Кириэс Халдьаайыга кэтэх хаһаайыстыбаларга анаммыт тэрээһин буолла

Кириэс Халдьаайыга "Идэһэ" бырааһынньык буолла. Манна Байаҕантай нэһилиэгин, Ударнигы уонна Арыы Толоону киллэрэн туран, сэттэ түөлбэтэ кыттыыны ыллылар.

Тэрээһин сыалынан кэтэх хаһаайыстыбалар суолталарын үрдэтии, өйөөһүн буолар. Эҕэрдэ тыллары оройуон баһылыгын социальнай боппуруостарга солбуйааччы Новогородов Петр, СР Ил Түмэнин депутата Саввин Дмитрий, Байаҕантай нэһилиэгин баһылыга Степанов Яков эттилэр.

Бырааһынньык күн үрдүк наҕараадалар туттарылыннылар. "СР тыатын хаһаайыстыбатын туйгуна" ааты сылгыны үөрдээн иитэр "Сыыдам" ТХПК салайааччыта Анатолий Мандаров, Иван Колесов (киниэхэ "Сахабулт" 5 тыһ. солк. сертификатын туттардылар), СР Тыатын хаһаайыстыбатын министерствотын Бочуотунай грамотатынан Кириэс Халдьаайытааҕы бэтэринээр учаастагын сэбиэдиссэйэ Розалия Атакова, "СР тыатын хаһаайыстыбатын бэтэрээнэ" бэлиэни Анна Атакова уонна Юрий Монастырев, СР культуратын үтүөлээх үлэһитин үрдүк аатын Байаҕантай библиотекатын сэбиэдиссэйэ Лариса Холмогорова, СР үөрэҕириитин үтүөлээх үлэһитин аатын Кириэс Халдьаайы интернатын сэбиэдиссэйэ Сахасталина Колесова, "Гражданскай килбиэн" бэлиэни Арыы Толоон сүрүн оскуолатын учуутала Владимир Тимофеев ыллылар. Оройуон баһылыгын грамоталара Эйэмир Охлопковка (киниэхэ саамай элбэх ынах сүөһү - 21, ол иһиттэн 9-һа ынах, баар), Констанитн Кучутовка (саамай элбэх сылгылаах - 22, онтон биэтэ - 5), Михаил Охлопковка - сүөһү төбөтүн ахсаана улаатыытын иһин (ааспыт сыллаахха - 8, быйыл 17 төбө буолбут), Василий Матаркиҥҥа - бөрөнү бултааһыҥҥа тэрийэр үлэтин иһин туттарылыннылар.

Кэтэх хаһаайыстыбалаах ыаллар уонна түөлбэлэр ортолоругар куонкурустар ыытылыннылар. Тэрээһиҥҥэ олохтоохтор бэлэмнэммиттэр. Ол туоһутунан элбэх хаартыскалардаах стендэлэр, декорациялар, бүлүүдэлэри уонна остуоллары бэлэмнээһин буолаллар. Туспа стендэҕэ Герой Ф.М. Охлопков аатынан сопхуос урукку өттүгэр ылбыт знамялара уонна вымпеллара туруоруллубуттар. Олору сопхуос үлэһиттэрин күүрээннээх үлэлэрин туһунан кэпсиир хаартыскалар байыталлар.
Түөлбэлэр олохтоохторо үксүлэрэ араас быһыылаах уонна өҥнөөх сахалыы көстүүмнэри кэппиттэр. Остуол хотойорунан араас бүлүүдэлэр, булт уонна балык арааһа тардыллыбыттар. Быартан бүлүүдэ оҥорууга куонкурус буолла. Бүлүүдэлэр ахсааннара 40-тан 90-ҥа тиийэ баар. Манна үгэс буолбут алаадьыттан, шашлыктан, тортан ураты роллар, кесктэр, пиццалар уо.д.а. толору бааллар. "Алаас" түөлбэ бэрэстэбиитэллэрэ бүлүүдэлэр рецептэрэ суруллубут буклеттары түҥэттилэр. Элбэх киһи ити астары боруобалаатылар, ордук жюри чилиэннэрэ хатаҕаланнылар.
Ыаллар 6 түһүмэҕинэн күрэхтэстилэр. Визиткаларын билиһиннэрдилэр, кэтэх хаһаайыстыбаларын, үлэни хайдах тэрийбиттэрин туһунан кэпсээтилэр, бэйэлэрин илиилэринэн оҥорбут бүлүүдэлэрин, истиэнэ хаһыаттарын жюри дьүүлүгэр таһаардылар. Ыал аҕа баһылыктара сэппэрээтэри үрэйиигэ уонна хомуйууга күрэхтэстилэр.

Кыттааччылары аймахтара эрэ буолбакка, түөлбэлэр олохтоохторо бары өйөөтүлэр. Ол түмүгэр жюри кыайыылаахтарынан Аграфена уонна Эйэмир Охлопковтарга ааттаата. Кинилэр икки уолу уонна икки кыыһы иитэллэр. Ыал аҕа баһылыга суоппар идэлээх, ийэлэрэ - английскай тыл учуутала. Кинилэр кэтэх хаһаайыстыбанан Аграфена төрөппүттэрин кытта дьарыктаммыттара.
Иккис миэстэни Антонина уонна Дмитрий Мегиновтар дьиэ кэргэттэрэ ыллылар. Бу ыаллар "Силээн" бааһынай хаһаайыстыбата (салайааччы С.Г. Атаков) уонна оройуон тыатын хаһаайыстыбатын управлениета (салайааччы Е.П. Андросов) бириис быһыытынан туруорбут биирдии убаһаларын ылыахтара.
Үһүс миэстэҕэ Сардаана уонна Семен Атаковтар таҕыстылар. Кинилэргэ "Хаадьыма" (салайааччы Николай Тополин) бааһынай хаһаайыстыбаттан сибиинньэ оҕото тигистэ. "Кириэс Халдьаайы" ТХПК (Т.Т. Охлопков) уонна "Бигэ" бааһынай хаһаайыстыба (В.Н. Харлапмьев) биирдии торбоһу, "Илгэ" ТХПК (А.Н. Кузьмин) икки дьааһык ынах арыытын туруордулар.

"Саамай эмис сүөһү этэ" уонна "Саамай эмис сылгы этэ" номинацияларга Ударниктан Николай Келин дьиэ кэргэнэ кыайда. "Саамай эмис сибиинньэ этэ" - үлэ бэтэрээнэ Роман Балановка (Арыы Толоон), "Саамай улахан собо" - Семен Григорьевка тигистилэр.
Түөлбэлэр ортолоругар "Үрдэл" (Луиза Попова) кыайда, иккис миэстэҕэ "Алаас" түөлбэ (Анна Колодезникова), үһүс миэстэҕэ - "Арыы Толоон" түөлбэ (Варвара Винокурова) таҕыстылар. Кинилэргэ нэһилиэк дьаһалтатын аатыттан 10, 7 тыһ. уонна 5 тыһ. солк. харчынан бириэмийэлэр туттарылыннылар. Атын түөлбэлэргэ 3-түү тыһ. солк. бириэмийэлэр бэрилиннилэр.
Бу тэрээһиҥҥэ нэһилиэк дьонун биллибэтэх дьоҕурдара көстөн таҕыстылар. Ким эрэ ыллаата, тойуктаата, ким эрэ үҥкүүлээтэ, ким эрэ инсценировкаҕа кытынна. Үөрүүлээҕэ диэн, эр дьон бэйэлэрин кэрэ аҥаардарыттан хаалсыбатылар, элбэх ыччат сырытта, микрофоҥҥа нэһиилэ өндөйөн тиийэр кырачааннар бэйэлэрин тустарынан кэпсээтилэр.