- Тэрээһин саҕаланыытыгар СӨ тыатын хаһаайыстыбатын үтүөлээх үлэһитин, Амматын сайдарыгар олоҕун анаабыт, өр кэмҥэ "Амма" ТХППК салайааччытынан үлэлээбит Иван Николаевич Емельяновы ахтан-санаан аастылар. Кини тыа хаһаайыстыбатын курдук уустук салааны бары өттүнэн билэр, дириҥ билиилээх дэгиттэр испэсилиис этэ, үгүс сылларга салайар үлэҕэ ситиһиилээхтик үлэлээбитэ.
- СӨ тыа хаһаайыстыбатын миниистирэ Александр Артемьев, Амма улууһун баһылыга Николай Архипов, "Туймаада" ҮАПК дириэктэрэ Александр Васильев, "Амма" ТХППК салайааччыта Айысен Черноградскай слекка кэлбит делегациялары эҕэрдэлээтилэр.
- Салгыы өр сылларга переработка эйгэтигэр үлэлээбит бэтэрээннэр уонна бастыҥ үлэһиттэр наҕараадаланнылар. Ол курдук, Игнат Бальницкайга ("Чурапчы" ТХПК) уонна Мотрена Оконешниковаҕа ("Манчаары" МУП) СӨ Бырабыыталыстыбатын Махтал суруктарын, Зинаида Бродниковаҕа ("Амма" ТХППК) "Тыа хаһаайыстыбатын туйгуна" бэлиэни, Мария Адамоваҕа ("Амма" ТХППК), Зинаида Неустроеваҕа ("Таатта" ТХПК) уонна Мария Федороваҕа ("Мүрү-Ас" ТХПК) Тыа хаһаайыстыбатын министиэристибэтин Бочуотунай грамоталарын, Зоя Ивановаҕа ("Сыа Бүлүү" ТХПК) уонна "Үс Хатын" турбаза салайааччыта Андрей Любчичка Тыа хаһаайыстыбатын министиэристибэтин Махтал суруктарын, Анастасия Жирковаҕа ("Амма" ТХППК) СӨ Эргиэнин уонна бырамыысылыннаһын палаататын мэтээлин туттардылар.
- Семинар
- Тиэмэтэ олохтоох бородууксуйаттан оҥоһуллар ас хаачыстыбатын тупсарыыга туһуланна уонна санаа үллэстиилээх „төгүрүк остуол“ киэбинэн барда. Манна СӨ тыатын хаһаайыстыбатын миниистирэ Александр Артемьев, Амма улууһун баһылыга Николай Архипов уонна кэпэрэтииптэр салайааччылара кытыннылар. Ас уонна переработка промышленноһын департаменын салайааччы Андрей Андреев технологияны тупсарыыга баар мэһэйдэр тустарынан иһитиннэрдэ. Маныаха республика үүтү переработкалыыр 349 объектарын дьиэлэрэ 40% -на эргэрбитин, онтон 217-гэр оборудованиета 100%-н хаарбах туруктааҕа этилиннэ. Салгыы переработкалыыр тэрилтэлэр сойуустарын дириэктэрэ Розаида Гудуева бородууксуйа хаачыстыбатын хонтуруолун уонна техническэй регламент туһунан,тыа хаһаайыстыбатын наукатын доктора Константин Степанов олохтоох бородууксуйаттан оҥоһуллар саҥа ас көрүҥнэригэр иһитиннэриилэри оҥордулар. Семинарга кэпэрэтииптэр переработканы хонтуруоллуур лабораторияларын үлэтин тупсарыыга уонна олохтоох бородууксуйа ырыынакка хамаҕатык барарыгар маркетологтар үлэлэрин сайыннарыыга этиилэр киирдилэр. Түмүккэ атыыга тахсар ас хаачыстыбатын үрдэтэр, тэрилтэлэр лабораторияларын үлэлэрин сүрүннүүр сыалтан Дьокуускай куоракка переработканы хонтуруоллуур кииннэммит лабораторияны аһар туһунан, СӨ Бырабыытылыстыбатыттан объектары тутууга, оборудованиены саҥардыыга субсидия туруорсарга уонна улуус баһылыктарыгар переработка сыахтарын тутуутугар олохтоох бүддьүөттэн көмө (софинансирование) оҥороллоругар этии киллэрэргэ быһаарыы ылыннылар.
- Күрэхтэһиилэр
- Спартакиада спорт 8 көрүҥэр: эстафетаҕа, волейболга, хапсаҕайга, мас тардыһыытыгар, сыал ытыыга, түһүлгэ киэргэтиитигэр, үүт ас көрүҥүн хаачыстыбатыгар ыытыланна. Бастакыттан "Чурапчы" ТХПК, "Мүрү-Ас" МУП уонна Мэҥэттэн "Хоту" ТХПК хамаандалар эрбии тииһин курдук эрийсэн, илин-кэлин түһүстүлэр. Амма хамаандата эстафетаҕа 9 миэстэҕэ тиксибитэ эрээри, кэнники көрүҥнэргэ инники күөҥҥэ тахсыталаан, түмүккэ бастаан таҕыста. Онон республикатааҕы слет кубогын "Амма" ТХППК илдьэ хаалла.
- Күрэх түмүгэ маннык буолла:
- I миэстэ - “Амма“ ТХППК – 26
- II миэстэ - «Мүрү-Ас“ МУП – 28
- III миэстэ - «Хоту“ ТХПК – 29
- Үүт таһар массыына суоппардарын күөн күрэҕэ
- Ааспыт слекка Мэҥэ-Хаҥалас Ураһалааҕар Иван Николаевич Емельянов маннык күрэҕи тэрийэргэ этии киллэрбитэ. Тыа хаһаайыстыбатын министиэристибэтэ, Амма улууһун дьаһалтата уонна "Амма" ТХППК ити этиини өйөөннөр орто анал идэлээх үлэһиттэр үлэлэрин таһымын өрө көтөҕөр уонна Иван Николаевич Емельянов аатын үйэтитэр сыалтан бу күрэҕи тэрийдилэр. Кыайыылаахха бириискэ "Минскэй" мотоцикл туруорулунна. Бу ханна да урут ыытылла илик сонун 7 түһүмэхтээх (бэйэни билиһиннэриигэ, өй күрэҕэр, талааны көрдөрүүгэ, икки толору үүттээх 35 киилэлээх бөтүөнү ыраахха илдьиигэ, массыына көлүөһэтин ыраахха быраҕыыга, идэни билии таһымын тургутууга уонна УАЗ массыынаны соһууга ) күрэскэ 9 суоппар кытынна. Манна Уус-Алдантан Анатолий Окоемов, Горнайтан Николай Исаков, Амматтан Гаврил Нестерев, Мэҥэттэн Михаил Павлов күрэс лидердэринэн буоллулар, эгил-тэгил кииристилэр. Алта түһүмэх түмүгүнэн Михаил Павлов бастаан испит буоллаҕына, бүтэһик түһүмэххэ (массыына соһуутугар) Гаврил Нестерев модун күүһүн көрдөрөн "Минскэй" мотоциклы көрдөрбүтүнэн туура тутан ылла.
- Күрэх түмүгэ маннык буолла:
- I миэстэ - Гаврил Нестерев ("Амма" ТХППК) -20
- II миэстэ - Михаил Павлов ("Хоту" ТХПК) - 22
- III миэстэ - Анатолий Окоемов ("Мүрү-Ас") МУП -26
- Улуус баһылыгын социальнай боппуруостарга солбуйааччы, Иван Николаевич кэргэнэ Парасковья Емельянова:"Биһиги дьиэ кэргэн аҕа баһылыга, СӨ тыатын хаһаайыстыбатын үтүөлээх үлэһитэ, "Амма" ТХППК салайааччыта Иван Николаевич былырыын тыа хаһаайыстыбатын бородууксуйатын переработкалыыр тэрилтэлэр слеттарыгар сылдьан, бу хайысхаҕа үлэлиир орто анал идэлээх үлэһиттэр күрэстэрин тэрийэр туһунан идиэйэ эппитин, быйылгы слет программатыгар киллэриэҕиҥ диэн быһаарбыттара. Итинэн сиэттэрэн СӨТыатын хаһаайыстыбатын министиэристибэтэ, Амма улууһун дьаһалтата, "Амма" ТХППК уонна Иван Николаевич доҕотторо өйөөннөр бүгүн үүт таһар массыына суоппардарын күрэһэ буолла. Биһиги дьиэ кэргэн бу күрэхтэһиигэ кыттыбыт суоппар идэлээх дьоҥҥо уонна күрэс тэрийээччилэригэр истиҥник махтанабыт уонна тыа хаһаайыстыбатын курдук ыарахан үлэҕэ өрүү илиилэрин араарбакка, үлэлии- хамсыы сырыттыннар",- диэн санаатын үллэһиннэ.
- Семинар уонна күрэхтэһии күн ардыы турбут халлаан арыллан, анаабыт курдук туран биэрдэ. Слекка мустубут ыалдьыттар тэрээһин бары өттүнэн туһалаахтык үрдүк таһымҥа ааста диэн бэлиэтээн, астынан тарҕастылар.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети