Судаарыстыбаннай былаах гиэрбэни уонна гимни тэҥэ дойдубут чиэһин, көҥүлүн, тутулуга суоҕун, суверенитетын туоһулуур.
Россия былааҕын күнэ – судаарыстыбабыт бэлиэлэрэ дойду уонна уопсастыба олоҕор ылар миэстэлэрин уонна суолталарын кэрэһилиир бырааһынньык быһыытынан история тулхадыйбат үгэстэрин уонна көлүөнэлэр быстыспат ситимнэрин бигэргэтэр, патриотическай өйү-санааны бөҕөргөтөр, Россияны кыахтаах, тэтимнээхтик сайдар судаарыстыба оҥорорго элбэх араас омуктаах норуоту сомоҕолуур, дойдуга тапталы уонна ытыктабылы иҥэрэр.
Биһиги өрөспүүбүлүкэбит олохтоохторо Аҕа дойдубут силигилии сайдарыгар, күүһэ-уоҕа барҕарарыгар күргүөмнээх үлэнэн уонна гражданин быһыытынан уопсастыба олоҕор көхтөөхтүк кыттан дьоһун кылааттарын киллэрэллэр. Аныгы кэм туруорар киэҥ соруктарын торумнааһыҥҥа уонна толорууга бары биир санаанан салайтаран уйгубутун уһансабыт, кэскилбитин түстүүбүт. Сахабыт сирин дьоно-сэргэтэ дойдубутугар, республикабытыгар бигэ туруктаах, эйэлээх олох чэчириирин туһугар бэйэтиттэн тутулуктааҕы барытын оҥоруо, ситиһиэ диэн эрэллээхпит.
Күндү Саха сирин олохтоохторо уонна ыалдьыттара! Саха Өрөспүүбүлүкэтин парламена эһиэхэ түмсүүлээх буолууну, чиргэл доруобуйаны, дьолу-соргуну, төрөөбүт дойдубут туһугар таһаарыылаах үлэни, үтүө саҕалааһыннарга табыллыыны баҕарар. Бүттүүн сомоҕолоһуубут бэлиэтэ – Россиябыт былааҕа модун державабыт кыаҕын уонна күүһүн көрдөрөн күөрэччи тэлимнээтин!
Саха Өрөспүүбүлүкэтин Судаарыстыбаннай Мунньаҕа (Ил Түмэн)
Комментарии
Авторизация на сайте через социальные сети