Аркадий Гурьев, “2-с Лүүчүн нэһилиэгэ” МТ баһылыга:
- Биһиги нэһилиэкпит арыгылааһыны урукуттан утарар. Ону прокуратура: “Эһиги боломуочуйаҕыт буолбатах, дьон быраабын кэһимэҥ”, -- диэн баччааҥҥа диэри бобон олорбута. Хата ааспыт сыл бүтүүтэ Ил Дархан Е.А.Борисов “Арыгыны хааччахтыыр туһунан” сокуонун барыла тахсыбыта, онно “Нэһилиэк бэрэстэбиитэллээх уоргана арыгы атыытын тохтотор быһаарыыны ылыннаҕына, арыгы атыыта бобуллар” диэни көрөөт, тохсунньуга нэһилиэк бэрэстэбиитэллээх уорганыгар дьүүллэһэммит арыгы атыытын тохтотор туһунан быһаарыыны ылыммыппыт. Сессия быһаарыытын тута Ил Түмэн көрүүтүгэр киллэрбиппит, кулун тутарга диэри сокуоҥҥа сөп түбэһэр гына оҥорбуппут. Сокуон Ил Түмэҥҥэ көрүллэр күнүгэр бэйэм тиийэн тыл эппитим. Дьиҥэр, сокуон ылылларыгар үс ааҕыыны ааһыахтаах, ону депутаттар 100 % өйөөн, биир ааҕыынан ааспыта. Уонча хонук иһигэр Ил Дархан илии баттаабыта.
Онон муус устартан Мастаахха “Сайылык” ХЭТ, “Кэскил” ХЭТ арыгыны атыылыыллара тохтотуллан турар. Дьон өйө-санаата уларыйда, уулуссаҕа бытыылка ыһыллыбат, итирик, холуочук киһи хаамсыбат буолла. Ардахтаах сайын да буоллар, оппут былаанын 100 % толордубут. Бу барыта оҕолорбут-ыччаппыт туһугар оҥоһуллар, түмүгэ хас да сылынан биллиэ буоллаҕа. Балаҕан ыйын хас иккис бээтинсэтин Е.А.Борисов Чөл өйдөөх-санаалаах сылдьыы күнүнэн биллэрбитин биһиги нэһилиэк үөрэ-көтө өйүүбүт, арыгы атыытын тохтотуон баҕарар нэһилиэктэргэ докумуону оҥорсон көмөлөһөргө бэлэммит.
Егор Павлов, “Куокуй нэһилиэгэ” МТ баһылыга:
- Мин 2012 с. алтынньытыгар нэһилиэк баһылыгынан талыллаат да, сэтинньигэ арыгы атыытын хаарчахтыырга анаммыт улахан мунньаҕы тэрийэн ыыппытым. Мустубут дьон 80 % тохтотуохха диэн куоластаабыттара. Ол мунньах быһаарыытыгар олоҕуран уураах таһааран, арыгы атыытын тохтото сылдьыбытым. Ону потребобществолар прокуратураҕа үҥсэн син биир атыылана турбута.
Быйыл Арыгыны хааччахтыыр сокуон ылыллаатын кытта урукку мунньахпыт боротокуолун сөргүтэн, Ил Түмэҥҥэ киллэрбиппит. От ыйын саҕаланыыта Ил Түмэн сессиятыгар көрүүгэ киирбитэ, 17-с чыыһылаҕа Куокуйга арыгы атыытын бобор туһунан дьаһал тахсыбыта.
Билигин бөһүөлэккэ уу-чуумпу, арыгы суоҕа наһаа да үчүгэй эбит диэн дьон-сэргэ үөрэр. Дьон бэйэлэригэр сөптөөх дьарыгы булуннулар: бултууллар, балыктыыллар, уһаналлар. Оппут хаһааҥҥытааҕар да эрдэ бүттэ. Аны арыгыны тохтоппуппутунан сибээстээн, Спорт министиэристибэтэ кулуупка спортивнай инвентары, тренажердары биэрдэ. Онон чөл олоххо тардыһарга өссө биир хардыы оҥоһулунна диэн үөрэбит.
Владимир Эверстов, Лүксүгүннээҕи общественнай сэбиэт бэрэссэдээтэлэ:
- Быйыл Лүксүгүн олохтоохторо уопсай мунньах тэрийэн, арыгы атыытын тохтотор туһунан уураах ылыммыппыт. Мунньах боротокуолун Арыктаахха олохтоох дьаһалта баһылыгар В.П.Ноговицыҥҥа ыыппыппыт. Кэлин билбиппит мунньахпыт быһаарыыта олохтоох депутаттар сессияларыгар бигэргэниэхтээх эбит, онон арыгы атыытын тохтотор дьыалабыт билиҥҥитэ олоххо киирэ илик. Кэлин олохтоох депутаттар сессияларыгар киллэрэн бигэргэппиппит. Баһылыкпыт Ил Түмэҥҥэ баран хаттаан көмүскүөхтээх.
Лүксүгүн нэһилиэнньэтэ кыра, сүүсчэкэ быыбардааччылаах. Биһиги курдук кыра нэһиэлэккэ оскуола наһаа наадалаах. Билигин оҕо-уруу элбээн эрэр диэн үөрэ бэлиэтиибит, ол иһин баҕадьалар, батамайдар курдук оскуола-уһуйаан тутуутун туруорса сылдьабыт. Хомойуох иһин, доллар куурса хамсыы турарынан бырайыакпыт сыаната үллэн таҕыста. Хантан үбү-харчыны булабыт диэн ол кыһалҕатыгар сылдьабыт. Саҥа оскуолалаах, арыгы атыыламмат, чөл олохтоох дойдуга ыччаппыт доруобай, үөрэхтээх буола улааттын, дьиэ кэргэн тэриннин диэн ол туһугар күннэтэ сыралаһабыт. Нэһилиэнньэ да, хаһан арыгы атыыта тохтотулларын кэтэһэр. Биһиги хайаан да урукку чөл олохпутун төннөрүөхпүт.
Комментарии
Авторизация на сайте через социальные сети