Быйыл өрөспүүбүлүкэбитигэр Предпринимательство сыла биллэриллибитэ. Ол чэрчитинэн үгүс тэрээһиннэр ыытылыннылар. Бэйэ дьыалатын тэрийиэн баҕалаах урбаанньыттарга көмө бөҕөтө оҥоһулунна. Мантан инньэ аны Сылы түмүктүүр тэрээһиннэр ыытыллыахтара. Онно «Летопись якутского предпринимательства» диэн кинигэ тахсара былааннанар. Кинигэҕэ Саха сиригэр саамай тахсыылаахтык үлэлии сылдьар сүүс урбаанньыт үлэтэ-хамнаһа сырдатыллыаҕа. Хас улуус аайыттан биир эрэ урбаанньыт киириэҕэ.
Итинэн сибээстээн тустаах координационнай сэбиэт биһиги улууспутуттан кими киллэрэр туһунан мустан сүбэлэстилэр. Кинигэҕэ киириэхтэрин сөп диэн биэс тэрилтэни билиһиннэрдилэр. Ол курдук, «Ващенко В.Н.» ИП (маһы таҥастааһын), «Айан суол» ХЭО (Крыжановскай В.В.), Попов П.М. (уоту монтажтааһын), А.Н.Попов салайар «Лоҥкур» бааһынай хаһаайыстыбата уонна «Герасимова Н.П.» ИП «Татыйыына» тэрилтэтэ.
Сэбиэт чилиэннэрэ маныаха турар хас да критерийгэ олоҕуран, улууспутугар билиҥҥитэ саамай элбэх үлэ миэстэтин таһаарар уонна сыллааҕы дохуота улаханын көрөн, «Летопись якутского предпринимательства» кинигэҕэ биир санаанан «Татыйыына» фирманы киллэрэргэ диэн куоластаатылар.
Комментарии
Авторизация на сайте через социальные сети