Бырайыак сыалынан-соругунан оҕону уус-уран литератураны ааҕарга көҕүлээһин, уус-уран айымньы оҕо дууһатын байытар, сайыннарар суолтатын бэлиэтээһин, истии культуратын сайыннарыы буолар.
Тэрээһини нэһилиэкпит библиотекара Александра Кустурова иилээн-саҕалаан ыытта, кинигэ, уус-уран литература киһи олоҕор суолтатын туһунан сырдатта.
Салгыы 5-11 кылаас оҕолоро кабинеттарынан арахсан, «Чолбон» сурунаалга быйыл бэчээттэммит тыл маастардарын чулуу айымньыларын уус-ураннык ааҕыы буолла. Айымньылары педагогическай үлэ бэтэрээнэ, РСФСР үөрэҕириитин туйгуна, Баайаҕа нэһилиэгин бочуоттаах олохтооҕо, нэһилиэк мунньаҕын депутата Маргарита Егорова, 6 №-дээх олохтоох баһаарынай чаас начальнига, нэһилиэк мунньаҕын депутата Игнат Романов, «Тускун» Культура киинин уус-уран салайааччыта Фекла Тимофеева, «Ньургуһун» оҕо уһуйаанын логопеда Варвара Слепцова, оскуола дириэктэрин иитэр үлэҕэ солбуйааччы, нэһилиэк мунньаҕын депутата Конон Мандаров уонна 11 кылаас үөрэнээччитэ, оскуола парламенын чилиэнэ Стёпа Гоголев аахтылар. Кинилэр А.И. Софронов-Алампа «Куораччыт» («Чолбон», 4 №), Н.Е. Мординов-Амма Аччыгыйа «Мотуо» («Чолбон», 5 №), С.С. Яковлев-Эрилик Эристиин «Хачыгыр» («Чолбон», 9№), Соф.П. Данилов «Мохсоҕол» («Чолбон», 10 №), Д.К. Сивцев-Суорун Омоллоон «Аанчык» («Чолбон», 8 №) кэпсээннэрин олус кэрэхсэбиллээхтик ааҕан иһитиннэрдилэр.
Ааҕыы чааһыгар биһиги, 11 кылаас оҕолоро, чуумпуран олорон Игнат Романов толоруутугар Суорун Омоллоон «Аанчык» кэпсээнин иһиттибит. Бу айымньы ааҕааччыны биирдэ бэриллэр олоҕу сыаналыырга, бэйэ-бэйэҕэ истиҥ сыһыаны харыстыырга үөрэтэр-өйдөтөр сыаллаах дии саныыбын. Маннык тэрээһинннэр, уус-уран литератураны, улуу суруйааччылар чулуу айымньыларын дорҕоонноохтук ааҕыы, салгыы сайдан элбэхтэ ыытылыннахтарына, оҕо литератураны сэҥээрэрэ, истэ үөрэнэрэ, кэрэни кэрэхсиирэ биллэ улаатыа этэ.
Комментарии
Авторизация на сайте через социальные сети