Айар үлэһиттэр ортолоругар “Саха сирэ” хаһыат ырытааччыта, бэчээт туйгуна Надежда Егорова-Намылы аата эмиэ дорҕоонноохтук ааттанна. Надежда Егорова биир эмиэ ситиһиитин туоһутунан кини “Түмүктээх суруйуу иһин” диэн өрөспүүбүлүкэ суруналыыстарын Сойууһун бириэмийэтин лауреата буолар. Бу дьоһуннаах бочуоттаах аатын талааннаах суруналыыс аны кинигэ суруйуутун алыбар ылларан эрэринэн дакаастаан эрэр. Ол курдук, Надежда Егорова “Намылы” диэн бэйэтигэр олус барсар нарын псевдонимы ылынан “Дьахтар абылыыр айылгыта” диэн бастакы кинигэтинэн суруйааччы айар ыллыгар үктэммитэ. Оттон “Бэчээт тиэргэнэ” тэрээһиҥҥэ кини аны буруолуу сылдьар “Сэһэргээ, үрүҥ халааттаах аанньалым” диэн иккис кинигэтин ааҕааччыларыгар билиһиннэрдэ. Надежда Егорова-Намылы бу кинигэтигэр кэнники сылларга ситиһиилээх айар үлэтигэр үрдэлинэн буолбут тапталлаах “Саха сирэ” хаһыатыгар уонна өрөспүүбүлүкэ сурунаалларыгар тахсыбыт матырыйааллара киирдилэр. Өрөспүүбүлүкэ эмчиттэрэ суруналыыһы кытта атах тэпсэн олорон, санааларын аһаҕастык үллэстиилэрэ, үлэлэрин уустук уонна ситиһиилээх өрүттэрин арыйыылара, дьоҥҥо-сэргэҕэ туһалаах сүбэлэрэ ааҕааччы киэҥ араҥатыгар ананнылар. Манна өрөспүүбүлүкэҕэ медицинэ сайдыытыгар дьоһуннаах кылааттарын киллэрбит бары миниистирдэри, быраастары, сиэстэрэлэри уонна санитаркалары кытта кэпсэтиилэри – киһи аахтар ааҕа олоруон курдук. Эмчиттэргэ анаммыт бу саҥа фундаментальнай кинигэни үгүс ааҕааччы сэргииригэр саарбахтаабаккын.
-- Надежда Парфеньевна хас биирдии миниистири, бырааһы уонна сиэстэрэни кытта тус кэпсэтэн баран, ханан эрэ очерк, ханан эрэ мэтириэти ойуулааһын курдук уус-ураннык көрдөбүтэ, кинигэҕэ олус сонуннук көстүбүт, -- диэн бэлиэтээтэ кинигэни билиһиннэрии түгэнигэр медицинскэй наука кандидата, СӨ култууратын үтүөлээх үлэһитэ Виталий Андросов. Оттон “Сэһэргээ, үрүҥ халааттаах аанньалым” кинигэ аан тылын суруйуутун Виталий Тимофеевич: “Айар куттаах Надежда Егорова-Намылы кэнэҕэһин, баҕар, бу дьоһуннаах суруйууларыгар олоҕуран, өссө кэҥэтэн-сайыннаран, араас хабааннаах сэһэни, арамааны да суруйуон сөп эбитдиэн сыаналаатым”, -- диэн түмүктүүр.
Биһиги биир идэлээхпитигэр НадеждаЕгороваҕа-Намылыга эмиэ маннык баҕа санааны этэн туран: “Эн айар үлэҥ -- сарсыҥҥылаах. Онон бүгүҥҥүҥ курдук кинигэ суруйар айар үлэ алыбар хорутуулаахтык ылсан ис!” -- диэн алҕаатахпыт буоллун!
Комментарии
Авторизация на сайте через социальные сети