„Полярные авиалинии“ авиахампаанньа Россияҕа соҕотох Pilatus PC-6 самолёта улуус иһигэр дьону таһыаҕа. Бу самолёт Ан-2, Ан-3 самолёттары солбуйуоҕа. Саҥа самолёт биһиги улууспутугар базаланыаҕа. Онон киниэхэ анаммыт ангар тутуллара былааннанар.
Көтөр аал биһиги тыйыс, тымныы кыһыммытыгар сөп түбэһэр, айылҕабыт климатын усулуобуйатыгар эппиэттиир. Уратыта диэн, самолёт кыра былаһааккаларга хайдах баҕарар түһэр-тахсар кыахтаах. Көтөр аал уһуна — 10,95 м., биир чаас көтүүгэ 110 лиитэрэ кэрэһиини сиир. Дьон олорор олбоҕун ахсаана — 6. Ол эрэн самолёт таһаҕас, почта илдьэр түгэнигэр, 4 эрэ киһини ылар кыахтаах.
Экипаж хамандыыра Ньургун Николаевич этэринэн, бу самолёт былырыын Швейцарияттан атыылаһыллыбыт. Дьокуускайтан манна кэлэллэригэр 6,5 чаас устата көппүттэр, Уус-Ньараҕа түһэн уматык куттубуттар. Самолет томороон тымныыны тулуйарын, көтүөн сөбүн Ньургун Николаевич киэн тутта кэпсээтэ. Маны сэргэ бу ый саҕаланыыта кэлэннэр, нэһилиэк былаһааккаларын көрбүттэрин эттэ. Ол курдук, Эбээх, Берёзовка уонна Ойуһардаах эрэ бөһүөлэктэрин былаһааккалара сөптөөҕүнэн ааҕыллыбытын ыйда уонна бу күннэргэ, халлаан туран эрэ биэрдэр, техническэй көтүү кэнниттэн, бу нэһилиэктэргэ дьону таһыыны саҕалыахпыт диэтэ. Атын нэһилиэктэр былаһааккаларын ирдэбилгэ эппиэттиир гына оҥоһуннахтарына, самолет тиийиэ.
Нэһилиэктэргэ самолёт расписаниенан көтүөҕэ, о.э. биир күн устата биир ыйыллыбыт нэһилиэккэ дьону таһыаҕа, күҥҥэ 4-5 рейси оҥоруоҕа.
Онон абыраллаах көтөр аал улууспутугар кэлиитэ Уһук Хоту салгын тырааныспарын сайыннарыыга биир улахан суолталаах, историяҕа киирэр бэлиэ түгэнинэн буолла. Нэһилиэктэргэ хаайтарыыта суох айанныахпыт диэн бигэтик эрэнэбит.
Комментарии
Авторизация на сайте через социальные сети