ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
29 сентября 2015, 13:38

Фанат Бэстиин


Кэлиҥҥи кэмҥэ Саха араадьыйатыгар спортивнай суруналыыс Николай Бястинов комментатор быһыытынан тахсарын үгүс киһи кэтэһэр буолла. Кини күрэхтэһиини сырдатар истиилэ норуокка чугас буолан, спорт эйгэтиттэн ыраах да киһи, тыҥааһыннаах киирсиигэ ураты турукка киирэр.

Саха араадьыйатыгар сэргээн истэр спортивнай суруналыыспытын көрсөн кэпсэтиэх буолбутум ыраатта да, кинини булар уустуктардаах этэ. Наар командировкаларга сылдьар буолара. Соторутааҕыта көрсөн кэпсэтэр түгэн дьэ тосхойдо. Дьэ, онон спортивнай суруналыыс Николай БЯСТИНОВ-Бэстиин туох санаалаах-оноолоох, толкуйдаах ыччат эбитий?

-- Николай,  араас күрэхтэһиилэри сырдата олорон: “Бу түгэҥҥэ миигин Сахам сирэ барыта истэ олорор”, -- диэн санаа охсуллан, долгуйан ылар кэмнээххин дуо?

photoByWidth&id=45774&width=1000

-- Биллэн турар. Быйыл күрэхтэһиилэри быһа эфиринэн ыыппытым төрдүс сыла. Комментатор бэйэтэ турукка киирдэҕинэ эрэ, истээччилэрин наадалаах кэмҥэ күүрдэр, күүркэтэр. Мин -- футбол фанатабын. Онно Италия уонна Испания комментатордара ыытар биэриилэригэр олох бэйэм күрэхтэһэ сылдьар курдук турукка киирэн хаалабын. Кинилэр: ”Го-о-л!!!” диэн хаһыылара эйиигин өссө күүрдэн биэрэргэ дылылар. Арассыыйа комментатордара, онно холоотоххо, бэрт холкутук футбол хаамыытын эрэ комментарийдыыллар. Сөптөөх турукка истээччини эмискэ буолбакка, сыыйа-баайа, холкутук киллэрэҕин. Бастаан буола турар киирсии суолтатын арыйабын. Тустуук бу күрэхтэһиигэ тоҕо хайаан да кыайыахтааҕын, бу ситиһиитэ төрөөбүт өрөспүүбүлүкэтигэр туох оруоллааҕын ыйабын.

-- Кэргэниҥ Виктория эмиэ спорду сырдатар суруналыыс дии. Кини сыанабыла хайдах буолааччыный?

-- Викам спорт эйгэтигэр чугас буолан, спортсмен ис уйулҕатын бэйэтинэн этинэн-хаанынан билэр буоллаҕа. Онон үксүгэр кини мин санаабын өрө көтөҕөр, ситиһиибин табан сыаналыыр. Киһиэхэ үлэтин сыанабыла туохтааҕар да күндү ээ. Олоҕум аргыһа – мин  өйөбүлүм. Онон кынаттанан, быйыл олимпийскай путевка былдьаһыыта буолан, олус элбэхтик айаннаатым, араас күрэхтэһиини сырдаттым.

photoByWidth&id=45775&width=1000

-- Ол айаҥҥын ким толуйда?

-- Айаным ороскуотун спорт министиэристибэтэ уйунар. Урукку өттүгэр наар спонсордары көрдөнөр этим. Сүрүннээн спортсменнар, тустуу фанаттара өйөөччүлэр.

-- Лас-Вегаска оруобуна Виктор Лебедев тустар кэмигэр “харчым бүтэн хаалла” диэн саамай тыҥааһыннаах кэми сырдаппакка хаалбытыҥ дии. Ити комментарийдыыр мүнүүтэҥ харчытын бэйэҥ уйунаҕын дуо?

-- Кэпсэтии мүнүүтэтэ 200 солк. этэ. Комментарийдарбын биэрэр бириэмэм харчытын тустуу ыалдьааччылара бэйэлэрэ төлөөбүттэрэ. Ким хантан ыытарын билбэппин, күн аайы 50-100 солк. киирэ турар этэ. Бэйэм харчыбыттан эмиэ укпутум. Ол суотун “Саха” НКИК салалтатыгар биэрбиппин төлүөхпүт диэбиттэрэ.

-- Сахаларга идэтийбит спорткомментатор олох суох. Эн, бэйэҥ бэлиэтиириҥ курдук, фанат эрэ быһыытынан тус бэйэҥ баҕаҕынан, “баһаалыстаҕа” ким эрэ илиитин-атаҕын манаан кэлэҕин-бараҕын. Туох да күүркэтиитэ суох, кэлиҥҥи кэмҥэ эн дойдуга уонна  омук сиригэр ыытыллар чемпионаттары комментарийдаан, тустууга бэрт улахан интэриэһи үөскэттиҥ. Уопсайынан, бу идэҕэ ханна эмэ үөрэтэллэр дуо?

-- “Спортивнай комментатор” диэн идэ сүрүннээн телевидениеҕэ баар буолааччы. Онтон төлөпүөнүнэн аһаҕас эфиргэ араадьыйаҕа тахсан, күрэхтэһиини тута комментарийдааһын диэн ханна да суох. Саха араадьыйатыгар аан бастаан Ылдьаа Скрябин төлөпүөнүнэн быһа эфиргэ тахсан, интэриэһи тарпыта. Бүгүҥҥү күҥҥэ Арассыыйаҕа Саха араадьыйата эрэ быһа эфиринэн истээччилэригэр күрэхтэһиини тиэрдэр.

photoByWidth&id=45776&width=1000

-- Эйиигин, бука, ким да санаатын баҕатынан эрэ айанныы сылдьар дии санаабат буолуохтаах...

-- Мин “Спорт Якутии” хаһыат үлэһитэбин. Тустуу федерациятыгар да киирсибэппин, спорт министиэристибэтин да үлэһитэ буолбатахпын. “Саха” НКИК каналыгар “Тайм-аут” диэн биэриибин былырыын хамнаһа суох бэйэм баҕа санаабынан ыыппытым. Хата быйылгыттан ыла бу биэриибэр хамнас төлүөх буоллулар. Ону таһынан, ватсаап, интернет нөҥүө спорт сибиэһэй сонуннарын суруйан тарҕатабын. Араас хайысханан үлэлиибин, хаһыатынан эрэ муҥурдаммаппын. Хамнаһым кыра буолан, күрэхтэһиилэргэ ардыгар кредит ылан барааччыбын. Ханна да, туох да хос дуогабарым суох. Баҕа санаам биир – миигин өрөспүүбүлүкэтээҕи Тустуу федерациятын пресс-сулууспатыгар хамнастаах үлэһитинэн ылаллара уонна айаммын, олорор сирбин уйуналлара буоллар. Оччоҕо саха спорда сайдарыгар өссө таһаарыылаахтык үлэлиэм, сүүрүөм-көтүөм этэ. Билигин бу сырыыларбын -- күннээҕи командировкам сууккаҕа төлөбүрүн хаһыатым уйуна сатыыр. Фанат буолан сылдьа сатыыбын да, дьиэлээх-уоттаах киһи наар инник сылдьан үлэлиирим сатаммат дьыала. Мин санаабар, дьоммор-сэргэбэр – өрөспүүбүлүкэм олохтоохторугар туһалаах киһи буоларбын толору дакаастаатым дии саныыбын.

Быйыл ыал буолбуппар ыалдьааччылар уу харчынан 35 тыһ. солк. уу харчынан биэрэн, бэлэх оҥорбуттара. Ол онно санаабытым, кырдьык да, дьоммор наадалаах эбиппин диэн. Оттон аан дойду чемпионатыгар барарбар суотабай төлөпүөммэр 20-тэн тахса тыһ. солк. киирбитэ. Кимтэн киирэрэ биллибэт. Онон, түгэнинэн туһанан, тустуу фанаттарыгар ис сүрэхпиттэн барҕа махталбын тиэрдэбин. Бу дьон суоҕа буоллар мин кэпсиирим да биллибэт этэ.

--  Аны ханна тиийэн, тугу комментарийдаары сылдьаҕыный?

-- Олимпийскай турнирдар буолаары тураллар. Ону барытын Сахам сирин олохтоохторугар тиэрдээри гынабын. Олимпиадаҕа дылы олох аҕыйах кэм хаалла. Мин санаабар, спортсменнарга көмөлөһөр курдукпун. Мин тиийэн комментарийдаатахпына, үксүгэр бары мэтээллээх кэлэллэр. Биир да комментарийдаабыт күрэхтэһиибиттэн кураанах ытыспытын соттон кэлбэтэхпит. Интэриэһинэйэ баар, чуолаан Лебедев иранеһы кытта киирсэрин эрэ кэпсээбэтэҕим. Ол онно кини хотторон хаалбыта.

-- Уолаттар да сэмээр эйиигин кэтэһэллэрэ буолуо?

-- Тиийдэхпинэ, бу киирсиибитин өрөспүүбүлүкэ барыта истэр диэн, эппиэтинэстэрэ үрдүүр курдук. Холобура, соторутааҕыта атырдьах ыйыгар бокска Европа чемпионатыгар бара сылдьыбытым. Бу боксаны аан бастакы комментарийдааһыным. Онно Василий Егоров Европа чемпионунан буолбута. Бу күрэхтэһиигэ эдэр киһи биллэ өрө тардыммыт курдуга. Бэйэбэр кэлэн: “Эн кэлбитиҥ үчүгэйэ сүрдээх. Киһи аһыллан туран киирсэр”, -- диэн махтаммыта.

-- Атын омуктарга эн курдук комментатордар бааллар дуо?

-- Саха сириттэн мин соҕотохпун эрэ. Арассыыйа атын спортсменнара миигин көрө үөрэнэн хаалбыттар. “Сахалар комментатордара эмиэ кэлбиккин дуу?” – диэбиттии көрөллөр.

-- Туһугар, саха “Левитана” эбиккин дии. Оттон кинилэри эмиэ сырдатар туһуттан нууччалыы кэпсиэххин баҕарбаккын дуо?

-- Оо, ити баҕа санаам ээ! Арассыыйа бары истэрин курдук нууччалыы комментарийдаабыт киһи диэн. Сахалыы кэпсиирбин Осетия, Дагестан фанаттара истибит буолаллар. Саатар финаллары нууччалыы кэпсиэҥ этэ диэнкөрдөһөөччүлэр. Тустуук спортсменнары ким туох ситиһиилээҕин, син эмиэ сахалар курдук, ааҕа билэр буоллаҕым дии. Биллэн турар, интэриэһи тардыам этэ.

photoByWidth&id=45777&width=1000

... Баар суох спортивнай комментаторбыт Николай Бястинов-Бэстиин баҕа санаалара болҕомтоҕо ылыллан, тустаах өйөбүл оҥоһуллара буоллар. Спортивнай суруналыыс кэпсэтиибит түмүгэр: “Хомойорум диэн, наһаа элбэх сиргэ араас күрэхтэһиигэ  сылдьыбыппыттан, бу сырыыларым туһунан туох да  өйдөбүнньүк хаалбатах. Онон Лас-Вегаска күрэхтэһии түмүгүнэн анал брошюра-кинигэ таһаараары сылдьабын. Онно бэйэм кэтээн көрүүлэрбин, суоллааҕы бэлиэтээһиннэрбин киллэриэм”, -- диэн санаатын үллэстибитин биир бэйэм олус сэргии иһиттим. Онон аны комментарийдаабыт күрэхтэһиилэрин Бэстиин кинигэ гынан таһаарарын күүтэбит.  

При частичном или полном использовании материалов гиперссылка на сайт ysia.ru обязательна.
Категория: Общество Просмотров: 652 Источник: ЯСИА Автор: Елена Потоцкая Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ