- Үөрүүбүтүн СР сибээскэ уонна информационнай технологияларга миниистирэ Александр Борисов үллэһиннэ. Кини бэйэтин этиитигэр бу республикаҕа бастакы уопут буоларын, урукку өттүгэр чааһынай тэрилтэ бэйэтин күүһүнэн маннык технологияны олоххо киллэриитэ суох этэ, манна аммалар бастакы буоллугут диэн бэлиэтээтэ.
- Бу үлэни Федор Скрябин салайааччылаах«Эксперт-групп“ хааччахтаммыт эппиэтинэстээх тэрилтэ толордо.
- – Биһиги чахчы улахан үлэни ыытан бырайыакпытын олоххо киллэрдибит.Улуус дьаһалтатын, чуолаан баһылыгы тутууга солбуйааччы Дмитрий Дмитриевич Ивановы кытта ыкса үлэлэһэн былааммытын толордубут диэххэ наада. Ону сэргэ сибээс миниистирэ Александр Ильич Борисовка государственнай-чааһынай партнерствоны өйөөбүтүгэр дириҥник махтанабыт.
- Уопсайа 146 килэмиэтири тардан кэллибит. Оптоволокно кыаҕа улахан. Манна төһө баҕарар ханаал холбонуон сөп. Билигин сотовай сибээс оператордарын кытта үлэ барар. БилиҥҥитэМегафон холбонно. Билайн, МТС холбонуохтаахтар.
- Бу үлэбит саҕаланыыта эрэ буолар. Инникитин түһүмэхтэринэн оптоволоконнай сибээһи нэһилиэктэргэ киллэриэхпит. Улууска үлэни „Эксперт-телеком“ ХЭТ сүрүннүөҕэ, - диэн кэпсээтэ Федор Вячеславович.
- Үөрүүлээх мунньах кэнниттэн СР сибээскэ уонна информационнай технологияларга миниистирэ Александр Борисов нэһилиэк баһылыктарын, тэрилтэ салайааччыларын кытта көрүстэ. Кинини кытта өссө „Эксперт-групп“ ХЭТ директора Федор Скрябин уонна Мегафон сибээс Дьокуускайдааҕы отделениетын директора Александр Костелин кыттыыны ыланнар үлэлэрин билиһиннэрдилэр уонна боппуруостарга эппиэттээтилэр.
- Александр Ильич, Федор Вячеславович оптоволоконнай сибээс линиятын тардыыга уонна цифровой телевидение киириитигэр сир боппуруоһугар баһылыктартан күүс-көмө буолалларыгар көрдөстүлэр. Маны сэргэ миниистир сорох нэһилиэктэр дьаһалталара СВЭМ системанан, ол эбэтэр электроннай өҥөлөрүнэн туһаныыга, гражданнар ыйытыктарын ыытыыга өссө да ситэтэ суох үлэлиллэрин ыйда. Александр Ильич цифровой телевидение Амма улууһугар бастакы тестовой бэрэбиэркэлээһинэ 2016 сыл бастакы кварталыгар буолуо диэн эттэ. Манна сирин учаастага барыта быһаарыллан турар эбит.
- Мунньах кэнниттэн миниистиртэн оптоволоконнай сибээс туһунан ыйыталастым.
- - СР Бырабыытылыстыбатын былаанынан, оптоволоконнай сибээс Амма улууһугар 2017 сыл бүтүүтэ кэлиэхтээх этэ. Ол гынан баран маны бу чааһынай хампаанньа аҕалла. Ол эрээри иккис да оптоволокно кэлиэн сөп. Бу холобур атын улуустарга тарҕаныан сөп эрээри, олус ыарахан. Харчы да, технология да өртүнэн. Уопсайынан сибээс ымпыга-чымпыга элбэх. Онон бу киэҥник тарҕаныа диир кыах суох. Сотору кэминэн спутниковай сибээс киэҥник сайдыаҕа. Аны сибээс туһунан эттэххэ, билигин олохпут улахан өттө онтон тутулуктанар буолла. Харчы эргиирэ, араас өҥөлөр төлөбүрдэрэ барыта түргэн сибээстэн тутулуктаналлар уонна ол нөҥүө оҥоһуллаллар. Онон бу эһиэхэ элбэх каналы хааччыйар оптоволокно кэлбитэ үлэҕэ-хамнас хаамыытыгар биллэн туран туһалаах буолуо, - диэн Александр Ильич бэйэтин санаатын эттэ.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети