Харлампьевтар — Прокровскай биир дьоһун ыала

«Эркээни» автоледилэр кулуупатрын бэтэрээнэ Альбина Васильевна сыыдам сырыылаах омук массыынатыгар олорсон Покровскай «Эргис» микро-оройуонугар баар сайылыктарыгар сыыйылыннаран тиийдибит.


Аара айаннаан иһэн:- Массыына уруулугар 42-с сылбын олоробун, – диэн кэпсэтиини саҕалыыр Альбина Васильевна. - Бастаан Дьокуускайга ДОСААФ куурсугар суоппарга үөрэммитим. Өр сылларга Покровскай-Дьокуускай маршрукка кондукторынан үлэлээбитим, кэтэхтэн Красноярскайдааҕы автотранспорт техникумун үөрэнэн бүтэрбитим. Уһун кэмҥэ хонтуруоллуур-ревизиялыыр сулууспаҕа үлэлээн бочуоттаах сынньалаҥҥа тахсыбытым.
Сайылыкка аҕа баһылык А.П.Харлампьев үөрэ-көтө көрсөр. Анатолий Петрович ИДьМ бэтэрээнэ, 30-ча сыл үлэлээн баран пенсияҕа тахсан, биэс сыл анараа өттүгэр сайылыгар бастаан ураһа, сынньанар бэсиэккэ, ааспыт сыл сөбүгэр улахан балаҕан туттан санаата көнөн сылдьар. Тэлгэһэ тутуута барыта ураты, ол курдук күрүө-хаһаа уон араастык тутуллубут, тимириттэн саҕалаан хатыйа күрүөҕэ тиийэ. Хобби курдук, арааһы мунньар-оҥорор. Арыгыны утаран, испэтиннэр диэн бытыылканы моонньуттан дьөлөн күлүүстээн кэбиспитэ бэрт дьикти, араас сыллар халандаардара, телефоннара , бытархай харчылар о.д.а араас элбэх. «Олоҥхо», «Кыайыы 70 сылыгар», «Кыстык», «Муҥха» диэн тиэмэлэргэ макет композициялары олус чочуонайдык оҥортообут.
Талааннаах киһи барытыгар талааннаах, дьоҕурдаах дииллэринии өссө кинигэ суруйар эбит. Бу туһунан, маннык билиһиннэрдэ: - Кэргэмминээн Альбина Васильевналыын «Одоҕой» диэн алааска билсэн ыал буолбуппут 47 сыл буолла, үс оҕолоохпут, сэттэ сиэннээхпит уонна биир хос сиэннээхпит. Улуустааҕы «Хаҥалас» хаһыакка уопсастыбаннай корреспонден буоларым быһыытынан, улуус олоҕун сырдатабын. Итинтэн сиэттэрэн кинигэ суруйуутугар ылсан барбытым. Бастаан аҕам, онтон иккис кинигэбин Нөмүгүгэ олорор эдьиийдэрим туһунан суруйталаан таһаарбытым, билигин үһүс кинигэбин бэчээккэ бэлэмнии сылдьабын, - диир Анатолий Петрович халыҥ папкаларын кыбынан туран. – Кэргэним барахсан, үлэлиир эрдэҕинэ олус эппиэтинэстээҕэ. Эппитин, ылсыспытын ыһыктыбакка толотторон тэйэр үгэстээҕэ. Киниттэн оччотооҕу таксистар да толлор буолаллара. Дэлэҕэ даҕаны «Королева трассы» диэн ааттыахтара дуо?

«Ууһу кытта олорон киһи уус буолар» диэн өс хоһоонугар этиллэринии тарбаҕар талааннаах кэргэнэ Альбина Васильевна оҕуруонан таҥара күлүктэрин тиспитэ тыыннаах курдуктар. Ураһаҕа киллэрэн араас оҥоһуктарын көрдөрдө. Эдэригэр, үлэтин быыһыгар, ол кэм сиэринэн уопсастыбаннай үлэ көхтөөх кыттааччыта. Ол курдук, олорор сиригэр Кыыл Бастаахха дьахталлар сэбиэттэрин бэрэссэдээтэлинэн, ГАИ уонна Саха сирин тырааныспарын уопсастыбаннай инспекторынан сыралаһан туран үлэлэспит. Үлэ бэтэрээнэ сааһыран баран, «Эркээни» автоледилэр кулууптарын чилиэнэ. Ханнык да ыраах, уустук айаҥҥа иҥнибэккэ сылдьар Альбина Васильевна санаатын маннык үллэстэр:
- Бастаан Улуу Кыайыы 65 сылыгар анааммыт 2010 с. Төхтүртэн Улахан Ааҥҥа диэри автопробег оҥорбуппут. Онно 15-һиэ буолан сылдьыбыппыт. Салайааччыбыт аан дойдуну эргийэ айаннаан кэлбит Лидия Софроновна Бочурова этэ. Өрөспүүбүлүкэҕэ аан бастаан автоледилэр ыһыахтарын Нөмүгүгэ тэрийбиппит. Иккис ыһыах - Бүлүүгэ, үһүс Үөһээ Бүлүүгэ буолбуттара. Быйыл Уус-Алдан улууһугар, «Доҕордоһуу» музей-комплекс сиригэр-уотугар барыта 13 улуустан, 250 суоппар дьахтар кыттыылаах улахан ыһыах ыстыбыт. Ыһыахтарбытын суолга саахала суох сырыыны хааччыйар, уруулга олорор киһи эппиэтинэһин үрдэтэр сыаллаах-соруктаах ыытабыт,- диэтэ.
Оҕо оҕото ордук күндү, минньигэс дииллэр. Онон сайылыкка тапталлаах сиэннэригэр тэлгэһэ араас муннуктарыгар сыал ытар сир, тимир орон сиэккэтиттэн батут, теннис остуола, мохсуо быраҕыыта кытта бааллар. Сиэн дьон самаан сайын үтүөтүттэн кэрэтиттэн бэриһиннэрэн оонньоон-мэниктээн астына сынньанан бараллар.
Ахсым тимир көлөлөөх саха далбар хотуна Альбина Васильевна уонна суруйар, уһанар талааннаах Анатолий Петрович Харлампьевтар Покровскай куорат биир дьоһун олохтоохторо, ыччакка холобур буолар дьон!