ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
12 ноября 2015, 10:38

Аныгы хотон ураты көрүүнү эрэйэр


Ил Дархан Егор Борисов бэҕэһээ киин куорат таһынааҕы Киллэмҥэ тахсан, сэтинньи ыйтан саҥардыы үлэлээн эрэр сүөһү комплексын үлэтин-хамнаһын көрдө-иһиттэ, үлэ дьонун сирэй көрсөн сэһэргэстэ. Өрөспүүбүлүкэ баһылыгын кытта Ил Түмэн бэрэссэдээтэлэ Александр Жирков, тыа хаһаайыстыбатын уонна ас-үөл бэлиитикэтин миниистирэ Александр Артемьев, Дьокуускай куорат дьаһалтатын баһылыга Айсен Николаев, «Сахаплемхолбоһук» ААУо генеральнай дириэктэрэ Степан Охлопков уо.д.а. сылдьыстылар.

Санатан эттэххэ, сопхуос саҕана манна 800 төбө сүөһү түөрт хотонунан иитиллэн турбута. «Туймаада-Лизинг» ЛК сакааһынан уонна үбүлээһининэн тутуллубут аныгылыы киэҥ-куоҥ комплекска ыанар ынахтыын уонна ыччат сүөһүлүүн 400 төбө туруохтаах. Алтынньы ый бүтүүтүгэр Новосибирскай уобаластан 200 төбө хара эриэн боруода тиҥэһэлэри тиэйэн аҕалбыттара үчүгэйдик олохсуйан эрэллэр эбит. Аҥардарын кэриҥэ аны саас төрүөхтээхтэр.

photoByWidth&id=49222&width=1000

Егор Афанасьевич ураты болҕомтотун тутуу хаачыстыбатыгар хатаата. «Туймаада-Лизинг» генеральнай дириэктэрин бастакы солбуйааччы Альберт Иванов уонна сүрүн бэдэрээтчит «Айтал» ХЭУо дириэктэрэ Егор Игнатьев этэллэринэн, бу комплекска урукку сылларга кыайтарбакка кэлбит вентиляция боппуруоһа быһаарыллар суолга киирбитин бэлиэтээтилэр. Комплекс оборудованиета – үүтү ыыртан саҕалаан саах таһаарарыгар тиийэ Германия «GEA Farm» фирматын технологията, барыта компьютерынан салайыллар.

Ил Дархан Нам улууһунааҕы «Тунал» ХЭУо (Модут) кэбин кэппэт туһугар кадры аттаран туруорууга болҕомтолоохтук сыһыаннаһарга эттэ. «Электроника эргэрэн моһуоктаатаҕына, производство туран хаалар кутталлаах. Онно быһаарсар исписэлиистээххит дуо?» – диэн ыйытта. Бу комплексы сүөһүлүүн-астыын көрүүгэ ылбыт тэрилтэ – «Сахаплемхолбоһук» ААУо генеральнай дириэктэрэ Степан Охлопков: «Билигин «GEA Farm» исписэлиистэрин кытта бииргэ үлэлэһэ, үөрэнэ сылдьар олохтоох уолаттартан үлэһит ылыахпыт», – диэн хоруйдаата.

photoByWidth&id=49223&width=1000

Комплекска быһаччы сүөһү үлэтигэр олохтоох дьон үөрэ-көтө киирбиттэр. Оттон исписэлиистэрэ Дьокуускайтан сылдьан үлэлииллэр, барыта 10 эдэр исписэлиис. Ил Дархан хаһаайыстыба үлэһиттэригэр толору хааччыллыылаах олорор дьиэни тутууну тэрийэллэригэр, хамнастарыгар эбии төлөбүрү ааҕыыны ситиһэллэригэр тустаах салайааччыларга дьаһал биэрдэ.

photoByWidth&id=49224&width=1000

Тыын боппуруос – сүөһү аһылыга. Бу үүттээх боруода сүрүннээн сүмэһиннээх аһылыкка наадыйар. Миниистир Александр Артемьев аны сайыҥҥыттан чугас сытар 114 гектардаах бааһынаҕа сүмэһиннээх аһылыкка анаан култуура ыһар былаан баарын иһитиннэрдэ. Ил Дархан түмүккэ бу саҥа комплекс туох баар ороскуотун-дохуотун, экономическай көдьүүһүн ааҕан-суоттаан отчуоттуулларыгар итиэннэ киин куорат тулатыгар сүөһү иитиитин сайыннарыы стратегиятын оҥороллоругар министиэристибэҕэ, Дьокуускай куорат дьаһалтатыгар сорудахтаата.

При частичном или полном использовании материалов гиперссылка на сайт ysia.ru обязательна.
Категория: Экономика Просмотров: 660 Источник: ЯСИА Автор: Василий Никифоров Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ