“Төгүрүк остуолу” РФ Накаастабылы толорор федеральнай сулууспатын Саха сиринээҕи управлениетын холуобунай-исполнительнай инспекцията тэрийэн ыытта. Сыалынан-соругунан маннык дьоҥҥо социальнай, правовой, психологическай көмөнү оҥоруу, үлэни булуу туһунан иһитиннэриилэри тиэрдии буолла. Манна өрөспүүбүлүкэ үөрэххэ уонна кадрдары бэлэмнээһиҥҥэ, ыччат уонна дьиэ кэргэн политикатыгар, культура уонна духуобунай сайдыы министиэристибэлэрин, Дьокуускай куорат дьарыктаах буолуу, соициальнай көмүскэлгэ, физкультураҕа уонна спорка тэрилтэлэрин бэрэстэбиитэллэрэ кытыннылар. Маны тэҥэ, полиция сокуоннай саастарын ситэ илик оҕолор дьыалаларыгар инспектора, миграционнай сулууспа, “Подросток” ыччат тэрилтэтэ эмиэ иһитиннэриилэрдээх кэлбиттэр.
Бастакынан бэйэтин кыһалҕатын биир уол абарбыттыы этиннэ: тулаайаҕынан бэриллиэхтээх дьиэ уочарата сыҕарыйбатын, 3 саастаах кыыһа реабилитационнай кииҥҥэ баарын, оттон кинини бэйэтин төрөппүт буолар быраабын быһаары гыналларыттан куттанарын. Киниэхэ тугун-хайдаҕын чопчу быһааран биэрдилэр, онуоха уоскуйа быһыытыйда. Ыйытыыларын биэрбит дьоҥҥо барытын быһааран, чуолкайдаан биэрдилэр, тэрээһин кэнниттэн кэлэ сылдьалларыгар этилиннэ.
Мин саныахпар, сууттаммыт дьон бэйэтигэр, кинилэр төрөппүттэригэр туһалаах тэрээһин буолла. Ону бэйэлэрэ сөпкө өйдөөн, ылынан, таба туһаныахтарын наада. Буруйу оҥорбут киһини “хайдах да буол” диэн сапсыйан кэбиһиэххэ сөп этэ буоллаҕа. Ону суох – холуобунай-исполнительнай инспекция бу киһи сөптөөх суолга турарыгар чахчы кыһанарын көрдөрдө.
Комментарии
Авторизация на сайте через социальные сети