Ол курдук, ыччаты поэзия кэрэ эйгэтигэр умсугутар сыаллаах библиотека иһинэн үлэлиир “Санаа ситимэ” поэтическай кулууп биэс сыллаах үлэтин түмүгүн көрдөрөр “Весенний поэтический коктейль” тэрээһин, “Айылҕа алыптаах иэйиитэ” республикатааҕы литературнай-экологическай десант, “Поэзия, эн кэрэҕин да...” саха поэттарын уонна “Хара тыам барахсан” поэт П.Н. Тобуруокап айымньыларынан литературнай дьүһүйүүлэр дьон-сэргэ сэҥээриитин ылла.
Библиотека методическай отделын бэлэмнээһининэн, “К вершине человеческой мудрости – через литературу” литература туһунан викториналар, бэргэн этиилэр, хоһооннор (И.И.Аргунова.), “Мин саллаат этим ол Кыайыылаах кыргыска”. Үөһээ Бүлүү буойун суруйааччыларын тустарынан” (Буртахова Ев.Ив.) көмө босуобуйалара таҕыстылар.
Дьокуускай куоракка Николай Островскай аатынан библиотекаҕа харахтарынан инбэлиит ааҕааччыларга анаан “Лоокуут уонна Ньургуһун” айымньынан тифло-спектаклы туруоруулара биир сонун саҕалааһын быһыытынан сыаналанна.
Боотулуу нэһилиэгэр “Ийэ тыл биһигэ – Боотулуу, Тыл эмчитэ – Дапсы” литература тыл миҥэлээх диэн билими кытта олоҕу ситимниир кэмпириэнсийэ Боотулууга тэрилиннэ. Бу улахан тэрээһиҥҥэ ХИФУ саха тылын институтун директора Г.Г.Филиппов, философия билимин директора А.С.Саввинов, тыл билимин доктора, профессор И.Е. Алексеев-Хомус Уйбаан, историческай наука доктора Н.Д. Архипов кыттыыны ылан, саха тыла инники сайдыытын туһунан сүрүн дакылааттары оҥордулар. Улуус 14 оскуолатыттан үөрэнээччилэр, учууталлар тиийэннэр, бу тиэмэҕэ бэйэлэрин санааларын тириэртилэр, кэпсэтиигэ кытыннылар.
“Тобуруокап көмүс күһүнэ” хоһоонньуттар үһүс республикатааҕы көҥүл түһүлгэлэрэ быйыл 10 улуустан 100-чэкэ айар куттаах, талааннаах дьону муста. Сыллата кыттааччыта элбээн иһэрэ бу тэрээһин сайдар кэскиллээҕин көрдөрөр.
Литература сылыгар сөп түбэһиннэрэн, саха литературатын төрүттээччи А.Е. Кулаковскай-Өксөкүлээх Өлөксөй Үөһээ Бүлүү улууһугар кэлэ сылдьыбытын туоһулуур Оҥхой Аһыкайыгар туруорбут сэргэтэ 110 сылын туолуутун бэлиэтиир улахан тэрээһин буолан ааста. Бу улахан чинчийии үлэтин 2010 сылтан учуутал А.С.Тимофеев үлэлэһэн, улахан суолталаах бэлиэни дьон-сэргэ, уопсастыбаннас билиитигэр-көрүүтүгэр таһаарда. Бу чинчийии үлэ түмүгүнэн, “Өксөкүлээх тыла-өһө – Оҥхой ытык сиригэр” улахан бырайыак сурулунна.
Улуу Кыайыы 70 сылынан үйэтитии үлэлэр улууска да, нэһилиэктэргэ да бэрт тэрээһиннээхтик ыытылыннылар: нэһилиэктэргэ, улууска ыытыллыбыт үлэлэр уонна Кыайыы үөрүүлээх парадын түгэннэриттэн ”Кыайыы сырдык сыдьаайа” фото-альбом таҕыста, Улуу Кыайыы 70 сылынан “Өйдүүбүт. Махтанабыт. Сүгүрүйэбит” нэһилиэктэр икки ардыларыгар ыытыллар фестиваль иһинэн тыа библиотекаларыгар “Сүрэххэ мэлдьитин тыыннаахтар” литературнай-музыкальнай салон үлэлээтэ.
“Саха” НКИК ыыппыт “Живая классика” бырайыагар кыттыһан, Үөһээ Бүлүүтээҕи киин библиотека уонна олохтоох телестудия “Хоһоон хонуулардаах мин дойдубар...” телевизионнай литературнай биэриини таһаардылар.
Бу сылга бэчээттэнэн ааҕааччы дьүүлүгэр таҕыстылар: кыраайы үөрэтэр салаа үлэһитэ Ольга Дмитриевна Федорова саҕалаабыт, бэчээккэ бэлэмнээн испит “Үөһээ Бүлүү өҥ буоруттан” кинигэ үһүс чааһа, киин библиотека уонна тыа библиотекаларын историяларын бииргэ түмэн “Хранители живых и мудрых слов” альбом, Аҕа дойду Улуу сэриитин кэминээҕи тыыл олоҕун уонна сэриигэ сылдьыбыт буойуттар тустарынан кэпсиир ахтыыларынан Быракаан, Өргүөт, Хоро, Сургуулук, Дүллүкү, Нам, Харбалаах өйдөбүнньүк кинигэлэрэ. Маны таһынан, М.П.Григорьев “Үөһээ Бүлүү улууһун суруйааччыларын төрүччүлэрэ” кинигэтэ бэчээккэ бэрилиннэ.
Бу ый 26-28 күннэригэр биир дойдулаахпыт, фантаст суруйааччы Г.С.Угаров 75 сааһыгар аналлаах улуустааҕы научнай-практическай конференция ыытыллыаҕа.
Дойду үрдүнэн биллэриллибит Литература сыла сайдар суоллары тобулууга, баар проблемаларга болҕомтону тардыыга, литература оҕону-ыччаты үөрэтэр-иитэр суолтата үрдүүрүгэр кыах биэрдэ, инники соруктары туруорда.
Үүнэр 2016 сыл Россия үрдүнэн Киинэ сылынан биллэриллибитэ быйыл саҕаламмыт үлэ сайдарыгар, ситэн-хотон биэрэригэр кыахтары үөскэтиэ.
Комментарии
Авторизация на сайте через социальные сети