ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
25 августа 2015, 11:25

Сунтаарга өрөспүүбүлүкэҕэ тыа хаһаайыстыбатын сайыннарыы туһунан сокуон барылын тула киэҥ кэпсэтии буолла


Бу күннэргэ өрөспүүбүлүкэбит Ил Дархана Е.А. Борисов өрөспүүбүлүкэ тыатын сирин улуустарынан сылдьан аны күһүн алтынньы ыйга Ил Түмэнинэн ылыллыахтаах Саха Өрөспүүбүлүкэтигэр тыа хаһаайыстыбатын сайыннарыы туһунан сокуон тула кэпсэтиилэри ыытар.
Ол курдук, соторутааҕыта Сунтаарга улуус дьаһалтатын уонна тыа хаһаайыстыбатын управлениетын тэрийиилэринэн тыа хаһаайыстыбатын бэтэрээннэрин кытта бу саҥа сокуон барылын тула киэҥ кэпсэтии буолла. Манна улуус Хочо эҥэринээҕи нэһилиэктэрин бэрэстэбиитэллэрэ кытыннылар.
Бастаан улуус баһылыга Анатолий Григорьев улуус олоҕун-дьаһаҕын, үлэтин-хамнаһын, оттон тыа хаһаайыстыбатын управлениетын начальнига Иван Тихонов тыа хаһаайыстыбатын туругун туһунан иһитиннэриилэрин бэркэ болҕойон иһиттилэр. Сорох боппуруостарга хос быһаарыылары улуус баһылыгын үпкэ, экономикаҕа солбуйааччы Максим Прокопьев оҥордо.
Анатолий Васильевич эппитинэн, тыа хаһаайыстыбатын салаатыгар балаһыанньа олус куһаҕана суох. Билигин дойду үрдүнэн ыытылла турар политикаҕа сөп түбэһиннэрэн, оскуола иннинээҕи саастаах оҕону тустаах тэрилтэнэн хааччыйыыга улахан болҕомто ууруллар. Сунтаарга бу күннэргэ урукку «Бойом» ХЭТ хочуолунайыгар ананан тутуллубут объегын 80 миэстэлээх оҕо саадыгар уларытан тутуу саҕаланна. Бу сыл бүтүүтэ үлэҕэ киириэхтээх. Тыа хаһаайыстыбатыгар былырыын 2 граны ылбыт буоллахпытына, быйыл 10 киһибит ылбыт. Улууска 19 хотон тутулла турар. Бүгүҥҥү туругунан окко сыллааҕы былаан 78 % туолбут. Ынах сүөһү ахсааныгар былааны - 131, сылгыга - 138, сибиинньэ иитииитигэр - 120, үүтү туттарыыга - 107, арыыны оҥорууга 128 бырыһыан толордубут. Саҥа сокуон туһунан кылгас быһаарыыны тыа хаһаайыстыбатын управлениетын начальнига Иван Тихонов оҥордо. Кини саҥа сокуон урут үлэлии сылдьыбыт 14 араас сокуону холбоон, РФ тустаах сокуонугар сөп түбэһиннэриллэн оҥоһулларын бэлиэтээн эттэ. Салгыы көрсүһүү хас биирдии кыттыылааҕа саҥа сокуон бырайыагын илиилэригэр тутан олорон, бэйэлэрин санааларын сайа этиннилэр.
Кырдьык, үйэлэрин тухары тыа хаһаайыстыбата сайдарыгар көмүс көлөһүннэрин тохпут, билигин даҕаны тыа сиригэр үлэҕэ буһа-хата сылдьар, салгын килэриччи сиэбит мөссүөннээх, чахчы үлэ дьоно этэллэрэ-тыыналлара баар бөҕө буоллаҕа. Кинилэр үгүстэрэ тыа хаһаайыстыбатын бүгүҥҥү туругуттан астымматтарын аһаҕастык эттилэр. «Сэбиэскэй саҕана...» диэн тыл элбэхтик ахтылынна. Саҥа сокуон ылыллара олус наадатын бэлиэтээн туран, сокуон барылыгар элбэх итэҕэстэри-быһаҕастары ыйдылар. Бэйэлэрин санааларын урукку өттүгэр улуус тыатын хаһаайыстыбатын салаатын өр кэмнэргэ салайбыт И.Н. Уаров, Ю.К. Семенов, «Кириэстээх» ТХПК бэрэстэбиитэлэ А.С. Трифонова, тыа хаһаайыстыбатын бэтэрээнэ М.И. Коколов, уруккута улуус биир күүстээх экономиһа Тойбохойтон М.А. Петров, баайга-дуолга сыһыаннаһыыларга улуустааҕы комитет салайааччыта А.К. Васильев, Табаҕа аатырбыт комбайнера К.И. Михайлов, Бүлүүчээнтэн В.И.Тимофеев о.д.а. санааларын эттилэр.
Бу мунньах түмүгүнэн анал боротокуол оҥоһуллан тустаах уорганнарга тиксэриллиэҕэ диэн буолла. Көрсүһүүгэ кыттыбыт бэтэрээннэр, мунньаҕы тэрийээччилэр даҕаны сүрдээҕин астынан тарҕастылар. Элбэх интэриэһинэй этиилэр этилиннилэр. Били, этэргэ дылы, кырдьаҕаһы хааһахха хаалыы сылдьан сүбэлэт диэн бэргэн этии туһалааҕа манна эмиэ көһүннэ курдук.
При частичном или полном использовании материалов гиперссылка на сайт ysia.ru обязательна.
Категория: Территория Просмотров: 712 Источник: ЯСИА Автор: Борис Николаев Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ