Тимири уһаарыыга, уус-уран оҥоһуктары сыаналааһыҥҥа анаан сылын аайын ыытыллар фестивальга саха уустарын быйыл үһүс төгүлүн ыҥырдылар. Фестивалы сэрии, булт сэбин-сэбиргэлин оҥорор «АиР» компания иилээн-саҕалаан ыытар.
Рудалаах таастан тимири хайдах ыларга анаммыт маастар-кылааһы уустар Александр Данилов (Хаҥалас), Василий Герасимов, Максим Попов (Нам), Александр Протопопов (Бүлүү), Ньургустан Уваров уонна Дьулус Марков (Мэҥэ-Хаҥалас) көрдөрдүлэр.
Саха уустарын түһүлгэтэ хатыламмат ураты киэргэтиитинэн фестиваль кыттыылаахтарын сэҥээртэ.
Уустар 30 кг рудаттан 15 кг металлы (болгуо тимир) хайдах ылары көрдөрдүлэр. Ол кэнниттэн саха быһаҕын хайдах оҥорорго үөрэттилэр.
Үөһээ Бүлүү улууһуттан фестивальга кыттыбыт Николай Михайлов уус-уран таптайан оҥорууга 1 миэстэни ылла. Уус бу кыайыы көтөллөммүт “Суор” оҥоһуга дьоҥҥо-сэргэҕэ улаханнык биһирэннэ.
Александр Данилов, тимир ууһа:
- Аан бастаан биһигини бу фестивальга тимир уустарын сойууһун президенэ Леонид Архангельскай ыҥырбыта. Төһө да бу үрдүк таһымнаах фестивальга үһүс эрэ сылбытын кыттыбыппыт иһин, саха металлургиятыгар интэриэс уҕараабат, өссө ордук күүһүрэн иһэр. Мин саныахпар, тимири уһаарыы былыргы үгэһин, төрүтүн билбэккэ эрэ туох эрэ саҥаны толкуйдуур кыаллыбат. Ол да иһин, биһиги тимири уһаарар үгэспитигэр болҕомто мыыныта суох улахан. Саха быһаҕын оҥоруу куруук болҕомто үөһүгэр буолар.
Фестиваль аһаҕас халлаан анныгар, кэрэ айылҕа быыһыгар ыытыллар. Түүн хойукка диэри тимир уустара бэйэлэрин кыахтарын, дьоҕурдарын тилэри көрдөрдүлэр, арыйдылар. Уустар үлэлэрин тутан-хабан, үтүгүннэрэн оҥорон көрүөххэ сөп этэ. Ону таһынан ааптардар үлэлэрин атыыта тэриллибитэ.
Комментарии
Авторизация на сайте через социальные сети