ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
6 августа 2015, 16:12

Наталья Волкова: «Аан дойдуга розацеанан нэһилиэнньэ 8-10% ыалдьар»


Наталья Никифоровна Волкова – Тирии-венерологическай ыарыылар өрөспүүбүлүкэтээҕи диспансердарын үрдүк категориялаах дерматовенеролог-бырааһа:

Розацеа – тирии дьарҕа ыарыыта. Ыарыы сүрүн бэлиэлэринэн киһи этэ өр кэмҥэ кытарыыта уонна сирэйгэ ириҥэ, чэр уо.д.а. ымынахтар тахсыылара буолар.

Аан дойдуга розацеанан нэһилиэнньэ 8-10% ыалдьар. Үксэ дьахталлар. Ол гынан баран, эр киһи түргэнник хаптарыан уонна ыарыы сыыстарыылаах буолуон сөп.

Розацеа эбэтэр оруосабай хатаал, сүрүннээн, сырдык тириилээх дьоҥҥо уонна 40-50 сааска биллэр. Бу ыарыы кырдьаҕастары уонна оҕолору сэдэхтик булар.

Туохтан үөскүүрүй?

Ыарыы төрүөттэрэ ситэ чинчийиллэ иликтэр. Ол эрэн, кэккэ түөрүйэлэр бааллар. Баар сабаҕалааһыннарынан, розацеа үөскүүрүгэр куртах уонна эндокриннай систиэмэ ыарыылара, ыарыыны утары охсуһар күүс мөлтөөһүнэ, утумунан бэриллэр уо.д.а. ыарыылар сабыдыаллыыллар.

Хайдах биллэрэрий?

Аан бастаан муруҥҥа, иэдэскэ уонна сүүскэ кыра ымынахтар бытыгыраһаллар. Кыра ымынахтар түргэнник ааһаллар, ол эрээри, тирии хаттаан кытаран тахсарыгар маннык көстүүлэр сылтах буолуохтарын сөп:

Күүстээх стресс;

Арыгылаах утаҕы иһии;

Эти-сиини тоҥоруу;

Сыыһа аһааһын (итии, туустаах-тумалаах аһылык).

Сорох эмтэр сөп түбэспэттэрэ;

- Сирэйи көрүммэт буолуу;

Тириини кыһытар кремнэри туттуу.

Сотору кэминэн киһи сирэйэ кытардан-кытаран барар. Тирии хаҕыланар, тирии нөҥүө биллэр-биллибэт «сулустаах тымырдар» бычыгыраан тахсаллар. Ыарыы күүһүрэр, сирэй тириитигэр кыһыл хатааллар, ириҥэ уонна чэрдэр баар буолаллар.

Ыарыы сэтэриир буоллаҕына, тирии сорох учаастага халыҥаан барар, апельсин хаҕын санатар чэр үөскүүр. Ардыгар киһи мунна, сүүһэ, кулгааҕын эминньэҕэ халыҥыыр. Маннык халыҥааһын греческэй тылынан «фима», а.э. иһэн тахсыы диэн ааттанар. Иһэн тахсыбыт мурун эбэтэр ринофима күөхтүҥү өҥнөнөр.

Эмтэнии

Розацеаны эмтээһин ньымалара араас. Эмтэр үксүлэрэ киһи сирэйигэр тахсыбыт розацеаны кыччатар аналлаахтар. Оттон сорох эмтэр уонна ньымалар ньиэрбинэй систиэмэ уонна аһы буһарар органнар ыарыыларын эмтииллэр.

Аһылыгы көрүнүөххэ

Розацеалаах ыарыһах сөптөөхтүк аһыыра улахан суолталаах. Ханнык баҕарар кэнсиэрбэлэммит бородууктаны, тууһу, халбаһы оҥоһуктары, аһыы, ыһаарыламмыт, минньигэс астары аһара сииртэн туттунуохтаах.

Фрукталартан апельсины, винограды, мандарины, грушаны сиэ суохтаах. Испиирдээх утахтартан, хойуу, итии кофеттан уонна чэйтэн аккаастаныахтаах.

Косметиканан туһаныы

Розацеалаах киһи күһүн уонна кыһын сирэйин тириитин күүстээх тыалтан, тымныыттан, хаартан, самыыртан, оттон саас уонна сайын чаҕылыччы тыгар күн сардаҥатыттан харыстыахтаах, тэллэгэр сэлээппэни, хараҥа ачыкыны кэтиэхтээх. Сырылас куйааска күнтэн көмүскүүр зонтиктаах сылдьыахтаах.

Уулуссаҕа тахсыан иннинэ сирэйигэр күнтэн харыстанар SPF15 кириэми соттуохтаах. Саунаҕа уонна солярийга сылдьара көҥүллэммэт.

Грейпфрут, черника, ромашка, оҕурсу састааптаах эрэ косметиканы туттуохтаах. Косметика испиирэ суох буолуохтаах. «Гипоаллергенно» диэн суруктаах косметиканан туһанара ордук. Крем ыарыы көстүүлэрин сабар эрэ буолбакка, эмтиир аналлаах буолуохтаах.   

При частичном или полном использовании материалов гиперссылка на сайт ysia.ru обязательна.
Категория: Жизнь Просмотров: 862 Источник: Газета "Саха Сирэ" Автор: Надежда Егорова Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ