ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
8 декабря 2015, 10:52

Үөһээ Бүлүүгэ скульптор, муосчут, норуот маастара Анисим Прокопьев 90 сааһыгар анаммыт тэрээһиннэр буоллулар


Үөһээ Бүлүү символа буолбут «Хотун Бүлүү» монумент автора, скульптор, муосчут, норуот маастара, Саха АССР культуратын үтүөлээх үлэһитэ, Российскай Федерация, Саха Республикатын Суруналыыстарын сойууһун чилиэнэ, ССРС доруобуйатын харыстабылын туйгуна, Саха Республикатын Худуоһунньуктарын сойууһун чилиэнэ, Аҕа дойду Улуу сэриитин кыттыылааҕа, Үөһээ Бүлүү улууһун бочуоттаах олохтооҕо Анисим Григорьевич Прокопьев 90 сааһыгар анаммыт үбүлүөйдээх тэрээһиннэр улууспутугар сэтинньи 28-29 күннэригэр ыытылыннылар.

Сэтинньи 28 күнүгэр Петр Тобуруокап аатынан Сынньалаҥ киинигэр Анисим Прокопьев айар үлэтин быыстапката аһылынна, манна кини олоҕун, айар үлэтин кэпсиир стендэлэри, оҥоһуктарын көрдүбүт. Анисим Григорьевич 85 сааһын көрсө төрөөбүт улууһугар кэлэ сылдьан, история уонна этнография музейыгар скульптурнай оҥоһуктарын бэлэхтээбитэ, ону көрдөрүүгэ туруордулар.

Салгыы «Хотун Бүлүү» монуменыгар үөрүүлээх миитин буолла. Манна улуус Сэбиэтин мунньаҕын бэрэссэдээтэлэ Семен Михалев, РФКП Үөһээ Бүлүүтээҕи салаатын салайааччы Георгий Степанов, улуус дьаһалтатын дьыалаларын дьаһайааччы Спиридон Борбуев уонна И.Н.Барахов аатынан 1 №-дээх орто оскуола 10-с кылааһын үөрэнээччилэрэ кыттыыны ыллылар.

Петр Тобуруокап аатынан Сынньалаҥ киинигэр Анисим Григорьевич Прокопьевы чиэстээһин буолла. Сахалыы таҥастаах арыалдьыттар быырпаҕынан, кымыһынан, алаадьынан күндүлээтилэр. Анисим Григорьевиһы кытары ДьГТХА преподователэ, төрөппүт уола Анисим Анисимович Прокопьев сыанаҕа тахсан аҕатын үөрүүтүн тэҥҥэ үллэһиннэ. Ытыктыыр киһибитин төрөөбүт, үлэлээбит-олорбут нэһилиэктэриттэн, тэрилтэлэриттэн бэрэстэбиитэллэр тахсан, илии тутуһан, эҕэрдэ тыллары анаатылар, уһун үйэни баҕардылар.

Анисим Григорьевич сиэнэ, кинини утумнааччы скульптор Николай Чоччасов Өлүөнэ өрүс монуменын оҥорсубута. Онон эһээлээх сиэн республикабыт икки улуу өрүһүн үйэтиппит үтүөлээхтэр. Бу туһунан мустубут дьон сөҕөн-махтайан туран бэлиэтээтилэр.

Үөрүүлээх тэрээһин эҕэрдэ концерынан түмүктэннэ. Норуоттар икки ардыларынааҕы «Алтын Майдан» фестиваль, республикатааҕы ырыа күрэстэрин кыайыылаахтара, Өргүөт, Үөһээ Бүлүү нэһилиэктэрин уус-уран самодеятельноһын артыыстара кытыннылар, чаҕылхай, умнуллубат нүөмэрдэри бэлэхтээтилэр.

При частичном или полном использовании материалов гиперссылка на сайт ysia.ru обязательна.
Категория: Культура Просмотров: 824 Источник: ЯСИА Автор: Мария Васильева Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ