Өрөгөйдөөх тэрээһиннэр Ытык Күөл сэлиэнньэтигэр баар саха литературатын үс классик суруйааччыларыгар анаммыт мэҥэ өйдөбүнньүккэ улуус салайааччылара, интеллигенцията уонна эдэр ыччат кыттыылаах сүгүрүйүү сиэриттэн-туомуттан саҕаланнылар.
Ити кэннэ утум-ситим Тааттатааҕы хартыына галереятыгар «Таатта суруйааччыларын ытык маллара» диэн сэдэх экспонаттар, «Таатта музейдара» виртуальнай быыстапкалара үөрүүлээхтик арылыннылар. “Таатта улууһа” МТ баһылыгын социальнай боппуруостарга солбуйааччы Изабелла Сивцева, Н.Д. Неустроев аатынан Уус-Таатта оскуолатын дириэктэрэ Петр Дягилев, суруйааччы аймахтара, Дьокуускайтан кэлбит суруйааччылар, учуонайдар кыттыылаах аны биэс сылынан Николай Неустроев төрөөбүтэ 125 сылын хайдах бэлиэтиири дьүүллэһэр «төгүрүк остуол” ыытылынна.
Икки күн устата буолбут Былатыан Ойуунускай аатынан Тааттатааҕы норуот театрыгар классик-суруйааччы Николай Неустроев төрөөбүтэ 120 сылыгар анаммыт норуот театрдарын икки ардыларыгар өрөспүүбүлүкэтээҕи фестивальга биэс улуус кэлэн кытынна. «Таатта иитэр-үөрэтэр эйгэтэ» култуурунай-үөрэтэр класстер чэрчитинэн, улуус киинин оскуолаларын үөрэнээччилэрэ, төрөппүттэрэ, учууталлара бу фестивалы көрдүлэр уонна санаа үллэстиитин тэрийдилэр.
Иккис күн суруйааччы киинэ түспүт дойдутугар – Алдан нэһилиэгэр кини аатын сүгэр оскуола тэрийбит “Неустроев ааҕыыларыгар” Томпо, Таатта улууһун үөрэнээччилэрэ түмсэн дакылаат ааҕыытыгар, литературнай викторинаҕа, театральнай көрүүгэ куоталастылар. Бу тэрээһиҥҥэ “Таатта улууһа” МТ баһылыга Михаил Соров, “Алдан нэһилиэгэ” МТ баһылыга Юрий Борисов кыттан суруйааччыны үйэтитии боппуруоһугар сүбэлэстилэр.
Саха литературатын төрүттэспит Николай Неустроев төрөөбүтэ 120 сылын бэлиэтиир тэрээһиннэргэ П.А. Ойуунускай аатынан бириэмийэ лауреаттара – Саха сирин Суруйааччыларын сойууһун ытык сүбэтин салайааччы Урсун, Саха театрын артыыһа Айаал Аммосов, Саха сирин Суруйааччыларын сойууһун бэрэссэдээтэлин солбуйааччы Гаврил Андросов, ХИФУ РФ Хотугулуу-илиҥҥи норуоттарын тылларын уонна култууратын институтун дириэктэрин солбуйааччы Матрена Попова, саха литературатын кафедратын сэбиэдиссэйэ Валентина Семенова, нуучча тылын кафедратын сэбиэдиссэйэ Марфа Тарабукина, Саха сирин норуот театрдарын салайааччыта Николай Пономарев уонна суруйааччы аймахтарын ааттарыттан Аркадий Мордовской, Розалия Данилова кытыннылар.
Комментарии
Авторизация на сайте через социальные сети