2013 сыллаахха бэдэрээтчик Солдатов Иван Александрович салайааччылаах Строитель МУП баар кыһалҕаны өйдөөн, дойдутугар бэриниилээх санаатынан ылынан, 1987 сыллаах эргэ тутууну уларытан-тэлэритэн саҥардан туттулар. Онон, үс сылы быһа тулуур, дьулуур, баҕа санаа холбоһон тутуллубут толору хааччыллыылаах сылаас эркиннээх алаһа дьиэҕэ төрөппүттэр, иитээччилэр, тэрилтэ салайааччылара эҕэрдэлии кэлбиттэр. Алгысчыт Алексей Николаев аал уоту оттон сиэри-туому толордо. Салгыы кыһыл лиэнтэни оройуон дьаһалтатын социальнай боппуруостарга баһылыгы солбуйааччы Людмила Александрова, улуус үөрэҕин управлениетын начальнига Мария Иванова, уһуйаан сэбиэдиссэйэ Дария Боескорова ытыс хабыллар тыаһыгар быстылар. Салгыы малааһыҥҥа кэлбит ыҥырыылаах ыалдьыттар иһирдьэ киирэн, саҥа миэбэлинэн киэркэйбит үлэлиир кабинеттары, икки бөлөх дьарыктанар саалаларын, утуйар хосторун, минньигэс ас сытынан дыргыйар куухунаны киирэн астына көрдүбүт.
Салгыы музыкальнай саалаларыгар киирэн бу дьиэ кырачаан хаһаайыннарын эҕэрдэ кэнсиэрэ буолла. Малааһыны өр күүппүт Эннэкээн оҕо саадын коллективыгар эҕэрдэ тыл бастыҥын тэрилтэ салайааччылара, тутааччылар, төрөппүттэр эттилэр, инникитин Үрэн Хоһуун сыдьааннарын сайдыыга-билиигэ үөрэтэн, төрүт духовнай баайы харыстыырга алгыстарын анаатылар, методическай пособиелары, харчынан сертификаттары, кэрэхсэбиллээх бэлэхтэри туттардылар. Иккис сылын үлэлиир иитээччи Л.А.Софронова уһуйааҥҥа үлэлиир усулуобуйа барыта баарыттан итиэннэ дьоҕус коллективын ис эйгэтин сөбүлээн табылынным диэн астынарын биллэрдэ. Оҕолору кытта үлэлиирбин, дьарыктанарбын сөбүлүүбүн, манна кэлэн идэбин сөпкө талбыппын дии санаатым. Билиҥҥи оҕолор олус сайдыылаахтар итиэннэ аныгы технологияҕа сыстаҕастар эбит. Ол эрээри кэлиҥҥи оҕолор саҥаларыгар хойутааһын баарын бэлиэтии көрдүм, -- диир эдэр специалист. Оттон төрөппүт Вероника Алексеева бу детсадка түөрт оҕото саҥардыы да сырытталлар, уһуйааннарын номнуо сөбүлүү охсубуттарын, биһиги оҕолорбутугар иитээччилэр араас үҥкүүнү, ырыаны элбэҕи үөрэтэллэригэр, төрөппүттэр бэйэбит билсэ туруохпут, бары өттүнэн көмөлөһүөхпүт - өйүөхпүт диэн санаатын үллэһиннэ.
Бүгүҥҥү малааһынтан сирэйдиин-харахтыын сырдаан үөрэ долгуйбут сэбиэдиссэй Дария Васильевна Боескорова бүччүм санаатын истиэҕин.
- Дьиҥэр былырыын алтынньыттан аһыллыбыппыт эрээри, кыһынын тымныынан аргыйара. Онон быйыл өссө төгүл баар итэҥэстэри тутааччылар, коммунальнай хаһаайыстыба үлэһиттэрэ туоратаннар билигин ичигэс буолан үөрүүбүт-көтүүбүт үксээтэ. Медицинскэй кабинет, логопед уонна психолог анаан дьарыктыыр хосторо бааллар. Оҕолор икки бөлөххө хайдыһан сылдьыахтара. Душтаахпыт, таҥас сууйар автомат массыыналаахпыт, иһигэр туалеттардаах толору хааччыллыылаах детсад буолла. Миэбэллэрбитин, куухунаҕа туран астыыр тэриллэри барытын СР үөрэҕириитин министиэристибэтэ саҥа оҕо саада аһылларынан өйөөн-көмөлөһөн биэрдэ. Аны аныгы тупсаҕай оонньуурдарынан Аллараа-Өлүөнэтээҕи хампаанньа ген. дириэктэр Андреев И.И. толору хааччыйдылар. Бу курдук 50 оҕоҕо анаммыт уһуйаан үлэбитин-хамнаспытын саҕалаатыбыт. Ситэри кэпсээтэххэ, коллективпытыгар 14 штатнай үлэһиттээхпин. Быйыл Улуустааҕы Дьарыктаах буолуу кииниттэн биһиэхэ 7 киһи саҥа үлэлии киирэн кинилэргэ үлэ миэстэтин таһаарбыппытыттан бэйэбит да сүргэбит көтөҕүллэр. Тэрилтэбэр аҥаара саҥа үөрэхтэрин бүтэрэн кэлбит педагогтар уонна олохтоох ыччаттар. Хайысхабыт оҕо дьоҕурун кыра сааһыттан билэн арыйыы, маныаха сөптөөх усулуобуйаны тэрийэн сайыннарыы буолар. Эбэҥки национальнай оройуонугар олорор буоламмыт эбэҥки тылын үөрэтэр куруһуоктаахпыт, национальнай төрүт култуураҕа сыһыарыахпыт. Тутуу боппуруостарыгар докумуоннары кытта үлэҕэ, суол-иис өттүгэр ыарахаттары көрүстүбүт эрээри бэйэбит аҕа баһылыкпыт А.С.Иванов, нэһилиэк баһылыга В.Н. Романов өйдөөн көмөлөһөн тутуу ситиһиилээхтик ыытылынна. Мария Караваеваҕа дизайн өттүгэр көмөлөспүтүгэр итиэннэ атын олохтоох урбаанньыттарга, алтыһан-үлэлэһэн кэлбит тэрилтэлэргэ уонна бэйэм дьоҕус коллективпар истиҥник махтанабын.
Комментарии
Авторизация на сайте через социальные сети