ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
23 июня 2015, 15:44

Олоҥхо ыһыаҕа – 2015: “Тоҕус Томтор оонньуулара”


Чурапчыбыт сиригэр “Тоҕус Томтор” оонньуулара Саха сиригэр мас тардыһыыга XX-с үйэ бастыҥ спортсмена, “Мистер Норд” анал аат хаһаайына, Чурапчы улууһун бочуоттаах попечителэ Степан Алексеев сырдык кэриэһигэр иккис төгүлүн ыытылынна.

photoByWidth&id=37611&width=1000

Дыгын оонньууларын» сэттэ төгүллээх чемпиона Уйбаан Белолюбскай үс сыллаах тохтобул кэнниттэн Олоҥхо ыһыаҕын түһүлгэтигэр тахсан, дьону-сэргэни өссө төгүл үөртэ уонна аан дойдуга ханна даҕаны суох чурапчылар “Тоҕус Томтор” курдук уустук оонньууларыгар утарсааччыларын сабырыйан, муҥутуур кыайыылааҕынан ааттанна. Иккис миэстэҕэ Уйбаан Белолюбскай үөрэнээччитэ, Сунтаар Кутанатын буулаҕа бухатыыра Рустам Ксенофонтов таҕыста. Үһүс бочуоттаах миэстэни Хаҥалас быһыйа, атах оонньуутугар рекордсмен Егор Филиппов ылла.

Онон Маҕаайы алааһын түһүлгэтиттэн Уйбаан Белолюбскай сабыс-саҥа “Нива” массыынанан Дьокуускай куоракка айанныы турда. Уопсайа спортивнай күрэхтэһиилэртэн 12-с массыынатын миинэн барааһына буолла.

Олоҥхо ыһыаҕар кэлии эрдэттэн былааҥҥа баара, оттон “Тоҕус Томтор оонньуутугар” кыттарга аҕыйах хонук иһигэр быһаарыммытым, испэр “Кыттыахха сөп бөҕө буоллаҕа” диэн санаанан салайтаран киирсэргэ сананным. Ыһыах эрэ бириэмэтигэр буолар ураты туругу, дьон-сэргэ күрэхтэһии бириэмэтигэр ыһыытын-хаһыытын сүрдээҕин ахтыбыт эбиппин, ыһыах диэн тугун билиэхпин баҕарбытым. Манна кытта кэлбит күрэхтэһэр уолаттарынан сүрдээҕин киэн туттабын, бары маладьыастар уонна мин туспар ыалдьыбыт бары көрөөччүлэргэ дириҥ махталбын тиэрдэбин,” - диэн Уйбаан Белолюбскай бэрт кылгастык эттэ.

photoByWidth&id=37612&width=1000

Уйбаан тоҕус түһүмэхтэн хапсаҕай көрүҥэр олус чаҕылхайдык бастаата. Маны таһынан Мэҥэ-Хаҥалас бөҕөһүн Айсен Спиридоновы бэлиэтээн ааһыахха сөп. Төһө даҕаны уҥа илиитин эчэппитин үрдүнэн, утарсааччыларын барыларын бэрт сымсатык атахтаан охтортоото, Уйбаан Белолюбскайга сэрэтиинэн хоттордо.

Хаҥалас быһыйа, атах оонньуутугар спорт маастара Егор Филиппов “Тоҕус туос куобах” ыстаҥа көрүҥэр соҕотох маҥнайгы холонуутугар икки атах хаһан даҕаны ыстанан тиийбэтэх, үстүү миэтэрэ тэйиччи сытар туос мастары тоҕуста кыырайа көтөн, 32 миэтэрэ 21 сантиметры түһэн, рекорд олохтоото.

Күрэхтэһээччилэртэн саамай үрдүк уҥуохтаахтара уонна ыарахан ыйааһыннаахтара Рустам Ксенофонтов “Бэрэбинэни көтөҕүү” түһүмэҕэр 158 миэтэрэни илдьэн бастаан таҕыста. Бу инчэҕэй тиит мас ыйааһына 115 киилэҕэ тэҥнэстэ, ол да иһин буолуо сорох кыттааччылар маһы өндөтөн даҕаны көрбөтүлэр. Рустам уопсайа 9 көрүҥҥэ барытыгар ситиһиилээхтик кыттан, иккис миэстэни ылары ситистэ. Холобура, “Тоҕус туос куобах” ыстаҥаҕа бэйэтин ыйааһына 112 киилэтин үрдүнэн, 27 миэтэрэ 76 сантиметры ойон, иккис буолла.

Күрэхтэһии былаһын тухары улахан утарсыыны Уус-Алдантан Михаил Гоголев оҥордо, маҥнайгы түөрт түһүмэх түмүктэринэн кыайыыга олус чугас сылдьыбыта. Маны таһынан интэриэһинэй киирсиилэри Горнайтан Дьулустаан Ноговицын, Тааттаттан Виктор Докалов уонна Нам улууһуттан Антон Тойтонов көрдөрдүлэр.

С.С. Алексеев аймахтарыттан бииргэ төрөөбүт эдьиийэ П.С. Алексеева мас тардыһыы күрэҕэр бастаабыт Виктор Докаловка анал бирииһи туттарда.

Онон Олоҥхобут ыһыаҕын биир сүрүннүүр күрэҕин “Тоҕус Томтор оонньууларын” көрбүт дьон чаҕылхай, умнуллубат түгэннэрдээх киирсиилэри өр кэмҥэ кэпсэл оҥосто сылдьыахтара, онтон кыттыыны ылбыт уолаттар Чурапчы улууһугар ыытыллыбыт IX-с Олоҥхо ыһыаҕар Уйбаан Белолюбскайы кытары күрэхтэспиппит диэн хойут оҕолоругар, сиэннэригэр кэпсэл оҥосто сылдьыахтара. Уйбаантан инники былааннарын туһунан ыйыппыппытыгар: “Барыта буолуон сөп, ол иһигэр “Дыгын оонньуулара” эмиэ”, - диэн күлэн кэбистэ.

При частичном или полном использовании материалов гиперссылка на сайт ysia.ru обязательна.
Категория: Спорт Просмотров: 705 Источник: ЯСИА Автор: Cемен Жендринскэй Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ