ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
12 августа 2015, 10:08

Туризм эйгэтигэр үлэлэһэр дьоҕус бизнес бэрэстэбиитэллэрэ үлэлэрин ымпыгар-чымпыгар тиийэ толкуйдуохтарын наада


Быйыл Саха сиригэр туризмы сайыннарыыга үлэ саҕаламмыта 50 сыла бэлиэтэнэр. Бу суолталаах тэрээһининэн сибээстээн «Сахамедиа» медиа-холдинг суруналыыстара "Саха сиригэр туризм сайдыыта: бүгүҥҥү балаһыанньа уонна кэскиллээх торум" диэн ааттаах "төгүрүк остуол" остуолу тэрийэн ыыттылар. Кэпсэтиигэ туризм салаатыгар уонна ыалдьыты көрсүү индустриятыгар үлэлиир уопуттаах дьон санааларын үллэһиннилэр.

photoByWidth&id=41735&width=1000

Андрей И, кыһыҥҥы экстремальнай туризм пропагандиһа:

1. Уопуттаах киһини көмөлөһүннэриэххэ наада.

Улуустарга туристарга анаан бэйэ-бэйэлэригэр маарыннаһар дьиэлэри, ураһалары тутан эрэллэр. Тыа быыһыгар дьиэ туттуҥ да, база бэлэм дии саныыр тутах. Мин маныаха үгүһү сүбэлиэхпин сөп. Хас биирдии улуус бэйэтэ туспа өрүттээх. Ону таба көрүөххэ наада. "Киирбит дохуоттан 10%-нын үллэстиэ", -- диэн сэрэхэдийэллэр быһыылаах, оннук буолбатах. Миэхэ этиилээх таҕыстахтарына, босхо өйүөм, сүбэлиэм этэ.

2. Саха сирэ экстремальнай туризмы сайыннарыыга аан дойдуга ханна да суох баайдаах -- чысхаан тымныы. Тыйыс климакка "сынньалаҥы", таһырдьа тахсан киирэри киллэрэн туран, баҕалаах туристарга туһааннаах кэмҥэ атыылыахха наада.

Кыһынын Интернетинэн хайдах таҥнары, хас кыраадыс тымныыны киһи тулуйарын ыйытааччы элбиир. Мин оннук кэмҥэ туристары кытта анаан сибээстэһэбин. 

photoByWidth&id=41736&width=1000

Татьяна ТЫМЫРОВА, СӨ Ресторатордарын ассоциациятын салайааччы:

- Туристар ордук тоҥ аһы интэриэһиргииллэр. "Саха сирин амтана" диэн аан бастаан тэрийбит фестивальбыт дьон сэҥээритин ылбытыттан кынаттанан, аны балык миинин фестивалын ыытар былааннаахпыт. Тымныыбытын уонна бриллиаммытын сэргэ балыкпытын бренд быһыытынан көрдөрүөхпүт.

photoByWidth&id=41737&width=1000

Владимир КОЛЕСОВ, Саха сиригэр туризмы сайыннарыы бэтэрээнэ:

- Сэбиэскэй кэмҥэ үөрэнээччилэргэ өрөспүүбүлүкэтээҕи турслеттары ыытар этибит. Саатар үс сылга биирдэ маннык тэрээһиннэри ыытыахха наада.

XXI үйэҕэ олоробут. Мобильнай сыһыарыылары олоххо киллэрэр уолдьаста. "Автостобунан" үгүс турист кэлэн ааһар. Кинилэр ханна тиийбит сирдэригэр Интернеккэ "гугллаан" миэстэтигэр гостиница булар усулуобуйаларын тэрийиэххэ сөп.

Биллэн турар, бу этиилэри сурукка киллэрээт, толоро охсубатыҥ биллэр. Ол эрээри мин туризмынан дьарыктанар тыа сирин дьоно-сэргэтэ бу киирбит этиилэртэн биирин эмэ туһаанарай диэбиппин холобурдаатым.

photoByWidth&id=41738&width=1000

Илин диэки хайыһабыт 

От ыйа Соҕуруу Корея Республикатын туристарыгар Саха сирин арыйыы ыйынан буолла.

Профессордар делегацияларын Ханкук куорат омук тылын университетын нуучча тылын кафедратын профессора Канг Дук Су салайан илдьэ сырытта. Учуонай Саха-Корея оскуолатын төрүттээччи быһыытынан биллэр, Саха сирин туһунан уонча научнай үлэлээх, олоҥхо героическай эпоһы кореялыы тылынан саҥардыбыт үтүөлээх. Профессордар бөлөхтөрүгэр туризм менеджердэрэ эмиэ бааллар.

Хомойуох иһин, Арҕааҥҥы судаарыстыбалары кытта балаһыанньа уустугуран, омук туристара кэлиилэрэ аҕыйаата. Ол курдук, "Дьокуускай-Тиксии" маршрутунан круизка суруттарбыт Великобритания уонна Германия туристара кэлэртэн аккаастаннылар. Онон Саха сиригэр туризм эйгэтигэр үлэлэһэр исписэлиистэр Азия судаарыстыбаларын диэки хайыстылар. Соҕуруу Кореяны кытта хардарыта үлэлэһиигэ далаһа уурулунна. 

photoByWidth&id=41739&width=1000

Саха сирин хайдах рекламалыахха? 

Туризмы сайыннарыыга ханнык сөптөөх хайысханы тобулуохха? Хайдах турист ахсаанын элбэтэбит? Бу туһунан предпринимателлэр Москваттан кэлбит гостиница уонна ресторан бизнеһин сайыннарыыга үлэлэһэр исписэлиистэрдиин кэпсэттилэр.

“Мир без границ” норуоттар икки ардыларынааҕы тэрилтэ исписэлииһэ Асель Смоляр былырыын 100 мөл. Кытай туриһа кыраныысса таһыгар сынньаммытын холобур аҕалла. Кинилэр 160 миллиард доллары аҥардас сувенирга уонна араас атыыга ороскуоттаабыттарын туһунан иһитиннэрдэ. Ол эрээри ити дьонтон мөлүйүөн эрэ кэриҥэ турист Россияҕа сылдьыбыт. Кытайдары ордук интэриэһиргэтэр сирдэринэн Соҕуруу Корея, онтон Таиланд буолаллар. Россия 9-с миэстэҕэ сылдьар. Кытайдар сүрүн "мэҥиэлэрэ" -- реклама. Бу Интернети муҥутуурдук баһылаабыт норуот. Онон Россияҕа ордук күүстээх рекламалаах Байкал күөл инники күөҥҥэ сылдьар. Онон Асель Смоляр рекламаны хото ыытарга сүбэлээтэ. Холобура, Саха сирин туһунан Интернеккэ рекламалаан туран, кытай блогердарын анаан аҕалыахха, сахалыы ырыалары кытай тылыгар тылбаастаан тарҕатыахха сөп. Уопуттаах туризм менеджерэ кытайдары көрсөр ирдэбиллэри хайаан да учуоттуурга сүбэлээтэ: гостиницаҕа түһэр хоско хайаан да тапочка, соттор, итии иһэр уу уонна вай-фай баар буолуохтаах; кытайдыы билэр тылбаасчыт наада; Union Pay кредитнэй картанан туһаныллар банкомат; менюга кытай бүлүүдэтэ учуоттаныллыахтаах.

Маны тэҥэ Асель Смоляр рекламаны оҥорорго туристыы барар сири эрэ буолбакка, хас биирдии оҥоһуллар өҥөҕө барытыгар сыананы ыйар хайаан да наадатын бэлиэтээтэ:

-- Саха сирин турменеджердэрэ Россияҕа да, кыраныысса таһыгар да араас быыстапкаларга кытталлар эрээри, туристскай өҥө сыанатын ыйбакка, тустаах тэрээһин ис хоһоонун эрэ сырдаталлар. Оттон турист оҥоһуллар өҥөҕө, бастатан туран, харчытын ааҕар.

Онон туризм эйгэтигэр үлэлэһэр дьоҕус бизнес бэрэстэбиитэллэрэ бу этиллибит өрүттэргэ болҕомтолорун уураллара наада.

При частичном или полном использовании материалов гиперссылка на сайт ysia.ru обязательна.
Категория: Общество Просмотров: 1002 Источник: Газета "Саха Сирэ" Автор: Елена Потоцкая Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ