РФ Накаастабылы толорор федеральнай сулууспатын Саха сиринээҕи управлениетын начальнига, ис сулууспа полковнига Владислав Дзюба көҕүлээһининэн, өрөспүүбүлүкэ бары холуонньаларыгар "Буруйун боруостааччыга быраабы, сокуону быһаарыы күннэрэ" ыытылаллар.
1 №-дээх холуонньаҕа Дьокуускай куорат нэһилиэнньэ социальнай көмүскэлигэр уонна үлэҕэ управлениетын юриһа Вячеслав Николаев салайааччылаах бөлөх киирэ сырытта. Холуонньа остолобуойугар 80-ча хаайыылаах муһунна. Кинилэргэ туох сыаллаах-соруктаах тэрээһин буоларын иһитиннэрии кэнниттэн, биирдиилээн консультация саҕаланна.
Балтараа чаас иһигэр Пенсионнай фонда, Дьокуускай куорат нэһилиэнньэ социальнай көмүскэлигэр уонна үлэҕэ управлениетын специалистарыгар уонна адвокаттарга барыта 46 киһи сылдьан сүбэлэттэ-амалатта. Интэриэһиргиир уонна кыһалҕалаах ыйытыыларыгар толору хоруйу ылан, хаайыылаахтар астынан тарҕастылар.
Холуонньа начальнигын эбээһинэһин быстах кэмҥэ толорор Бауржан Алимбетов СИА-ҕа иһитиннэрбитинэн, маннык киэҥ далааһыннаах тэрээһин аан маҥнайгытын ыытыллар. Маныаха диэри биирдиилээн эрэ дьоҥҥо консультация биэрэ киирэр эбиттэр. Маннык туһалаах тэрээһиннэр мантан инньэ кэмиттэн кэмигэр ыытыллар буолуохтара.
Комментарии
Авторизация на сайте через социальные сети