- 2014 с. түмүгүнэн өрөспүүбүлүкэтээҕи агропромышленнай куонкурус кыайыылаахтара быһаарылыннылар. Барыта 24 номинация баара, онтон үөрүүлээҕэ диэн, икки номинацияҕа Томпо оройуонун дьоно кыайдылар.
- «Бастыҥ табаһыт» номинацияҕа «Томпо» ТХПК (фактория) эдэр бостууга Григорий Баишев кыайда. 2015 с. тохсунньу 1 күнүгэр кини үлэлиир ыстаадатыгар 1227 таба баара, тугут дьыалабыай тахсыыта 64,3 % уонна улахан табаны иитии 82,3% тэҥнэспитэ. Григорий 26 саастаах, оҕо эрдэҕиттэн инбэлиит. Кооперативка 2006 сылтан үлэлиир. Кини табаһыт ыал оҕото. Аҕата Вениамин Григорьевич сыл ахсын үлэҕэ үрдүк ситиһиилэри көрдөрөр. Кини СР тыатын хаһаайыстыбатын үтүөлээх үлэһитэ. Григорий ийэтэ Айталина Иннокентьевна кооперативка 1985 сылтан үлэлиир, 17 сыл чуум үлэһитэ этэ, билигин специалистыыр. Кини СР тыатын хаһаайыстыбатын туйгуна.
- Агропромышленнай куонкурус бастыҥ сылгыһытынан Анатолий Мандаров буолла. Кини Кириэс Халдьаайы «Сыыдам» ТХПК үлэһитэ. Кооператив 2015 с. тохсунньу 1 күнүнээҕи туругунан 172 сылгылаах, ол иһигэр 92 биэ. Кулун дьыалабыай тахсыыта 2013 сылы кытта тэҥнээтэххэ 9 % үрдээбит уонна 91,3 % буолбут.
- Байаҕантай нэһилиэгэр кэлин сылларга икки 100-түү сүөһү киирэр, биир 50 сүөһү киирэр хотонноро тутулуннулар. Ыҥаа нэһилиэгэр быйыл 100 төбө сүөһү турар хотоно тутуллан бүтүөҕэ. Быйыл Мэҥэ Алдаҥҥа «Чэчир» бааһынай хаһаайыстыба баһылыга Егор Сыромятников 100 сүөһү киирэр хотонун тутууга «Баһыынай хаһаайыстыбалар базаларыгар дьиэ кэргэн сүөһү иитэр фермаларын сайыннарыы» куонкуруска кытынна. Киниэхэ 6 мөл. солк. суумалаах гран биэриэхтэрэ. 3 900 тыһ. солк. федеральнай бюджеттан, 2 100 тыһ. солк. өрөспүүблүкэ бюджетыттан киириэхтэрэ.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети