Хайа баҕар тугэҥҥэ туруу дьон олоҕун, үлэтин, сайдыы туһугар киллэрбит кылаатын бэлиэтиир, уруйдуур-айхаллыыр үтүө үгэс быһыытынан ыһыах аһыллыытын сиэрин-туомун кэннэ наҕараадалааһын түһүмэҕэ ыытылынна. Улуус баһылыга Борис Попов Саха Өрөспүүбүлүкэтин социальнай-экономическай сайдыытыгар кылааттарын уонна өр сыллаах үтүө суобастаах үлэлэрин иһин «Гражданскай килбиэн» бэлиэни түөрт Ньурба олохтоохтооҕор үөрүүлээх быһыыга-майгыга туттарда. Бочуоттаах бэлиэнэн үлэ уонна тыыл бэтэрээнэ, уус-уран самодеятельность актыыбынай кыттыылааҕа, Күндээдэ нэһилиэгин олохтооҕо Матрена Васильевна Данилова, аар саарга аатырбыт Ийэ олоҥхоһут, Таркаайы нэһилиэгин олохтооҕо Василий Иванович Иванов – Чиллэ Баһылай, олох-дьаһах хаһаайыстыбатын бэтэрээнэ, Хаҥаластааҕы ОДьХ учаастагын маастара Александр Леонидович Жданов уонна үлэ бэтэрээнэ, Ньурба улууһун бочуоттаах олохтооҕо Михаил Семенович Эверстов наҕараадаланнылар.
Саха Өрөспүүбүлүкэтин социальнай-экономическай сайдыытыгар уонна үүнэр көлүөнэни иитиигэ кылаатын иһин бочуоттаах бэлиэ үлэ, тыыл бэтэрээнэ, Дьиикимдэ нэһилиэгин олохтооҕо Дмитрий Иванович Семеновка туттарылынна. Агропромышленнай комплекс үлэһиттэрин икки ардыларыгар ыытыллыбыт өрөспүүбүлүкэтээҕи күрэс «Бастыҥ көтөрү иитээччи» номинациятын кыайыылааҕа Ньурбатааҕы птицефабрика үлэһитэ Альбина Михайловна Андреева баһылык илиититтэн диплом тутта. Российскай Федерация Дьиэ кэргэн күнүн тэрийэн ыытар кэмитиэт «Таптал уонна бэриниилээх буолуу» мэтээлинэн Валентин Николаевич уонна Валентина Михайловна Васильевтар (Ньурба), Ахмед Андреевич уонна Надежда Петровна Дмитриевтар (Күндээдэ), Николай Иванович уонна Клавдия Петровна Фокиннар (Ньурба) дьиэ кэргэттэрэ наҕараадаланнылар.
Маны сэргэ Ньурба оройуонун общественнай-политическай, социальнай-экономическай сайдыытыгар улахан кылааттарын уонна өр сыллаах үтүө суобастаах таһаарыылаах үлэлэрин иһин «Ньурба улууһун бочуоттаах олохтооҕо» үрдүк аат СР үөрэҕириитин туйгуна, Күндээдэ, Сүлэ, Ньурбачаан нэһилиэктэрин бочуоттаах олохтооҕор Ахмед Андреевич Дмитриевкэ, РФ наукатын үтүөлээх деятелигэр, историческай наука докторыгар, профессорга, Олоҥхо научнай чинчийэр институтун дириэктэригэр, Дьаархан нэһилиэгиттэн төрүттээх биир дойдулаахпытыгар Василий Николаевич Ивановка, үлэ уонна тыыл бэтэрээнигэр, Ньурбачаан нэһилиэгин бочуоттаах олохтооҕор Варвара Давыдовна Тихоноваҕа иҥэрилиннэ.
Туруу үлэһит дьоммут, төрүт культурабыт, үгэстэрбит утумнааччылара Ыһыах күн уруйданнылар, кэлэр көлүөнэҕэ холобур буоллулар. Ньурбалар сыл ахсын Ыһыах ыһан норуоту кэрэҕэ – сырдыкка тардан, үлэhит дьон ситиhиитин ситимнээн, кэскили кэрэhилээн ыытар сүрүн тэрээһиммит кэнчээри ыччаты иитэр – үөрэтэр үөрэхпит, дьулуһуубут буолар.
Комментарии
Авторизация на сайте через социальные сети