ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
25 ноября 2015, 13:00

Алексадр Жирков: Олоҥхо – биһиги норуоппут түҥ былыргыттан илдьэ кэлбит, бүөбэйдээбит, сайыннарбыт, бүгүҥҥү дьоҥҥо уонна кэнэҕэски ыччакка кэс тыл оҥостон уунар сүдү баайа


Ытыктабыллаах Саха сирин олохтоохторо! Эһигини Саха Өрөспүүбүлүкэтин Ил Түмэнин уонна Олоҥхо Уон сылын бэлэмниир уонна ыытар Саха Өрөспүүбүлүкэтин национальнай кэмитиэтин аатыттан Олоҥхо күнүнэн эҕэрдэлиибин!

photoByWidth&id=50247&width=1000

Олоҥхо – биһиги норуоппут түҥ былыргыттан илдьэ кэлбит, бүөбэйдээбит, сайыннарбыт, бүгүҥҥү дьоҥҥо уонна кэнэҕэски ыччакка кэс тыл оҥостон уунар сүдү баайа. Баай үгэстэрдээх, умнуллубат сиэрдээх-туомнаах омук аҕыйаҕыттан, элбэҕиттэн тутулуга суох хаһан баҕарар ордук күүстээх, чиҥ тирэхтээх, инникигэ дьулуурдаах буолар.

Саха олонхото 2005 с. киһи аймах бастыҥ тылынан уус-уран айымньытынан билиниллибитин кэннэ 2006-2015 сс. Олоҥхо уон сыла биллэриллибитэ. Бу ааспыт уон сыл устатыгар олоҥхону хомуйууга, харыстааһыҥҥа, тылбаастааһыҥҥа уонна тарҕатыыга балайда утумнаах үлэ барда. Ол түмүгүн ЮНЕСКО үрдүктүк сыаналаата, бу үлэни салгыыр туһунан этиини өйөөтө. Олоҥхо эйгэтэ, олоҥхону билинэр, ылынар дьон, ордук ыччат ортотугар, элбээн, эбиллэн иһэр. 

Олоҥхо Уон сылын бэлэмниир уонна ыытар Саха Өрөспүүбүлүкэтин национальнай тэрийэр кэмитиэтэ киллэрбит этиитин өйөөн, Саха Өрөспүүбүлүкэтин Ил Дархана 2016-2025 сылларга Олонхо иккис Уон сылын биллэрбитэ. Ити дьаһалга олоҕуран олоҥхону харыстааһын уонна тарҕатыы кэскиллээх былаана оҥоһуллар. Бу үлэҕэ «Олоҥхо» ассоциация, общественность, олоҥхону сөбүлүүр, сэҥээрэр дьон барыта кыттара ирдэнэр.

Үүнэн иһэр 2016 сылга Олоҥхо ыһыаҕа Дьааҥы улууһугар тэриллиэҕэ. Кырдьаҕас Дьааҥы сирэ былыр-былыргыттан ааттаах-суоллаах олоҥхоһуттардаах, саха олоҥхото киэҥник тарҕаммыт уһук хотугу сирэ. Бу уустук суоллаах-иистээх ыраах дойду дьоно-сэргэтэ Олоҥхо ыһыаҕар дьоһуннаахтык бэлэмнэнэр. 

Аҕыйах хонугунан Кытай Өрөспүүбүлүкэтин киинигэр Пекин куоракка саха олоҥхото – «Туйаарыма Куо» спектакль кытай тылынан туруоруллуоҕа, оттон Олоҥхо театра кытай норуотун үгэстэригэр олоҕурбут спектаклы сахалыы оонньоон көрдөрүөҕэ. 2016 сылга «Аан дойду норуоттарын эпостара» кинигэ сериятыгар алтай омук эпоһа «Маадай хара» сахалыы тылбаастанан тахсыаҕа, онтон «Дьулуруйар Ньургун Боотур» олоҥхону алтайдар бэйэлэрин тылларыгар тылбаастаан таһаарыахтара. 

Оҕо аймаҕы олоҥхо эйгэтигэр салгыы чугаһатар туһуттан олоҥхо персонажтарыттан таҥыллыбыт бастакы сахалыы куукулалар комплектара оонньуур оҥорор заводтарга анаан оҥоһуллан оҕо саадтарыгар тарҕаныахтара. Олоҥхо энциклопедиятын уонна Аан дойду эпостарын энциклопедиятын оҥоруу өр сыллаах үлэтэ саҕаланна. Иннибитигэр кэскиллээх соруктар, барыбытын үгүс үлэ күүтэр. 

Ытыктабыллаах Саха сирин олохтоохторо! Эһиэхэ чэгиэн туругу, дьолу-соргуну, ситиһиилэри, этэҥҥэ буолууну баҕарабын! Норуот культуратын харыстаан, үөрэтэн, байытан тарҕатыы кэскилбитин түстүүрбүтүгэр төһүү күүс буоллун, төрөөбүт дойдубут сайда-чэчирии турдун!  

Саха Өрөспүүбүлүкэтин Ил Түмэнин Бэрэссэдээтэлэ,

Олоҥхо Уон сылын бэлэмнээн ыытар

Саха Өрөспүүбүлүкэтин Национальнай

тэрийэр кэмитиэтин бэрэссэдээтэлэ

Александр Жирков

При частичном или полном использовании материалов гиперссылка на сайт ysia.ru обязательна.
Категория: Общество Просмотров: 624 Источник: ЯСИА Автор: СИА Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ