһайар. Кумаары кумаар диэбэккэ, ардах- силбирээн иһинэн оһохтон арахсыбакка, эрдэ турар, хойутаан утуйар дьон - балык учаастагын үлэһит үтүө хаһаайкалара.
Изабелла, оҕо эрдэҕиттэн балыксыт ыарахан үлэтин баһылаабыта. Төрөөбүт сиригэр - Сииктээххэ кыра эрдэҕиттэн оҥочоҕо олорбут, сэттэ сааһыттан эрдиини тутуһара.
Бу күннэргэ кини кэргэнээн Үүттээх-Хайаларыгар, күһүҥҥү күндүөпкэҕэ ( рябушка ) бардылар, «Былааммыт икки тоннаны балыктаан туттарыахтаахпыт”, - диир. Кинилэр дьиэ кэргэн звено буолаллар, быйыл сайыҥҥы былааннарын 5 тоннаны толорбуттар. Звеноларыгар икки уоллаттара кэлэ-бара көмөлөһөллөр.
Хаһаайка Изабелла Иннокентьевна быйыл саас хаһан да кэлбэтэх улахан уу Өлүөнэ эбэҕэ учаастак турар сирин ылан, улахан хоромньуну таһаарбытын кэпсиир. Балыксыттар сайын олорор дьиэлэрин, улахан ледниктарын барытын аймаабыт, алдьаппыт.
Онон , балык үлэтэ саҕалыан эрэ иннинэ, куораттан тутуу маһын сакаастаабыттар.
Изабелла улаханнык эрэммэтэрбит да, саҥа тойотторбутугар, управляющай Лена Матвеевна Баишеваҕа наадабытын тиэрдибиттэрин кэпсиир. Урукку өттүгэр албыннаппыппыт элбэҕэ, салайан олорбут дьоммут, тылларыгар турбаттара үгус этэ диир. От ыйыгар тутуу маһын толору тиэммит бастакы рефрижиратор Үүттээх- Хайаҕа кэлэн тиксибит.
«Ээ, чэ, ааһар мас, биһиэнэ буолбатаҕа буолуо” – дэһэ турдубуттар. “Арай, маспытын сүөккээн киирэн барбыттарыгар үөрүү бөҕө буоллубут, биһиги сакааспытын аҕалбыттар эбит", - диир Изабелла.
Ол мастара түөрт ыал дьиэтин маһагар тиийбит. Онон, балыксыттар дьиэлэрин туттан киирэн барбыттар. Сайын балыктыыр дьиэбитин нэдиэлэнэн туттан киирбиттэр. Уруккута хархаас маска, бириһиэн таҥаһы тиирэн олорорбут дьоҥҥо билиҥҥи мас дьиэлэрэ олус үчүгэй. Мастарын хамнас суотугар ылбыттар, балык былаанын толорбут дьон, төлөһөллөр бөҕө буоллаҕа.
Балыксыт, үлэһит хаһаайка салалта балыктыыр усулуобуйаларын барытын тэрийбитигэр махтала улахан.
Арай, бу балык үлэтин үгэнин толоро сылдьар дьоммут эрдэрин аһатар, бэйэлэрин тус эбээһинэстэрин толор сылдьар дьон буолан туспа аахсар хамнастара суох. Ыарахан усулуобуйалаах үлэлиир-хамсыыр, уоту, ууну кытта күннэтэ күрсэ сылдьар дьон судаарыстыба өттүттэн көмүскэллээх буолуохтарын сөп этэ. Оһол да, ыалдьан да хаалыы баар буолар, ханна барыай. Ити мин тус санаам, туундура дьахтара тулуурдаах, үлэһит киһи көрүүлээх – истиилээх буолара наада.
Комментарии
Авторизация на сайте через социальные сети