Ыччаттар түөрт хамаандаҕа наарданан, «Урааҥхайдар», «Хорсуннар», «Дьаархан эрэллэрэ» уонна «Кустук» диэн ааттанан күрэстэстилэр. Хомойуох иһин, оскуолаҕа уонна уһуйааҥҥа бэрэбиэркэ кэлэн, ити эйгэҕэ үлэлиир эдэр специалистар кыттыбатылар.
Маҥнайгы күн күрэс үөрүүлээх аһыллыыта уонна волейболга күрэхтэһии буолла. Хамаандалар түмсүүлээхтэрэ бастакы күрэхтэһииттэн көһүннэ, ыалдьааччылар да тоҕуоруһа муһуннулар.
Иккис күн хамаандалар Ойбон күөлтэн муус ыллылар. Манна хаҥкы күрэҕэр эбии комбинированнай эстафета буолла. Дьэ онтон муус ылыытыгар саамай эрийсиилээх күрэс саҕаланна! Манна ким мындыра, сымсата, сып-сап туттара көһүннэ. Эбэн эттэххэ, бу муустар Саҥа дьылга нэһилиэк килбэйэр киинигэр киэргэл буолан, муус оҥоһуктарга кубулуйуохтара.
Үһүс күн уолаттар бильярдка, оттон кыргыттар өбүгэбит төрүт оонньууларыгар – хабылыкка, хаамыскаҕа күрэхтэстилэр.
Төрдүс күн нэһилиэк күүһүнэн тутуллубут «Дьулуур» спортивнай манежка бастаан эстафета ыытылынна, онтон көрдөөх старка хамаандалар илин-кэлин түһүстүлэр.
Бүтэһик түһүмэххэ, саамай ыһыы-хаһыы аргыстаах, күүһү-уоҕу, тулууру эрэйэр ханаат тардыһыыта буолла. Дьэ манна хамаандалар уурбут-туппут курдук киппэ уолаттарын таһаардылар.
Күрэс түмүгүн субуота киэһэ кэнсиэркэ биллэрдилэр. Бэрт эрийсиилээх киирсиилэр түмүктэринэн «Хорсуннар» хамаанда инники чорбойон бастаата, иккис миэстэни «Урааҥхайдар», үһүс миэстэни «Кустук» хамаанда уонна төрдүс миэстэни «Дьаархан эрэллэрэ» ыллылар.
Станислав Гольдеров,
Дьаархан нэһилиэгин ыччатын лидерэ.
Комментарии
Авторизация на сайте через социальные сети