Быйылгы күрэхтэһии биир уратытынан «ИП Федотов Р.Е.» компанияны кытта уһун кэмҥэ бииргэ үлэлэһэр Россия, Белоруссия бөдөҥ предприятиелара, тэрилтэлэрэ «Лээги Кубогын» сүрүн спонсорынан буолан бэйэлэрин бириистэрин - «УАЗ» микроавтобуһу, «Кедр», «Тайга» пилорамалары — туруорбуттара буолар.
Барыта алта дистанцияҕа тоҕус сүүрдүү буолуоҕа. Күрэхтэһии бирииһин уопсай суумата икки аҥар мөлүйүөн солкуобай буолара чопчуланна.
- Быйылгы күрэхтэһиибитин Улуу Кыайыы 70 сылыгар аныыбыт. Сахалар түҥ былыргыттан Дьөһөгөй Айыыга сүгүрүйэр сылгы таҥаралаах омукпут. Аҕа дойдуну көмүскүүр Улуу сэрии сылларыгар Саха сириттэн 45 тыһыынчаттан тахса сылгы фронт наадатыгар бэриллибитэ, дойдуну чөлүгэр түһэрии кэмигэр өссө 27-чэ тыһыынча утаарыллыбыта. Саха сылгыта барахсан кыргыһыы толоонугар, ыраах тыылга төһө киһи тыынын өллөйдөспүтэ буолуой… Онон, Дьөһөгөй оҕотугар ытыктабылбыт бэлиэтигэр, саха сылгыларыгар 7 000 уонна 10 000 м сүүрдүүнү киллэрэн биэрдибит, - диэтэ Руслан Еремеевич.
Бүгүҥҥү туругунан, Хаҥалас (тренер Иван Ушницкай), Нам (Сергей Ядреев), Чурапчы (Дмитрий Осипов), Мэҥэ-Хаҥалас (Николай Платонов), Сунтаар (Константин Иванов), Амма (Анатолий Баишев) улуустара «Лээги Кубогар» кытталларын бигэргэтэн олороллор. Ат спордун сэргээччилэр Рашен Дэй, Неарх, Карасун, Коментант, Лангервер, Дружина, Турбо-Дансер, Вершитель, Санта Лючия, Пардус, Балтимор курдук ааттаах-суоллаах сүүрүүктэр илин-кэлин түсүһүүлэрин туоһуларынан буолуохтара. Ону сэргэ Ноу Билдинг, Фурт Элли, Лангорьер Амма ипподромугар бастакы сүрэхтэниилэрин көрүөхтэрэ.
- Быйылгы Кубокпыт бу иннинэ ыытыллыбыт күрэхтэһиилэрдээҕэр саамай чаҕылхайдара буолуо диэн эрэллээхпин, - диир Руслан Еремеевич.
Күрэхтэһиини саха эстрадатын сулустара бэйэлэрин ырыаларынан киэргэтиэхтэрэ. Улахан үчүгэй бириистэрдээх лотерея оонньонуоҕа. Бааттаах киһи квадроциклы сүүйүөҕэ. Тэрээһин улахан алгыстаах оһуохайынан уонна Кыайыы 70 сылыгар анаммыт бырааһынньыктааҕы салютунан түмүктэниэҕэ.
Комментарии
Авторизация на сайте через социальные сети