Мэҥэлэр биир дойдулаахтара Европа чемпиона Василий Егоровы чиэстээтилэр

Атырдьах ыйын 19 күнүгэр Европа чемпиона Василий Егоровы төрөөбүт улууһун дьоно Өлүөнэ эбэ кытылыгар, бириистэҥҥэ эдэрдиин-кырдьаҕастыын мустан арыылаах алаадьынан, уохтаах кымыһынан уруйдуу-айхаллыы көрүстүлэр.


Европа чемпиона Василий Егоровы уонна кини тренерин Артур Пахомовы Аллараа Бэстээххэ Олоҥхо дьиэтигэр уруйдаатылар-айхаллаатылар. Бу күн өрөгөйдөөх кыайыы үөрүүтүн үллэстэ Василий төрөппүттэрэ, бииргэ төрөөбүттэрэ, аймах-билэ дьоно, доҕотторо, кини талааныгар сүгүрүйээччилэр муһуннулар.
‒ Рингэҕэ, бастатан туран, төбөнү үлэлэтиэххэ наада. Утарылаһааччыгын кытта күөн көрсүһүүгэ көннөрү илииҥ, атаҕыҥ күүһүнэн эрэ буолбакка, ааҕан-суоттаан, толкуйдаан киирсиэххин наада, ‒ диэн мындырдык эттэ 21 саастаах эдэр спортсмен.

Оттон Василий ийэтинэн айылҕаттан быһый, сылбырҕа, кытыгырас төрүттэрдээҕин туһунан Хорообут нэһилиэгин баһылыга Валерий Колосов кэпсээтэ.
‒ Вася спортсмен быһыытынан олус үчүгэй иитиилээх, бэрээдэктээх, истинньэҥ, үлэһит, режими тутуһар, эрчиллиини көтүппэт, атыттар курдук кыра да кыайыыттан төбөтө эргийэн талбытынан сылдьыбат. Ити хаачыстыбалара кини киһи быһыытынан кэрэмэһин уонна кыайыыга дьулуурдааҕын, баҕалааҕын туоһулууллар. Төрөппүттэригэр Людмила Иннокентьевнаҕа, Михаил Николаевичка махталым муҥура суох, ‒диэтэ эҕэрдэ тылыгар РФ үтүөлээх тренерэ Артур Пахомов.

Улуус баһылыга Николай Старостин Василий улуус ыччаттарыгар үрдүккэ, сырдыкка угуйар үтүө холобур буоларын эттэ, кини дьоһун кыайыыта улуус спордун сайдыытыгар саҥа саҕахтары арыйыаҕа диэтэ уонна харчынан бириэмийэни туттарда. Тренер Артур Иннокентьевичка уолбутугар сүбэ-ама, дурда-хахха буола сылдьарын иһин махтанабыт диэтэ уонна «Мэҥэ аат» Бочуот кинигэтигэр киллэриллибитин туһунан туоһу суругу туттарда.

Василийга эҕэрдэ тыл маанытын Майатааҕы оҕо-ыччат спортивнай оскуолатын директора Петр Илларионов, Хара нэһилиэгин баһылыга Дария Назарова, спорт ветереннара Анатолий Захаров, Эдуард Местников, «Урожай» уопсастыба бэрэссэдээтэлэ Виталий Пестряков уо.д.а. анаатылар. Бу күн Василий Егоровка «Хара нэһилиэгин бочуоттаах гражданина» аат иҥэрилиннэ.
Биир дойдулаахтара эдэр спортсмеҥҥа аан дойду чемпионатыгар ситиһиилээхтик кыттарыгар баҕа санааларын эттилэр, уһун уочаракка тураннар чемпионтан автограф ыллылар, историческай түгэни өйдүү-саныы сылдьарга диэн бииргэ хаартыскаҕа түһүстүлэр.