«Мин эмиэ хат сылдьан кырбанарым»
Быһылаан туһунан истээт биһиги эмсэҕэлээбит эдэр дьахтар ийэтигэр Саргылаана Сидоровалыын сибээскэ тахса сырыттыбыт. Ытык Күөлгэ баар «Лайм» кулуубу кинилэр бас билэр эбиттэр. Күнүскү өттүгэр «Лайм» кафеҕа дьон аһыыр, сынньанар, оттон түүнүгэр дискотекалыыллар. Бу кафе олбуоругар кыра (ИЖС) сир баар, онно Сардааналаах дьиэлээхтэр. Сардаана кэргэн тахсыахтаах киһитин кытта манна бииргэ олорбуттар. Сардаана идэтинэн технолог буолан ийэтигэр суши оҥорсон, ас астаһан көмөлөһөр эбит. Кини бу идэтин Владивосток куоракка үөрэнэн ылбыт. Ийэтэ идэтинэн акушерка эрээри, кэлин чааһынай дьыаланан дьарыктанар. Ол киэһэ Сардаана дьон сакааһын дьиэлэригэр илдьэн биэрбит уонна олбуоругар киирэн испит. Күрүө сабыылаах аанын аһан кыргыттар киирэн иһэллэрин дьиибэргээн, Сардаана утары барбыт. Биэчэр саҕалана илигин эппит. Онуоха кыргыттар саба сырсан кэлэн тэбиэлээбитинэн, охсуолаабытынан барбыттар. Бу туһунан кыыс ийэтэ Саргылаана маннык кэпсиир:
- Оҕом барахсан биэс аҥар ыйдаах хат сылдьан хантан көмүскэнээхтиэй? Арай оҕо күүтэрин эппитин, баһаалыста тыытымаҥ диэн көрдөспүтүн үрдүнэн кыыллара турбут кыргыттар: «Мин эмиэ хат сылдьан эрбиттэн кырбанарым», - дии-дии искэ, сирэйгэ тэбиэлээбиттэр. Бу кыргыттартан биирэ Чөркөөхтөн, иккиһэ Дьокуускайтан төрүттээхтэр. Биир ыалга иккиэн кийииттэр, иккилии оҕолоохтор. Маннык эдэр ийэлэр буолан баран сидьиҥ, аһыныгаһа суох быһыылара мин өйбөр баппат. Биһиги көмөҕө кэлбэтэхпит буоллар салгыы хайдах гыныахтара биллибэт. Тута полицияҕа эрийэ сатаатыбыт. Полициябыт кэлбэтэҕэ. Онтон "Суһал көмөнү" ыҥыран, ол түүн кыыһым балыыһаҕа киирбитэ, онтон сарсыныгар санрейсинэн куораттаппыттара. Дьыаланы таах хаалларар санаабыт суох. Оҥорбут буруйдарыгар эппиэттиэхтээхтэр.
Оҕом эрэ этэҥҥэ буоллар...
Кырбааччылартан биирдэстэрэ улуустааҕы киин балыыһа реанимационнай отделениетыгар үлэлиир эбит. Сарсыныгар бэҕэһээҥҥи быһылаанын умнан, кыыс үлэтигэр кэлбит.
Бу туһунан эмсэҕэлээбит Сардаана маннык кэпсиир:
- Быһылаан буолбут киэһэтигэр миигин тута балыыһаҕа киллэрбиттэрэ. Онтон төрүүр отделениеҕа илдьибиттэрэ. Мин бэйэм туспар буолбакка, сүрэҕим анныгар илдьэ сылдьар кырачаан киһичээним туһугар олус долгуйбутум. Чыычаахпын көмүскээбэтэх буруйдаах курдук санаммытым. Оҕом эрэ этэҥҥэ буоллар диэн саныырым. Аны оҕом кэмин иннинэ тахсаары ыксаппыта. Ол иһин миигин куоракка ыыппыттара. Киһи абарыаҕа, мин балыыһаҕа киирэн сыттахпына, ол кырбааччы кыргыттартан биирдэстэрэ сарсыныгар туох даҕаны буолбатаҕын курдук үлэтигэр кэлбит этэ. Кинини миэхэ киллэрбэтэхтэрэ. Иккиэн иккилии оҕолоох эдэр ийэлэр. Урут хаһан даҕаны алтыспатах кыргыттарым. Билигин оҕом эрэ этэҥҥэ буолуон наада. Билигин 28 нэдиэлэбэр сылдьабын. УЗИ көрдөрөрүнэн, үчүгэй дииллэр даҕаны, доруобуйата хайдаҕа төрөөтөҕүнэ биллэр буоллаҕа дии. Билигин сылдьан эрэ атаҕым тардан кэлэр, түһээн баттатабын. Кырбааччы кыргыттар оннооҕор быыһыы кэлбит кэргэммэр, ийэбэр саба түспүттэрин бүдүк-бадык өйдүүбүн. Улуустааҕы балыыһа төрөтөр отделениетыгар, төрүүр салаатыгар, медицинскэй киин реанимациятын акушер-быраастарыгар миигин уонна күн сирин көрүөхтээх кырачаан киһибин быыһаабыттарыгар махталбын тиэрдэбин.
Таатта улууһун полициятын салайааччыта, подполковник Данил Стручков:
– Билигин бу дьыаланан силиэстийэ барар. Ол күн эмсэҕэлээбит эдэр дьахтар полицияны ыҥырбытыгар үлэһиттэрбит тута тиийбиттэрэ. Буруй төһө ыарахана, экспертизэ кэнниттэн быһаарыллыаҕа. Билиҥҥи туругунан, буруйданааччылар дьиэлэригэр бааллар. «Лайм» кафеҕа өтөр-өтөр ол-бу быһылааннар тахсааччылар. Уоруу, охсуһуу да баар буолааччы. Ол иһин соторутааҕыта видеокамера туруортарбыппыт. Быһылаан кэнниттэн хаһаайыттары кытта кэпсэппиппит. Полиция кэлбэтэҕэ диир сыыһа. Баҕар, хойутаан тиийбит буолуохтарын сөп. Ол эрээри, көмөҕө тиийбиттэрэ.
Түмүк
Талбыттарынан көрүлээн, кыахтара баарынан кырбаан, астыммыт кыргыттар аа-дьуо дьиэлээбиттэр. Сарсыныгар иккис кыыс үлэтигэр кэлэн дьон олоҕун быыһыыр үрүҥ халааттаах аанньал үлэтин толорбутунан барбыт.
Маннык аһыныгаһа суох сидьиҥ быһыы-майгы эдэр ийэлэр икки ардыларыгар тахсара дьиксиннэрэр. Бу кэнниттэн кинилэр хайдах оҕолорун үчүгэйгэ, киһилии сыһыаҥҥа иитиэхтэрэй? Хайдаҕын да иһин, суут-сокуон барыларыгар тэҥ буолуохтаах. Оттон сүрэҕин анныгар кырачаан киһини илдьэ сылдьар Сардаана Сидорова этэҥҥэ чөл, доруобай оҕону төрөтүө дуо? Буруйдаахтар кытаанах эппиэтинэскэ тардыллыахтара дуо? Барытын кэм-кэрдии көрдөрүө.
Интернет ситимин нөҥүө араас сурах-садьык тарҕанар. Буруйданааччылары көмүскэһээччилэр, эмсэҕэлээбит кыыс бэйэтэ эмиэ буруйдаах үһү диэн сурахтар тарҕаналлар. Хайдаҕын да иһин, киһини, буолаары буолан оҕо күүтэр дьахтары маннык кырбыыр. Ийэ буолан баран дьиэлэригэр олорбокко, түүннэри арыгы иһэн баран хаамыталааһын үгүһү этэр дии саныыбын. Буруйдарын билинэн, бырастыы даҕаны гыннарбатах икки ийэ суут-сокуон иннигэр хайаан да туруохтаахтар.
Комментарии
Авторизация на сайте через социальные сети