Сорох дьон урукку суолга үөрэммиччэ «тоҕо туттулар, суолу мэһэйдиир, суол кыараата», эбэтэр «сатыы сылдьарга табыгаһа суох буолла» диэн саҥа аллайара эмиэ баар. Бу туһунан сиһилии «СунтарАвтодор» ХЭТ кылаабынай инженерэ Владимир Никитич Сергеевы кытта кэпсэттибит.
– Владимир Никитич, күрүөлэри тоҕо чуолаан бу уулуссаларга туруордугут?
– Партизанскай уонна Вилюйскай уулуссалар федеральнай суол дэнэллэр. Федеральнай суол, сокуон быһыытынан, дьон олорор сиринэн ааһыа суохтаах. Ол эбэтэр, бу суолларынан сатыы киһи сылдьара бобуллар. Ол эрэн, бу икки уулуссанан сатыы киһи да, техника да элбэхтэ сылдьар. Ол иһин, билигин, саҥа федеральнай суол тута сылдьаллар, олохтоохтор билэллэрэ буолуо. Бу суол оҥоһуута Бэрдьигэстээххэ тиийэн турар. Сунтаар диэки тиийиэ, биллэн туран, ыраах. Аны туран, бу уулуссалар ГОСТ-унан аварийнай туруктаахтар, сатыы, эбэтэр велосипедтаах дьоҥҥо сэрэхтээх суоллар. Ол иһин, итинник сатыы киһи хаамарыгар сөптөөх күрүө (пешеходное ограждение) тутулунна.
– Сатыы киһи хаамарыгар сөптөөх дэнэр да, сатыы сылдьарга табыгаһа суох курдук дии...
– Үлэ итинэн бүппэтэ. Маны таһынан, сатыы киһи хаамарыгар сөптөөх тротуар оҥоһуллуохтаах. Былааҥҥа киирэн турар. Аныгы сылга үп-харчы көрүллэн, бу былааммытын ситиһиэхпит диэн эрэнэбит. Оттон били-гин, суоппардар да, сатыы сылдьар дьон да ити күрүөҕэ үөрэнэ илигэ биллэр. Сокуон быһыытынан, уулуссалар итинник күрүөлээх, тротуардаах буолуохтаахтар. Ити барыта нэһилиэнньэ сэрэхтээх буоларыгар ананан оҥоһуллар.
– Оттон тротуар оҥоһуллуор диэри ханан сылдьабытый? Кыһын тоҥ хаары тэпсэн дуо?
– Кыһын дьон-сэргэ сылдьарыгар табыгастаах буоларын курдук, күрүө таһынан баар хаары ыраастаан суол оҥоруохпут. Оттон билигин, олохтоохтору тулуйа түһэргитигэр көрдөһөбүн.
– Советскай уулусса эмиэ сатыы дьон сылдьарыгар да, техникалаах да киһиэхэ сөбө суох дии. Итини эмиэ оҥороргут буоллар?
– Сөпкө этэҕин. Советскай уулусса, чуолаан, «Катерина» маҕаһыын аттынан ааһар уулусса аварийнай өттүнэн мөлтөх. Итиннэ эмиэ күрүө, тротуар тутуллуохтаах. Ол эрэн, «Катерина», «Маяк» маҕаһыыннар аналлаах мас-сыына стоянкатын оҥоһуннахтарына эрэ биһиги үлэбит табыллар.
Уулуссалар көстүүлэрэ да тупсубут буолбатах дуо? Ити курдук, саҥа саҕалааһын, нэһилиэкпитин тупсарыы үлэтэ тэтимнээхтик бара турара буоллар, суол саахала тахсара, киһи эчэйэрэ аҕыйыа этэ.
Комментарии
Авторизация на сайте через социальные сети