Дьэ онон, ааһан эрэр 2015 сыл ахсынньы 22 күнүгэр Саха Өрөспүүбүлүкэтин бырабыыталыстыбатын 501N-дээх “Саха тылын орфографиятын уонна пунктуациятын быраабылаларын туһунан” уурааҕа таҕыста.
Бу уураах 1, 2, 3, 4 N-дэрдээх сыһыарыылардаах. Холобура, “Сахалыы таба суруйуу быраабылалара” диэн бастакы сыһыарыыга “Тыл олоҕун таба суруйуу”, “Сыһыарыылаах тыллары таба суруйуу”, “Нуччалыы тылы таба суруйуу”, “Сыһыарыылаах тылы таба суруйуу”, “Улахан буукуба суруллуута”, о.д.а. пууннар киирбиттэр.
Бу саҥа быраабылалары билсистэххэ, холобура, аны мантан ыла туораах диибит дуу, туорах дуу, эҥээр диибит дуу, эҥэр дуу, миин дуу, мин дуу, диэн мөккүспэппит. Тыл олоҕун таба суруйуунан – икки аҥыы этиллэр тыл олоҕор уһун аһаҕас суруллар. Ол аата – туораах, эҥээр, аҕабыыт, миин, о.д.а.
Сорох дьон “сааннан ытта”, “быаннан баайда” диир үгэстээх. Аны мантан ыла быраабыланы тутуһабыт: аһаҕас дорҕоонунан бүтэр аат олоҕор эбиллэр туттуу түһүк сыһыарыыта соҕотох н буукубалаах суруллар, ол аата –саанан, быанан, о.д.а.
Нууччалыы тылы таба суруйууга улахан мөккүөр суохха дылы: үксүбүт суруналыыс, устудьуон, тиэмэ диэн суруйбуппут быданнаата. Арай манна, саха тылын сокуонугар дэбигис бэриммэт гроссмейстер, полиграфия, фортепьяно, неолит курдук тыллар олохторо нууччалыы көрүҥүнэн суруллалларын билэр наадалаах. Ол эрээри, кэлин киэҥник тарҕанан сахалыы туттуллар буоллахтарына, сахалыы суруллуохтарын сөп, диэбиттэр тыл үөрэхтээхтэрэ.
Анал ааттары көрүөҕүҥ. Сир-дойду икки тыллаах сахалыы анал ааттара дэпииһэ суох иккиэн улахан буукубаттан суруллаллар, холобур: Орто Халыма, Үөһээ Бүлүү, Ытык Күөл, Мэҥэ Хаҥалас, Амма Наахара, Тулагы Киллэм, Уус Алдан, о.д.а.
Ити курдук, сахалыы таба суруйуу, сахалыы сурук бэлиэтин быраабылаларыгар балачча үгүс саҥа киирии баар.
Ааҕыаҕыҥ, тутуһуоҕуҥ, сахалыы бары таба суруйуоҕуҥ.
Комментарии
Авторизация на сайте через социальные сети