Суруйуум ис хоһоонун кылгастык санаттахха, социальнай ситимнэргэ террористка таҥаһын кэппит икки саха кыыһын хаартыската тарҕаммыта. Кыргыттар, буолаары буолан, Бырабыыталыстыба 1 №-дээх дьиэтин иннигэр хаартыскаҕа түспүттэр этэ. РФ ИДьМ-тын СӨ ИДьМ-тын экстремизмы утары охсуһар киинин оперативниктара бу кыргыттар кимнээхтэрин билбиттэрэ, булбуттара. Кыргыттар полицияҕа быһаарбыттарынан, кинилэр от ыйын 4 күнүгэр “Ночной дозор” диэн оонньуу сорудаҕын толорон, итинник таҥныбыттар.
Онно өссө: “Бу чахчыны аны прокуратура эмиэ бэрэбиэркэлиир буолла. Бэрэбиэркэ кэмигэр ити оонньууну тэрийээччилэр уонна уопсастыбаннай бэрээдэги араҥаччылыахтаах итиэннэ Бырабыыталыстыба дьиэтигэр үлэлиир полицейскайдар дьайыыларыгар сыанабыл бэриллиэҕэ”, -- диэн суруйбутум. От ыйын 17 күнүгэр өрөспүүбүлүкэ прокуратуратын пресс-конференциятыгар Анатолий Подласенко суруналыыстарга иһитиннэрбитинэн, бу оонньууну тэрийээччилэргэ уонна “шахидка” буолан кубулуммут кыргыттарга прокуратура сэрэтии биэрбит. Уопсастыбаннай бэрээдэги кэһэр сатамматын туһунан. Оттон ис дьыала миниистирэ Владимир Прокопенко аатыгар полицейскайдар ити түбэлтэҕэ туох да дьайыы оҥорботохторунан сибээстээн, прокуратура представление ыыппыт. Маны таһынан, бэрэбиэркэ матырыйааллара процессуальнай быһаарыы таһаарарга РФ Силиэстийэлиир кэмитиэтин Саха сиринээҕи управлениетыгар барбыттар. РФ СК ССУ пресс-сулууспата биһиги хаһыаппытыгар иһитиннэрбитинэн, ити чахчынан бэрэбиэркэ ыытыллан, холуобунай дьыаланы тэрийэри аккаастыыр туһунан уураах тахсаары сылдьар.
Манна биири этиэххэ сөп: ити кыргыттар оонньуу сылдьаннар, бэйэлэрэ да билбэттэринэн, биһиги өрөспүүбүлүкэбитигэр терроризмы, экстремизми сэрэтии үлэтэ букатын “сиикэйин” көрдөрдүлэр.
Комментарии
Авторизация на сайте через социальные сети