Күрэхтэһиигэ Үөһээ Бүлүүттэн, Тамалакаантан, Намтан, Өргүөттэн, Дүллүкүттэн, Маҥаастан, Мэйиктэн, Хомустаахтан, Кырыкыйтан, Харбалаахтан уонна Бүлүү улууһуттан уопсайа 60 бильярд оонньуутун сэҥээрээччилэр уонна тарҕатааччылар кэлэн икки күн күрэхтэстилэр. Күрэхтэһии улахан дьоҥҥо уонна оҕолорго ыытылынна. Бильярд оонньуу улууска да, республикаҕа да тэнийэн эрэрэ көрүөххэ олус үчүгэй. Чуолаан оскуола оҕолорун бильярд оонньуутугар көҕүлээн эрэллэрин олус диэн сэргиибит.
Икки күннээх тыҥааһыннаах киирсии түмүгүнэн, улахан дьоҥҥо бастакы миэстэни Үөһээ Бүлүүттэн Никифор Петров ылыан ылла уонна «HATSON ESCORT» саанан наҕараадаланна. «Туох да диэбит иһин, үчүгэй күрэхтэһии буолла. Үөһээ Бүлүү улууһугар саамай элбэх кыттаааччытынан рекорд олохтоото,” - диэн Никифор Петров бэлиэтиир.
Иккис миэстэни Бүлүү улууһуттан Виктор Васильев, үсүһү Бүлүү улууһуттан Елисей Капитонов уонна Тамалакаантан Юрий Федоров ыллылар. Үөһээ Бүлүүттэн Яков Яковлев «За серию точных ударов» диэн бириискэ тигистэ.
Оҕолорго бастакы миэстэни Нам орто оскуолатын 11 кылааһын үөрэнээччитэ Мичил Федоров ылла уонна уон тыһыынча суумалаах сертификатынан, «За серию точных ударов» бирииһинэн наҕараадаланна. Мичил санаатын маннык үллэстэр: “16 сааспыттан бильярды интириэһиргээн оонньуур буолбутум. Бу бастакы улахан ситиһиим. Бэркэ оонньуур оҕолору кытта күрэхтэһэн үөрүүм улахан”. Исидор Кимович уола Чаҕыл Барахов иккис, Женя Иванов уонна Саша Григорьев үһүс буоллулар, “Кыайыыга дьулуурун иһин” бирииһи Ким Тюляхов ылла.
Исидор кэргэнэ Наталья күрэх туһунан санаатын маннык үллэстэр: «Күрэхтэһии олус өрө күүрүүлээхтик ааста. Биһиги, Исидор чугас дьоно, маннык элбэх киһи кэлэн кыттыыны ылбытыттан олуһун диэн астынныбыт. Аны 2017 сылга ыытар баҕа санаалаахпыт».
Бу аһаҕас турнир олус тэрээһиннээхтик ааста. Маннык күрэс оҕолорго өссө ыытыллара буоллар диэн баҕа санаалаахпыт.
Комментарии Добавить комментарий
Авторизация на сайте через социальные сети