Ил Дархан бастакынан кырдьаҕастар дьиэлэригэр сырытта. Билигин чугас дьоно суох хаалбыт, бэйэлэрин кыайан дьаһаммат аҕа саастаах дьоннорго улахан болҕомто ууруллар. Егор Афанасьевич хас биирдии хоска сылдьан, туттар малга тиийэ барытын көрдө.
Кылгас билсии кэнниттэн, олохтоох дьону кытары атах тэпсэн олорон, олох-дьаһах, салалта көрүүтүн-истиитин туһунан интэриэһиргэстэ. Манна баар дьон нус-хас, этэҥҥэ олороллорун, астара-үөллэрэ үчүгэйин, быраастар бириэмэтигэр көрөллөрүн хайгыы иһиттэ. Бэрдьигэстээххэ республикаҕа биир улахан, үчүгэй специалистардаах балыыһа баарын ыйда. Ол кэннэ, Саха сиригэр ыытыллар үлэлэри — тимир суол тутуутун, тыа хаһаайыстыбатын, медицинэ үлэтин о.д.а. тустарынан кэпсээтэ.
Салгыы Егор Афанасьевич дьон олорор усулуобуйатын тупсарыытыгар үлэлиир хаарбах туруктаах дьиэлэртэн көһөрүү программатын хайысхатынан тутуллубут 38-с кыбаарталга сырытта. Манна кинини кырачаан Диана Федорова ийэтинээн биир бастакынан көрсөннөр, Ил Дарханы ааспыт төрөөбүт күнүнэн эҕэрдэлээннэр, открытка бэлэх ууммуттара соһуччу үөрүүлээх түгэн буолла.
Саҥа тутуллубут дьиэлэр бырайыактарын туһунан «ВЕНС плюс» ХЭТ дириэктэрэ В.В.Народов, улуустааҕы тутуу управлениетын салайааччыта Г.Г.Ефимов сырдаттылар, инники былааннарын билиһиннэрдилэр.
Ил Дархан ыытыллыбыт үлэни көрөн-истэн баран, билигин тутууга — хаачыстыба сүрүн ирдэбил буоларын туһунан эттэ. Нэһилиэнньэ олоҕо-дьаһаҕа, оҕолор оонньуур, сынньанар сирдэрэ тупсарыгар бары усулуобуйаны оҥорууга болҕомто ууруллара наадалааҕын санатта.
Улууска «Горнайинвест» ХЭТ үлэтэ эмиэ үрдүктүк сыаналанар. Бу тэрилтэ төһө да аҕыйах сыллааҕыта арылыннар, ыыппыт тутуулара биһиэхэ эрэ буолбакка, республика хас да улууһугар бигэтик турбуттара.
Егор Афанасьевич бу сырыытыгар Бэрдьигэстээх киириитигэр турар «Горнайинвест» үлэлиир сирин быһа ааспата. Көрсүһүү кэмигэр тэрилтэ дириэктэрэ С.М.Винтоняк тугунан дьарыктанарын сиһилии кэпсээтэ. Ил Дархан үлэ чааһын саамай үгэнигэр түбэһэн, пенобетон, тимир олбуордар хайдах оҥоһуллан тахсалларын көрдө.
Степан Михайлович базата «Бүлүү» федеральнай трасса кытыытыгар турарынан, уһун айаҥҥа туруммут суоппардар, айанньыттар техникаларын оҥостон, сынньанан баралларыгар аналлаах дьиэ бырайыагын бэркэ сэргээтэ. Тэрилтэ үлэтэ тахсыылаах буоларын туһугар, үп-харчы боппуруоһун быһаарсарыгар сүбэ-ама биэрдэ.
Егор Афанасьевич улуус киинигэр төһө да аҕыйах чаас сырыттар, элбэҕи быһаарда. Кини аҥардас улууска ыытылла турар улахан тутуулары, дьон олоҕун тупсарарга көрүллэр программалар олоххо киирэллэрин бэйэтинэн көрөн, кэлэр сырыытыгар ону барытын хонтуруоллуох буолбута, улууспут инники сайдыытыгар эрэли үөскэтэр.
Аҕа саастаах дьону кытары көрсүһүү кэмигэр горнайдар эрэнэ күүтэр «күөх төлөнү» тардыы, аҕалыы туһунан Ил Дархан: «Газ Аһымаҕа кэлиэҕэ. Бэрдьигэстээххэ мин баарбар аҕалыахпыт», - диэбитин мустубут дьон бэркэ сэргии, үөрэ иһиттэ.
Комментарии
Авторизация на сайте через социальные сети