ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
17 ноября 2015, 14:30

Мэҥэ-Хаҥалас киинигэр «Идэһэ-2015» дьаарбаҥка иккис түһүмэҕэ ыытыллар


Быйылгы «Идэһэ» дьаарбаҥка ааспыт бээтинсэҕэ, сэтинньи 13 күнүгэр, ыытылынна. Д.Ф.Ходулов аатынан театр иһинэн-таһынан тэриллибит атыыга-тутууга дьон-сэргэ тоҕуоруста, массыына арааһа кырыы-кырыытынан кэккэлээтэ, ыт аймах уос-тиис салбанан атыылааччылар аттыларыгар эрилиннэ.

photoByWidth&id=49592&width=1000

Дьаарбаҥка кыттыылаахтарын эҕэрдэлииригэр улуус баһылыга Николай Старостин ыанар ынах ахсаанын төһө кыалларынан аҕыйаппакка тутан хаалыы соругун туруорда, сыспай сиэллээх былырыыҥҥы ахсаана иллэрээ сыллааҕар 9 бырыһыанынан үрдүгүн бэлиэтээн туран, быйылгы ахсааҥҥа үрдээһин баар буолуоҕар эрэнэрин тиэртэ. Бэйэ оҥорор бородууксуйатын элбэтэн, хаачыстыбатын өссө тупсаран, ыаллыы промышленнай оройуоннарга кытта батарыы ситимин тэрийдэххэ, олохтоох тыа сирин оҥорон таһаарыытын сайыннаран иһэр кыах баарын ыйда. «Хоту» уонна «Манчаары» кооперативтар аан дойду таһымнаах быыстапка-дьаарбаҥкаларга ситиһиилээхтик кыттыбыттарын бэлиэтээтэ. Маныаха даҕатан, «Хоту» кооператив оҥорон таһаарыы хаачыстыбатын хонтуруоллааһыҥҥа «ХАССП» ситими киллэринэн, аан дойду таһымыгар эппиэттэһэр кыахтаммытын кооператив бэрэссэдээтэл Иван Максимов бигэргэтэр.

Салгыы, «Идэһэ-2015» дьаарбаҥка кыттыылаахтарын улуус баһылыгын бастакы солбуйааччы Павел Сазонов, тыа хаһаайыстыбатын управлениетын начальнига Иван Аргунов эҕэрдэлээтилэр.

Оттооһуҥҥа улуус дьаһалтата олохтообут күрэхтэһиигэ балаһыанньатынан, инники күөҥҥэ тахсыбыт нэһилиэктэр баһылыктарын сценаҕа ыҥыран, тыа хаһаайыстыбатын техникаларын сертификаттарын туттартаатылар. «Синтай-220» трактор сертификатын Томтор баһылыга Мирон Свинобоев, ити трактор охсорун Мөҥүрүөн баһылыга Иннокентий Андросов, мунньарын Бүтэйдээх баһылыга Алексей Игнатьев нэһилиэктэрин ааттарыттан туттулар.

photoByWidth&id=49593&width=1000

Бааһынай хаһаайыстыбалартан бастакы степеннээх дипломунан Төҥүлүттэн Антон Новгородов, иккис степеннээҕинэн Хаптаҕайтан Леонид Егоров, үһүс степеннээҕинэн Тумултан Илья Птицын, тэрээһиннээх хаһаайыстыбалартан бастакы степеннээх дипломунан «Хорообут» ХЭТ (Прокопий Романов), иккис степеннээҕинэн Бүтэйдээхтэн «Сомоҕо» кооператив (Роман Попов), үһүс степеннээҕинэн «Чүүйэ» МУТ (Святослав Кириллин) дьаарбаҥкаҕа кыттыылара, сыллааҕы үлэлэрэ-хамнастара бэлиэтэнэр чиэстэннилэр.

Ас-үөл көрүҥнэринэн бастыҥ бородууксуйалаах тэрилтэлэри бэлиэтээһин буолла. Ол курдук, үрүҥ аска «Хоту» кооператив, эт аска Аллараа Бэстээхтэн «Мясной двор» тэрилтэ (С.М.Иванова), үүнээйигэ Павловскайтан «Лена» атыы-эргиэн киинэ (Федор Петров), килиэпкэ, килиэптии астаммыт бурдук аска «Төҥүлү» потребобщество, минньигэс бурдук аска Сардаана Слепцова (Төҥүлү), «Сыа сымса эт» номинацияҕа Олег Стручков (Балыктаах), «Эмис эт» номинацияҕа Егор Дьячковскай (Чыамайыкы), «Холбос» потребобщество төрүттээччитэ К.О.Гаврилов аатынан бириэмийэлээх дипломунан бэлиэтэнэн Төҥүлүттэн «Алаас ыала» түмсүү (салайааччы Марфа Романова) астара-үөллэрэ сыл бастыҥ бородууксуйаларынан ааттаннылар. Кытааччылартан ордук күргүөмнээхтик кытта кэлбит төҥүлүлэри бэлиэтиир тоҕоостоох. Сыл аайы «Идэһэни» көтүппэккэ ситиһиилээхтик кытталлар диэн Иван Аргунов хайҕаан бэлиэтээтэ.

Атыыга ас арааһын аҕалбыттар. Дьаарбаҥкабытын көтүппэт «Нерюнгритээҕи көтөр фабриката» куурусса сымыытын устуукатын 8-тыы, этин киилэтин 140-нуу солкуобайга атыылаата. «Сомоҕо» икки идэһэни киилэтин 400-түү батардылар. Куул собо 1000-лыы атыыланна. Сүөһү аҥардыыта, миэстэнэн эт, барыанньа арааһа, кэнсиэрбэлэммит оҕуруот аһа, кондитерскай астар, утахтар уонна онтон да атын ас-үөл хото атыыга барда. Барыллаан ааҕан көрүүнэн, 20 тонна 619 киилэ бородууксуйа аҕалыллан, 8 мөлүйүөн 500 тыһыынча солкуобайга атыыланна диэн тэрийээччилэр аахпыттар. «Идэһэ-2015» дьаарбаҥкаҕа 8 тэрээһиннээх, 24 бааһынай хаһаайыстыба уонна 20 биирдиилээн ыал кытыннылар диэн бэлиэтэннэ. Ол гынан, быйылгы дьаарбаҥкаҕа эт атыыта арыый аҕыйах буолбутун Иван Аргунов дьон быйыл сүөһүнү туттууну аччата сатааҥ диэн улуус салалтата баҕа санаатын тиэрдэрин учуоттуур быһыылаах диэн сабаҕалаата. Ордук, ийэ сүөһүнү хааллара сатааһыҥҥа.

«Идэһэ-2015» дьаарбаҥканы талааннарынан Сардаана Осипова уонна Лена Апросимова киэргэттилэр.

Бу бээтинсэҕэ аны «Идэһэ-2015» дьаарбаҥка иккис түһүмэҕэ улууспут киинигэр Аллараа Бэстээххэ ыытыллара быһаарылынна. Биллэриитэ-иһитиннэриитэ киэҥник ыытыллыахтаах. Хаһаайыстыбалары дьаарбаҥкаҕа көхтөөхтүк кытталларыгар улуус салалтата ыҥырар.

При частичном или полном использовании материалов гиперссылка на сайт ysia.ru обязательна.
Категория: Территория Просмотров: 696 Источник: ЯСИА Автор: Аркадий Иннокентьев Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ