Кореецтар үбүлүүр бырайыактарын көрдүүллэр
"Саҥа көлүөнэ" диэн ааттаах бастакы саха-корейскай бизнес-форум икки күн үлэлээтэ.
Тэрээһин көҕүлээччитэ — Госдума депутата Михаил Николаев. Корейскай хампаанньалар Саха сирин экономикатын сайдыытыгар улахан интэриэстээхтэрэ тутта-хапта олороллоруттан, хас биирдии тыл этээччини болҕойон истэллэриттэн да көстөр. Өрөспүүлүкэ кыахтаах бизнесменнэрэ аттыларыгар олорон, кореецтар өттүлэриттэн тугу кэпсииллэрин эмиэ кулгаах-харах буолан истэ-көрө олороллор. Өрүттэр хайалара да тылбаастыыр наушниктарын кулгаахтарыттан араарбаттар.
- Биһиги Кореяны кытта үлэбитин сайыннарарбытыгар көмөлөөх тэрээһин буолла. Корея курдук сайдыылаах өрөспүүбүлүкэттэн сүүрбэччэ киһи кэлбитэ олус үөрүүлээх суол. Ол аата Саха сиригэр улахан интэриэс баар. Урукку өттүгэр экономическай уонна бизнес салааларыгар бииргэ үлэлээһин мөлтөх соҕус этэ. Дьиҥэр, Дьокуускай куоракка "LG" хампаанньа улахан офис туттубута. Ити курдук аҕыйах холобур баар гынан баран, биһиги социальнай-экономическай салааларбытыгар Корея бизнесменнэрэ өссө киэҥник киириэхтэрин баҕарабыт, -- диэн эттэ федеративнай сыһыаннаһыыга уонна тас дьыалаҕа миниистир Владимир Васильев.
Форумҥа тыл этиилэртэн сылыктаатахха, кореецтар ордук энергетикэ боппуруоһун интэриэһиргииллэрэ көһүннэ. Саҥа экология өттүнэн ыраас технологияларга кэккэ этиилээхтэр.Ону таһынан, туризм хайысхатыгар үлэлэһиэхтэрин баҕаралларын биллэрдилэр. Урутаан сайдар территорияларга улахан интэриэстээхтэр эбит. Үөрэтэн көрөн баран, кореецтар Кангаласска тэриллэн эрэ бырайыагы, "Северный мир" диэн туристическай кластеры, базальт комплексын интэриэһиргээтилэр. Бу ааттаммыт бырайыактар бэрэстэбиитэллэрэ эрдэттэн бэлэмнээх кэлэн, Корея бизнесменнэрин интэриэстэрин тартылар.
-- Арктическай бизнес-форум диэбиппит эмиэ интэриэһинэй буолла. Кинилэргэ "Арктика "диэн тылы эттэххинэ, интэриэстэрэ тута үрдүүр. Арктикаҕа киириэхтэрин олус баҕараллар. Ону дьүүллэһэ, ханнык хайысхаларга биһиги бииргэ үлэлиэхпитин сөбүн быһаарса маннык улахан делегациянан кэлэ сылдьаллар. Бииргэ үлэлээһиммитин үрдүк таһымҥа таһаарар туһуттан маннык форуму сыл аайы ыытар буолуохпут, -- диэн санаатын үллэһиннэ Владимир Васильев.
"Артыыстаан айахпытын ииттэбит..."
Киин куорат Дьарыктаах буолууга киинигэр бу кэмҥэ быыстапка-дьаарбаҥка буолла.
Араас сылларга бу Киин нөҥүө көмө харчы ылан, бэйэ дьыалатын тэриммит дьон бырааһынньыктары тэрийиигэ, миэбэли оҥорууга, кэтэх дьиэни бырайыактааһыҥҥа, атах таҥаһын оҥорууга, куруолук уонна куурусса иитиитигэр уонна да атын араас эйгэҕэ үлэлии-хамсыы сылдьалларын билиһиннэрдилэр. Тэрийээччилэр бэлиэтииллэринэн, дьон субсидия ылан бэйэ дьыалатын тэрийэргэ интэриэһэ улахан. Ол эрээри судаарыстыба сакааһа кыра буолан, куонкурус нөҥүө ааһар субсидияҕа аҕыйах киһи тиксэр. Холобур, быйыл 50-тан тахса бизнес-былаан киирбититтэн куонкуруһу 23 эрэ киһи ааһан, 80-нуу тыһ. солк. суумалаах субсидияны ылбыт. Кэлэр куонкурус алтынньы ыйга буолуоҕа. Маннык көмөнү ылбыт дьон бу тосхол олус наадалааҕын ыйар.
Бу туһунан Антонина Суханова санаатын маннык үллэстэр: - 2009 сыллаахха бэйэ дьыалатын тэринэрбэр "Үбүнэн көмөлөһөллөр үһү" диэни истэн, бу Кииҥҥэ кэлбитим. 53 тыһ. солк. көмө ылан баран, музыкальнай аппаратура ылынан, Куукула театрын тэрийбитим. Ол кэмтэн ыла тохтоло суох үлэлээн кэллим. Быйыл ахсынньы ыйга театрбыт 6-с сылын бэлиэтиэхпит. Үлэтэ суох сылдьар кэмммэр судаарыстыба үбүнэн өйөбүл оҥорбутугар махталым муҥура суох. Бастаан дьиэ кэргэн бизнеһин курдук тэриммитим. Онтон үөрэхтэрин саҥа бүтэрэн баран, үлэ булбакка ускул-тэскил сылдьар ыччаттары көрсөн, кинилэри кытта үлэлээбитим. Бүгүҥҥү күҥҥэ эдэр, эрчимнээх, искусствоҕа сыһыаннаах оҕолору кытта бэһиэ буолан үлэлиибит. Театрбытынан өрөспүүбүлүкэни биир гына кэрийдибит.
Бэлиэтээн эттэххэ...
Бу бэрт сэргэх тэрээһиннэргэ сылдьан баран, мин өрөспүүбүлүкэ предпринимателлэригэр маннык тэрээһиннэр хаһан, ханна буолалларын билэ-көрө сылдьан, хайаан да кэлэн кыттыыны ылыаххытын наада эбит диэн сүбэлиибин.
Комментарии
Авторизация на сайте через социальные сети