Быйыл саас ынах-сүөһүнү көрөргө саҥа хотон тутар наадатын туһунан нэһилиэк мунньаҕар сүбэлэспиттэр. Этиини биир киһи курдук өйөөн, салайааччынан Бороҕон нэһилиэгин төрүт олохтооҕо Владимир Фомины талбыттар. Владимир Фомин нэһилиэк саҥа баһылыга Андрей Иванов сүбэтинэн Граҥҥа кыттан, балтараа мөлүйүөнү ылан, саҥа хотон туппуттар.
Билиҥҥитэ үс ыал кыттыһан, 52 төбөнү кыстатан үлэлии-хамсыы сылдьалларыгар түбэстибит. Хаһаайын Владимир Фомин соҕотоҕун буолбакка, хотон тутуутугар нэһилиэк бары турунан күргүөмүнэн үлэлээбиттэрин туһунан кэпсиир:
– Хотону уонна сыһыары тутууну убайбыт Николай Иванов сүүрэн-көтөн, көҕүлээн олохтоох уолаттар туттулар. Сыһыары тутуубут үлэһиттэр сынньаналларыгар аналлаах. 52 төбөттөн 22-тэ – бэйэм сүөһүм. Соторутааҕыта Сыдыбылтан 6 племенной сүөһүнү атыылаһан аҕаллым.
Дьиҥэр, ситэ-хото бүтэрэ иликпит. Хаар түспүтүн кэннэ ыксаан, сүөһүлэрбитин хотоҥҥо киллэрдибит. Уоппут тардылла илик, ирдиир докумуоннара элбэҕэ бэрт, онно сүүрүөххэ-көтүөххэ наада. Өссө оһох туруоруохтаахпыт. Ол да буоллар, кыһалҕалар бааллар диэн олоруохпут дуо, төһө бэлэммитинэн кыстыкка киирдибит.
Нэһилиэкпит баһылыга Андрей Иванов уонна улуус дьаһалтата улахан көмөнү оҥордулар. Сүөһүлэрбитин эспэккэ, ыалынан кыттыһан көрөрбүт, ынах сүөһүнү элбэтэрбит наадалаах буоллаҕа. Хотон киэҥ-куоҥ буолара үчүгэй, төрүөхпүт эбиллиэ турдаҕа. Эт-үүт бородууксуйатын «Сыа Бүлүү» арыы сыаҕар туттарар былааннаахпыт.
Инникитин сүөһү көрүүтүгэр эдэр дьон ылсара буоллар, үлэбит-хамнаспыт кэскиллээх буолуо этэ. Биһиги курдук дьон сааспытын баттаһа үлэлээн-хамсаан бөҕө буоллаҕа. Ыарахан үлэттэн чаҕыйбаппын. Дьокуускайга Грант ыла сылдьан көрдөхпүнэ, тыа хаһаайыстыбатын үлэтин сөргүтэр, ынах-сүөһүнү көрөн дохуот киллэриниэн баҕалаах эдэр дьон элбээбитин олус сэргии көрбүтүм. Куораттан чугас улуустар ыччаттара, сүүрбэлэрин эрэ ааспыт эдэр уолаттар-кыргыттар тыа хаһаайыстыбатыгар үлэлиир баҕалаахтарын көрөн, тыа сирэ олус эстэ илик, инники кэскиллээх эбит диэн эрэх-турах сананан кэлбитим.
Владимир Михайлович быйыл өссө «Туймаада-лизинтэн» «Беларусь» тыраахтар атыылаһан үлэтэ-хамнаһа чэпчээбитин, отун бэйэтэ тиэнэрин туһунан астына этэр.
Кэрэ айылҕалаах, ып-ыраас уулаах, кумах сааллардаах Таҥара үрэх элгээнигэр олорор бороҕоннор санаалара бөҕөх. Төрүт олохтоох Зоя Николаевна Семенова эмиэ туспа хотон туттан, ынах-сүөһүнү элбэтэр баҕалаах. Быйыл сүөһүлэрин Владимир Фомин хотонугар кыстатан эрэр. Зоя Николаевна кыһыҥҥы теплицатын оҥосто, ситэрэ-хоторо сылдьар. Ити курдук, бэйэтэ агро-оскуолалаах, тыа хаһаайыстыбатыгар аналлаах кэккэ базалардаах, оттуур ходуһаларынан тутахсыйбатах төрүт сир Бороҕон дьоно бэйэ амтаннаах аһын дэлэтиигэ туруммуттара көстөр.
Комментарии
Авторизация на сайте через социальные сети