Бэрдьигэстээх уопсай орто оскуолатын 7 «а» кылааһын оҕолоро артыыс курдук уобараска киирэн, куоластарын оонньотон, дорҕоонноохтук ааҕан, литературнай айымньы ис хоһоонун сатаан арыйан, көрөөччүлэри сөхтөрдүлэр. Дьокуускай куорат 12 № оскуолатын 5 «б» кылааһын, Нам улууһун Хамаҕатта саха-французскай лицейин 7 кылааһын, Айыы кыһатын 5 «б» кылааһын, Дьокуускай куорат 17 № оскуолатын 7 кылааһынүөрэнээччилэрэ эмиэ оҥостон кэлэн, туох талааннаахтарын, билиилэрин таһымын көрдөрдүлэр.
Аан бастаан оҕолор «Биһиги ааҕарбытын таптыыбыт» диэн кылаастарыгар ыыппыт тэрээһиннэрин билиһиннэрдилэр, презентация оҥорон, аахпыт кинигэлэрин кэпсээтилэр. Намнар Александр Пушкин төрөөбүт, үөрэммит сиригэр Царское село лицейигэр сылдьан, улуу киһи олоҕун-дьаһаҕын билсэн кэлбиттэрин сырдаттылар. «Щелкунчик» сааскы бал туруоран, учууталлар уруоктарын айымньылаахтык ыытан, эдэр ыччаты литература алыптаах эйгэтигэр сиэтэн киллэрэллэрин көрдөрдүлэр. Түмүктүүр санаа быһыытынан: «Ханна да буолларгын киэн тутун Эн саха буоларгынан!» -- диэн өрө көтөҕүллүүлээх кынаттаах этиилэрин эттилэр.
Салгыы «Бичик” кинигэлэрин төһө билэҕит?» диэн викторинаҕа билиилэрин тургутустулар. «Суруйааччылардыын сэһэргэһии» түһүмэххэ оскуола үөрэнээччилэрэоҕо суруйааччыларын: норуодунай поэт,СӨ Суруйааччыларын сойууһун бэрэссэдээтэлэ Иван Мигалкины, саха норуодунай суруйааччыта, прозаик, кириитик, литературоведСэмэн Туматы кытта көрсөн, кинилэр алгыстарын, үтүө баҕа санааларын иһиттилэр.
Иван Васильевич бастакы хоһоонун 13 сааһыгар суруйан, пионер эрээри, таптаабыт баҕастааххын диэн сирэй-харах анньыллан, учительскайга киллэрэн мөхпүттэрин санаата. Айар дьоҕурдаах киһи кута онтон тостубакка, хата өссө чочуллан, ситэн-хотон, олоҕун устата 41 кинигэни суруйан, күн сирин көрдөрдө. «Бичик» кыһа, билэргит курдук, саха бастакы букубаарын, суругун-бичигин төрүттээччи С.А. Новгородов аатын сүгэр. Сэмэн Тумат ити улуу киһини таайа буолар эбит, иккиэн Сэмэн Андреевич диэн ааттаахтар. Кини олоххутугар буолбут чаҕылхай түгэннэри дневниккэ сурунан иһиҥ, кэлин наада буолуо диэн сүбэлээтэ. Оҕолор викторинаҕа кыттан, Иван Мигалкин уонна Сэмэн Тумат кинигэлэрин, айымньыларын, биографияларын эндэппэккэ билэллэрин кэрэһилээн суруйааччылар сүргэлэрин көтөхтүлэр, санааларын кынаттаатылар.
Туох барыта дьиэ кэргэнтэн саҕаланар диэн мээнэҕэ эппэттэр. Хас биирдии киһиэхэ ийэтэ, аҕата, эбэтэ, эһэтэ, эдьиийэ, убайа холобур буолаллар. Дьиэ кэргэнинэн бары түмсэн ааҕар ыал хаһан баҕарар баай дууһалаах, дириҥ билиилээх. «Бастыҥ ааҕар дьиэ кэргэн» түһүмэххэ ким дьиэтигэр төһө баай библиотекалааҕын, кэлин тугу аахпытын билиһиннэрдилэр. Төрөппүттэр бэйэлэрин холобурдарыгар оҕолорун кытта аахпыт кинигэлэрин ырытыһа, санааларын үллэстэ сылдьаллара хайҕаллаах суол. Маннык дьиэ кэргэҥҥэ оҕо сайдар, билиигэ талаһар күүһэ улаатар.
Долгутуулаах кэм тиийэн кэлэн, дьүүллүүр сүбэ түмүк таһааран, Бэрдьигэстээх орто оскуолатын оҕолоро - бастакы, Дьокуускай 12 №-дээх оскуолата - иккис, Нам улууһун Хамаҕатта саха-французскай лицейэ - үһүс, «Айыы кыһата» - төрдүс, Дьокуускай куорат 17 №-дээх оскуолата бэһис миэстэлэриыллылар. Кинилэр бары Үөрэх министиэристибэтин дипломунан уонна «Кинигэ – үйэлээх бэлэх» «Бичик» кыһа акциятын анал сертификаттарынан наҕараадаланнылар. Ити сертификаттарынан кинигэ ылан, оҕолор билиилэрин өссө хаҥатыахтара, сахалыы кинигэ араас эгэлгэтин сэргээн ааҕа үөрэниэхтэрэ, олохторугар туһаныахтара.
Комментарии
Авторизация на сайте через социальные сети