РФ Үлэҕэ уонна социальнай сайдыыга министиэристибэтин чахчыларынан, Россияҕа 22 мөлүйүөн кэриҥэ киһи саарбах, кистэлэҥ усулуобуйаҕа үлэлиир. Ол түмүгэр дойду араас таһымнаах бюджета туһааннаах дохуоттан көрө матар, социальнай эйгэҕэ үп-харчы тиийбэт. Онуоха, бастатан туран, үлэһит эмсэҕэлиир – кини ылыахтаах биэнсийэтин сорох өлүүтүттэн матар. Эбиитин больничнай лиис төлөнөрүгэр, ийэ оҕо күүтэригэр уонна төрөтөрүгэр, үлэ көмүскэлигэр, бааҥҥа кирэдиит ыларыгар, уо.д.а. социальнай мэктиэлэргэ тустаах быраабын сүтэрэр.
Маннык балаһыанньа сытыырхайбатын наадатыгар 2015 сылга сокуону кэһэн туран үлэҕэ ылыыны аҕыйатыы дьаһалларыгар өрөспүүбүлүкэтээҕи былаан ылыллыбыта. Муниципальнай оройуоннарга уонна куорат уокуруктарыгар биэдэмистилэр икки ардыларынааҕы хамыыһыйалар үлэлииллэр.
СӨ нэһилиэнньэ дьарыктаах буолуутугар департамена үлэ дуогабара олохтоммотох тэрилтэлэр үлэһиттэригэр декада аайы мониторинг ыытар. Сэтинньи 30 күнүнээҕи туругунан, Саха сиригэр үлэ дуогабара суох 15 875 киһи баара булулунна.
Былааннаах үлэ салҕанар. Саха сиригэр ахсынньы 7-25 күннэригэр «Көҥүллээх үлэ иһин!» өрөспүүбүлүкэтээҕи акция ыытыллар. Акция сүрүн соругунан үлэһит уонна үлэни биэрээччи икки ардыларыгар дуогабары оҥорууга көҕүлээһин буолар. Үлэни биэрээччилэр үлэһиттэри кытары дуогабар түһэристэхтэринэ уонна ол туһунан нэһилиэнньэ дьарыктаах буолуутун киинигэр эбэтэр нэһилиэнньэ дьарыктаах буолуутун департаменыгар иһитиннэриэхтээхтэр. Оччоҕо кинилэр административнай эппиэтинэстэн босхолоноллор.
Комментарии
Авторизация на сайте через социальные сети