Нам улууһугар А. Шестаков аатынан Сынньалаҥ киинигэр улууска үөрэхтээһин эйгэтин историятын сырдатар дириҥ суолталаах «Светоч знаний земли Намской» диэн кинигэни билиһиннэрэр тэрээһин буолла.
Саҕаланыытыгар мустубут дьоҥҥо Нам улууһугар үөрэх сайдыытын сырдатар киинэни көрдөрдүлэр. Көрүдүөргэ үөрэх ситимин көрдөрөр кинигэлэр дьон-сэргэ көрүүтүгэр быыстапкаҕа туруоруллубуттар. «Бичик» национальнай кинигэ кыһата бэчээттээн таһаарбыт кинигэлэрин атыылаатылар.
Үөрэх эйгэтин историятын кэрэһилиир кинигэ тахсыбытынан «Нам улууһа» МТ баһылыгын солбуйааччы Николай Степанов, үөрэх управлениетын начальнига, СР үөрэҕириитин туйгуна Олег Протопопов эҕэрдэ тыл эттилэр уонна наҕараадалары, махтал суруктары туттартаатылар. Кинигэ ис тутулун, суолтатын туһунан историческай наука кандидата, М.К. Аммосов аатынан ХИФУ доцена, СР үөрэҕириитин туйгуна, Нам улууһун «Ытык киһитэ», киэн туттар биир дойдулаахпыт Платон Слепцов билиһиннэрдэ.
Нам улууһугар үөрэх ситимин туһунан кинигэ хайаан да суруллан, бэчээттэнэн тахсыахтаах диэн кэскиллээх, ыллыктаах толкуйу тобулан уонча сыллааҕыта, үөрэх управлениетын 12 сыл устата салайбыт, уопуттаах учуутал, салайааччы Венера Никитична Дьяконова саҕалаабыт. Хомуйар, түмэр үлэ далааһыннаахтык ыытыллан, үп-харчы көрүллэн, элбэх матырыйаал мунньуллан, баҕарбыт баҕа санаалара олоххо киирбитин туһунан, СР үөрэҕириитин үтүөлээх үлэһитэ, педагогическай үлэ кандидата Венера Дьяконова сырдатта, үөрүүтүн үллэһиннэ.
Н. Рыкунов аатынан киин библиотека директора, СР культуратын туйгуна Майя Софронова ааҕааччыга, библиотекаларга бу кинигэ туохха туһалаах буолуоҕун, суолтатын туһунан билиһиннэрдэ.
Кинигэҕэ элбэх историческай чахчылар, хаартыскалар, сыыппаралар киирбиттэр. Маны сырдатарга музей үлэһиттэрэ, чинчийэр үлэнэн дьарыктанар идэлээх дьон, историктар, фотографтар көмөлөрө муҥура суоҕун бэлиэтээн аастылар. Кинилэргэ СР культуратын үтүөлээх үлэһитэ, Нам улууһун бочуоттаах олохтооҕо, кыраайы үөрэтээччи Иннокентий Кривошапкин махталын тириэртэ, эҕэрдэ тыл эттэ.
Нам улууһугар 19 нэһилиэк баар, хас нэһилиэк аайы оскуолалар, оҕо саадтара, эбии үөрэхтээһин тэрилтэлэрэ үлэлииллэр. Кинигэҕэ нэһилиэктэргэ баар үөрэх тэрилтэлэрэ бары хабыллан балай да киэҥник сырдатыллыбыттар, үгүс хаартыскалар киирбиттэр. Онон нэһилиэктэр баһылыктарын аатыттан «Хамаҕатта нэһилиэгин» МТ баһылыгын солбуйааччы Касьян Олесов санаатын үллэһиннэ.
Учууталларбыт өрүү инники күөҥҥэ сылдьыахтара диэн эрэнэн туран, улуустааҕы үөрэх үлэһиттэрин профсоюһун комитетын председателэ Александр Шарапов уо.д.а. кинигэ бэчээттэнэн тахсыбытынан итии-истиҥ эҕэрдэлэрин тириэртилэр.
Бу тэрээһиҥҥэ РФ уопсай үөрэхтээһинин бочуоттаах үлэһитэ, СР үөрэҕириитин туйгуна, үөрэх эйгэтин ветерана Лина Михайловна Полякова бэчээт үлэтигэр сыстаҕас, сурукка-бичиккэ чугас буолан, күнүн-дьылын аахсыбакка, ис дууһатыттан бэриниилээхтик үлэлээбитин түмүгэр бу кинигэ түмүлүннэ, бэчээттэннэ диэн бэлиэтээтилэр.
Историяны кэрэһилиир кинигэ бэчээттэнэн тахсыыта улуус, республика таһымыгар дириҥ суолталаах улахан үлэ, ситиһии, ааспыты ахтар, бүгүҥҥүнү түмэр, кэлэр кэмҥэ туһулуур боччумнаах дьыала, улууспут дьонугар-сэргэтигэр үтүө бэлэх буолар.
Комментарии
Авторизация на сайте через социальные сети