Бу биир күн иһигэр Ньурбаҕа 100-тэн тахса ыалга саҥа дьиэ күлүүһүн тутар дьоллоох түгэн тосхойдо. Ньурбалар үөрүүлээх тэрээһиннэригэр СӨ архитектураҕа уонна тутууга миниистирин бастакы солбуйааччы Павел Аргунов ыалдьыттаата.
Ньурба куоратыгар 36 квартиралаах бюджет үлэһиттэригэр анаммыт, 16 уонна 35 квартиралаах социальнай суолталаах дьиэлэр олохтоохторго ааннарын астылар.
Маны сэргэ Маар нэһилиэгэр «Үтүө дьыала» хамсааһынынан эдэр специалистарга анаан тутуллубут 4 хостоох толору хааччыллыылаах дьиэ үлэҕэ киирдэ.
Антоновка «Лэппириэн» учаастагар Тыа хаһаайыстыбатын министиэристибэтинэн үбүлэнэр бырагырааманан тутуллубут 12 типовой дьиэ кэчигирээтэ.
Ааһан эрэр 2015 сылга оройуон үрдүнэн барыта 16,5 тыһыынча квадратнай миэтэрэ иэннээх олорор дьиэ үлэҕэ киирдэ, ол иһигэр 10 тыһ. квадратнай миэтэрэ чааһынай дьиэ, 6,5 тыһ. квадратнай миэтэрэ – элбэх квартиралааах дьиэ.
Ньурба сүүһүнэн олохтооҕор үүнэр 2016 сылы саҥа дьиэҕэ көрсөр дьоллоох түгэн тосхойдо.
Комментарии
Авторизация на сайте через социальные сети