Бастакы күн улуус баһылыга Гаврил Алексеев салайар бөлөҕө Тумул, Чкалов уонна Тиит Арыы олохтоохторун кытта көрүстэ. Отчуокка кэлбиттэр сүрүннээн кыһыҥҥы суол туругун, олорор дьиэлэри кииннэммит ититэр ситимҥэ холбооһун, сайынын өрүһүнэн сырыы туһунан боппуруостар долгуталларын эттилэр, санааларын үллэһиннилэр.
Сарсыныгар отчуот туруорааччылар Сиинэҕэ, Үөдэйгэ сырыттылар. Үөдэйгэ сүрүн кыһалҕанан биэлсэр суоҕа буолбут. Кэнники сылларга олохтоох ФАП-ҥа хас да биэлсэр уларыйбыт. Улуус кылаабынай бырааһын эбээһинэһин толорооччу Маргарита Стручкова эппитинэн, улуус быраастарынан хааччыллыыта 92 бырыһыан эбит буоллаҕына, биэлсэрдэринэн хааччыллыыта 75 бырыһыан эрэ. Онон онуоха-маныаха диэри Сиинэ учаастактааҕы балыыһатыттан эмп үлэһитин аҕаларга диэн быһаардылар.
Кытыл Дьураҕа былырыыҥҥы отчуокка 33 боппуруостан биэһэ — өрүһүнэн сырыыны быһаарыы, сэлиэнньэни көһөрүү, цифровой телевидениены, сотовай сибээһи киллэрии, Сиинэ үрэҕин туоруур муостаны тутуу - туолбатаҕын эттилэр. Иһиккэ эминэн-томунан хааччыллыыны тупсарары, ФАП өрөмүөннүүрү, АЗС суоҕа кыһалҕаҕа кубулуйбутун эттилэр.
Икки күн устата отчуоттарга икки сүүстэн тахса киһи сырытта, ким баҕалаах тыа хаһаайыстыбатын департаменын, субсидия агенствотын үлэһиттэриттэн сүбэ-ама ылла.
Бу күннэргэ улуус дьаһалтатын 2015 сыллааҕы үлэтин отчуотун дьүүлэһии илин эҥээр нэһилиэктэргэ ыытыллар. Кэлэр нэдиэлэҕэ отчуоту Эркээни хочо сэлиэнньэлэрин уонна Покровскай куорат олохтоохторугар туруоруохтара.
Комментарии
Авторизация на сайте через социальные сети